અમદાવાદ: વિક્રમ એ. સારાભાઈ કોમ્યુનિટી સાયન્સ સેન્ટર (VASCSC) અને We are all Humen (WAAH) ફાઉન્ડેશન બંન્નેએ સાથે મળીને વિજ્ઞાનને લોકપ્રિય બનાવવા અને પ્રોત્સાહન આપવા માટે એક અનોખી પહેલ શરૂ કરી છે. વિજ્ઞાન અને ટેકનોલોજીમાં થઈ રહેલા નવા સંશોધનનો ઉપયોગ સામાજિક લાભ માટે થાય તે હેતુથી બંન્ને સંસ્થાએ સાથે મળીને બે મુખ્ય પહેલ હાથ ધરી છે. એક તો શાળા-સ્તરના WAAH સમુદાય વિજ્ઞાન કેન્દ્રોની સ્થાપના (STEM લેબ્સ) અને બીજું WAAH સાયન્સ લોરિએટ એવોર્ડ્સ કે જેમાં વિજ્ઞાન માટે કામ કરતાં વ્યક્તિઓને ઓળખવા અને પ્રોત્સાહિત કરવામાં આવે છે. વિવિધ સામાજિક પડકારોને ઉકેલવાના હેતુથી કામ કરી રહેલાં લોકોને તેમના નવીન કાર્ય માટે અહીં બિરદાવવામાં આવે છે.
આ સંયુક્ત સહયોગના ભાગરૂપે, VASCSC અને WAAH ફાઉન્ડેશને WAAH સાયન્સ લોરિએટ્સ એવોર્ડ 2024 કાર્યક્રમનું આયોજન કર્યું હતું. જેના ભાગરૂપે 3જી જાન્યુઆરી, 2025ના રોજ CEE ખાતે ખાસ સમારોહ યોજાયો હતો.
આ કાર્યક્રમમાં ડૉ. અનિલ ભારદ્વાજ (પ્રોફેસર અને નિયામક, ભૌતિક સંશોધન પ્રયોગશાળા), કાર્તિકેય સારાભાઈ (પદ્મશ્રી, સ્થાપક નિયામક, CEE), ડૉ. પંકજ જોશી (પ્રોફેસર અને સ્થાપક-ડાયરેક્ટર, ઇન્ટરનેશનલ સેન્ટર ફોર સ્પેસ એન્ડ કોસ્મોલોજી, અમદાવાદ યુનિવર્સિટી), અને પ્રફુલ અમીન (પ્રમુખ, WAAH ફાઉન્ડેશન) ખાસ હાજર રહ્યા હતા.
આ દિવસે બે વિજ્ઞાન સ્પર્ધાઓનું પણ આયોજન કરવામાં આવ્યું હતું. જેમાં STEM મોડેલ મેકિંગ અને વક્તૃત્વ સ્પર્ધા રાખવામાં આવી હતી. આ સ્પર્ધાઓમાં WAAH સાયન્સ કોમ્યુનિટી સાથે જોડાયેલી સમગ્ર ગુજરાતની વિવિધ શાળાઓના વિદ્યાર્થીઓએ ભાગ લીધો હતો. STEM મોડેલ મેકિંગ સ્પર્ધામાં, 22 ટીમો (ટીમ દીઠ બે વિદ્યાર્થીઓ)એ ભાગ લીધો હતો અને તેમના STEM મોડલ્સ રજૂ કર્યા હતા. વક્તૃત્વ સ્પર્ધામાં કુલ 41 વિદ્યાર્થીઓએ ભાગ લીધો હતો.
આ વર્ષે, પુરસ્કારો ત્રણ કેટેગરીમાં આપવામાં આવ્યા હતા. સિનિયર લોરિએટ (નોમિની) 25 વર્ષ અને તેથી વધુ ઉંમરના), યંગ લોરિએટ (19 અને 24 વર્ષની વચ્ચેના નામાંકિત), જુનિયર લોરિએટ (14 અને 18 વર્ષની વચ્ચેના નામાંકિત).
10 વિજેતાઓ અને તેમના માર્ગદર્શકોને કાર્યક્રમમાં પુરસ્કૃત કરવામાં આવ્યા હતા. વિજેતાઓને પ્રશસ્તિપત્રો, ટ્રોફી અને શિષ્યવૃત્તિ આપવામાં આવ્યા હતા. આ સિવાય બે સ્પર્ધાના વિજેતાઓને પ્રમાણપત્રો, ટ્રોફી અને મેડલ પણ આપવામાં આવ્યા હતા.
