રાજકોટ: લોકસભા ચૂંટણી નજીક આવતાની સાથે રાજકોટના રાજકારણનો પારો ઉપર ચડી રહ્યો છે. ચૂંટણી પ્રચારને લઈ નેતાઓ એક બીજ પર વાણી વિલાસ કરતા હોય છે. ત્યારે નેતાઓની જીભ લપસી હોવાના ઘણા કિસ્સા સામે આવતા હોય છે. જેમાં રાજકોટ નેતાઓના વાણી વિલાસની ચર્ચામાં રહેતી બેઠક બની ચૂકી છે. જ્યાં શરૂઆત ભાજપ ઉમેદવારથી થતી. રાજકોટ ભાજપ ઉમેદવાર બાદ કોંગ્રેસના પૂર્વ ધારાસભ્ય બાદ હવે રાજકોટ બેઠકના કોંગ્રેસ ઉમેદવાદના વાણી વિલાસ પર વિવાદના વંટોળ ઊભા થયા છે.

રાજકોટનાં કોંગ્રેસ ઉમેદવાર પરેશ ધાનાણી સામે ચૂંટણી પંચમાં ફરિયાદ કરવામાં આવી છે. જેમાં થોડા સમય પહેલા ક્ષત્રિયો અને પટેલોને હરખપદુડા કહેવા બદલ ભાજપે ફરિયાદ કરી હતી. કોંગ્રેસ ઉમેદવાર પરેશ ધાનાણીનો વીડિયો વાયરલ થયો હતો. ચૂંટણી વિભાગનાં રિટર્નિગ ઓફીસરે આ સમગ્ર બાબતે તપાસ શરૂ કરી છે.

પરેશ ધાનાણીનું નિવેદન

રાજકોટ લોકસભાનાં ઉમેદવાર પરેશ ધાનાણીએ કોંગ્રેસની સભામાં બોલ્યા કે “1995માં આપણે 18 વર્ણ એક થઇ ભ્રષ્ટાચાર નાબુદ કરવા ભાજપનું બી વાવ્યું. બધાયે લોહી પરસેવાના ટીપે સિંચીને વટવૃક્ષ બનાવ્યું. અને એમાં અમે પટેલીયાઓ અને બાપુ બેય હરખપદુડા. ભાજપના બીને દરરોજ ઉઠીને 10 ડોલ પાણી પાયું. કે આ જલ્દી ઝાડ મોટું થાય અને ભરઉનાળે છાંયો મળશે. 2015માં અમારે અખતરો કરવાનો થયો ને ત્યારે ખબર પડી કે વાંહા ફાટી ગ્યા. આ જ ભાજપના નેતાઓ, એની સરકાર, એની સૂચનાથી, એની પોલીસે અમારી મા, બેન, દીકરીઓને મારી મારીને લોટ બાંધી દીધો. એના શીયળની લાજ બચાવવા માટે બોર-બોર જેવડા આંસુ પડે..એના આંસુડા એના અહંકારને ઓગાળી ન શક્યા…હું તે દિવસે કહેતો હતો વારા ફરતી વારો અને મેં પછી ગારો. કોઇ બાકી રહ્યું છે ખરા?” નિવેદના બાદ ક્ષત્રિય સમાજ અને પટેલ સમાજમાં રોષનો માહોલ જોવા મળ્યો.

રાજકોટ બેઠક અવર નવાર નેતાઓના વાણી વિલાસથી ચર્ચીત રહ્યું છે ત્યારે રાજકોટ બેઠક પરના આચાર સંહિતાના ભંગ સામે નોંધાયેલી ફરિયાદની વાત કરીએ તો, રાજકોટમાં આચારસંહિતાના ભંગની કુલ 305 ફરિયાદ કરવામાં આવી છે. જેમાં સૌથી વધુ રાજકોટ પશ્ચિમ વિધાનસભામાં 132 ફરિયાદ નોંધાય છે.

લોકસભા ચૂંટણીને ચાર દિવસ બાકી છે. તમામ પાર્ટીઓ ચૂંટણી પ્રચાર તેજી કર્યો છે. ફરી એક વખત ચૂંટણી ઢંઢેરામાં રાજકોટના નેતા ભાન ભૂલ્યા છે. જ્યાં એક બાજુ રાજકોટના ભાજપ ઉમેદવાર પરશોત્તમ રૂપાલાના નિવેદનથી રાજોકટ રાજકારણમાં ગરમાયેલો છે. ત્યારે ચૂંટણી પ્રચાર વખતે કોંગ્રેસના પૂર્વ ધારાસભ્યની જીભ લપસી હતી. ઈન્દ્રનીલ રાજ્યગરુએ રાહુલ ગાંધીની રાષ્ટ્રપિતા મહાત્મા ગાંધીજી સાથે સરખામણી કરીને તેમજ અપમાનજનક નિવેદન આપ્યું છે.

રાજકોટ બેઠક પરના કોંગ્રેસના ઉમેદવાર પરેશ ધાનાણીની પ્રચાર સભા હેદર ચોકમાં યોજાઈ હતી. આ દરમિયાન ઈન્દ્રનીલ રાજ્યગુરુએ રાષ્ટ્રપિતા મહાત્મા ગાંધીજી પર અપમાનજનક નિવેદન આપ્યું હતું.  પૂર્વ ધારાસભ્યના નિવેદનનો વીડિયો સોશિયલ મીડિયા પર વાયરલ થઈ હતો. રાજ્યગુરુએ મંચ પરથી બોલ્યા હતા કે ‘આવતા દિવસોમાં મારા શબ્દો લખવા હોય તો લખી લેજો, આ દેશમાં બીજો ગાંધી પાકશે તો એ રાહુલ ગાંધી હશે.’ પૂર્વ ધારાસભ્યએ ધુમાં કહ્યું હતું કે ‘રાહુલ ગાંધી તો સંપુર્ણપણે નિખાલસ અને સાચો માણસ છે, કે જેને પપ્પુ ઠેરવવાનો પ્રયત્ન કરાયો અને તેના માટે અબજો કરોડો રૂપિયા વાપર્યા તેમ છતાં દેશ આજે સ્વીકારે છે કે આ (રાહુલ ગાંધી) માણસ બરાબર છે.’

ઈન્દ્રનીલ રાજ્યગુરૂની સ્પષ્ટતા

કોંગ્રેસના પૂર્વ ધારાસભ્યએ નિવેદના બાદ સ્પષ્ટતા આપી હતી. નિવેદન પર સ્પષ્ટતા આપતા કહ્યું કે ‘મે જે વાત કરી છે તે ઈતિહાસમાં લખાયેલી વાત છે. ગાંધીજીએ તેમની કુશળતા દેશને અર્પણ કરી,રાહુલ ગાંધી એ બીજા ગાંધીજી છે, ગાંધીજીને બદનામ કરનારા ગાંધીજીની ચિંતા કરે છે, રાહુલ ગાંધી મજબુતાઈ અને નિષ્ઠાથી લડવા નીકળ્યા છે. ભાજપ રાહુલ ગાંધીને બદનામ કરી રહી છે, રાહુલ ગાંધીમાં ગાંધીજી જેવી ચતુરાઈ અને કુશળતા છે. ગોડસેની પુજા કરનારા ગાંધીજીની ચિંતા કરે તે મને ગમ્યુ, રાહુલ ગાંધી દ્રઢતા, નિષ્ઠા અને સત્યાગ્રહ રાખે છે,મે ઈતિહાસને વાગોળ્યો છે.’