થોડી અલગ રીતના, પણ સોફ્ટ અને સ્વાદિષ્ટ બને છે વટાણા પનીર રવાના પરાંઠા!
સામગ્રીઃ
- બટેટા 2
- લીલા મરચાં 3
- આદુનો ટુકડો 2 ઈંચ
- લસણની કળી 4-5
- તેલ
- ઘી પરાંઠા શેકવા
- જીરૂ 1 ટી.સ્પૂન
- બારીક રવો 1 કપ
- ચિલી ફ્લેક્સ 1 ટે.સ્પૂન
- કોથમીર ધોઈને સમારેલી 1 કપ
- પનીર 1 કપ
રાઈતા માટેઃ
- ગાજર 1
- કાકડી 1
- કાંદો 1
- લીલું મરચું 1
- દહીં 1 કપ
- રાઈ 1 ટે.સ્પૂન
- કાળું મીઠું 2 ચપટી
- સિંધવ મીઠું 1 ચપટી
- કાશ્મીરી મરચાં પાઉડર ¼ ટી.સ્પૂન
રીતઃ બટેટા, લીલા મરચાં તેમજ આદુને કટ કરીને મિક્સીમાં ઉમેરો તેમજ લસણની કળી પણ મેળવીને બારીક પેસ્ટ બનાવીને એક બાઉલમાં કાઢી લો. મિક્સીમાં 1 કપ પાણી નાખીને ફેરવીને પેસ્ટમાં મેળવી દો.
એક પેનમાં 1 ટે.સ્પૂન તેલ ગરમ કરી જીરૂ તતડાવો. ત્યારબાદ તેમાં વટાણા ઉમેરી 2 મિનિટ સાંતળીને, સ્વાદ મુજબ મીઠું મેળવી દો અને પેન ઢાંકીને ગેસની ધીમી આંચે 3-4 મિનિટ વટાણા ચઢવા દો. વટાણા થોડા ચઢી જાય એટલે વટાણાને મેશરથી અધકચરા વાટી લો અને બટેટાની પેસ્ટવાળું મિશ્રણ તેમાં રેડી દો. આ મિશ્રણમાં એક ઉકાળો આવે એટલે તેમાં રવો તેમજ ચિલી ફ્લેક્સ મેળવી દો. ગેસની ધીમી આંચે તવેથા વડે રવો મેળવીને મિશ્રણ હલાવતાં રહો. આ મિશ્રણ ઘટ્ટ લોટ જેવું થાય એટલે ગેસ બંધ કરી દો. લોટને ઠંડો થવા દો.
આ દરમ્યાન રાઈતું બનાવી લો. ગાજર, કાકડીને ખમણી લો. કાકડીમાંથી પાણી નિચોવી લેવું. કાંદો ઝીણો સમારી લો. આ બધી સામગ્રીને એક મોટા બાઉલમાં કાઢી લો. દહીંને કપડામાં બાંધીને તેમાંનું પાણી નિતારી લીધા બાદ દહીં પણ ગાજર, કાકડીમાં મેળવી લો. મરચું ઝીણું સમારીને મેળવો. તેમજ રાઈને અધકચરી વાટીને તેમાં મેળવી દો, કાળું મીઠું 2 ચપટી અને સાદું મીઠું પણ જરા મેળવી દો. એક ચમચા વડે આ મિશ્રણને એકસરખું પાંચેક મિનિટ ફેંટી લો. વાટેલી રાઈને લીધે રાઈતાનો સ્વાદ સારો આવશે.
પનીરને નાના ચોરસ ટુકડામાં કટ કરી લો.
વટાણાવાળો લોટ ઠંડો થઈ જાય એટલે તેમાં સમારેલી કોથમીર મેળવીને તેમાંથી એક લૂવો લઈ તેને લોટનું અટામણ દઈ થોડો વણી લીધા બાદ તેની ઉપર પનીરના થોડા ટુકડા દાબીને લગાડો અને સહેજ જાડો પરાઠો વણી લો. પનીરના ટુકડાને કારણે પરાંઠાનો દેખાવ સારો આવશે તેમજ પનીર શેકાઈને તેનો સ્વાદ પણ સારો આવશે. ગેસ પર તવી ગરમ થાય એટલે પરાંઠાને 1-1 ચમચી તેલ અથવા ઘી રેડીને બંને બાજુએથી શેકી લો.
આ ગરમાગરમ પરાંઠાનો રાઈતા સાથે સ્વાદ સારો લાગે છે!
