વકફ (સુધારા) અધિનિયમ-2025 આજથી અમલમાં આવશે. લઘુમતી બાબતોના મંત્રાલયે આ અંગે એક સૂચના જાહેર કરી છે. મંત્રાલયે જણાવ્યું હતું કે વકફ (સુધારા) અધિનિયમ (2025નો 14) ની કલમ 1 ની પેટા-કલમ (2) દ્વારા આપવામાં આવેલી સત્તાઓનો ઉપયોગ કરીને કેન્દ્ર સરકાર 8 એપ્રિલ, 2025 થી કાયદાની જોગવાઈઓ લાગુ કરી રહી છે. તમને જણાવી દઈએ કે આ બિલ વિપક્ષના વિરોધ અને હોબાળા વચ્ચે સંસદના બંને ગૃહો દ્વારા પસાર કરવામાં આવ્યું હતું. રાજ્યસભામાં તેના પક્ષમાં 128 અને વિરોધમાં 95 મત પડ્યા. લોકસભામાં તેના પક્ષમાં 288 અને તેના વિરોધમાં 232 મત પડ્યા. બંને ગૃહોમાં વિપક્ષી પક્ષોએ તેનો વિરોધ કર્યો હતો. વિપક્ષી પાર્ટીઓએ તેને ગેરબંધારણીય ગણાવ્યું હતું.
બિલ અંગે કેન્દ્ર સરકારનો દાવો
વકફ (સુધારા) અધિનિયમ-2025 અંગે, કેન્દ્ર સરકારનો દાવો છે કે તે વકફ વહીવટમાં પારદર્શિતા, જવાબદારી અને સમાવેશકતાને પ્રોત્સાહન આપશે. જે ગરીબ મુસ્લિમો તેમના અધિકારોથી વંચિત હતા તેમને હવે તેમના અધિકારો મળશે. દેશમાં મુસ્લિમોની સામાજિક-આર્થિક સ્થિતિમાં સુધારો લાવવાની દિશામાં આ એક મહત્વપૂર્ણ પગલું છે.
મુખ્ય જોગવાઈઓ શું છે?
વક્ફ બોર્ડનું માળખું: બોર્ડમાં ઇસ્લામના તમામ વિચારધારાઓનું પ્રતિનિધિત્વ કરવામાં આવશે. સેન્ટ્રલ વક્ફ કાઉન્સિલમાં 22 સભ્યો હશે, જેમાંથી ચારથી વધુ બિન-મુસ્લિમ નહીં હોય.
વકફ મિલકતો પર નિયંત્રણ: વકફ બોર્ડની દેખરેખ રાખવા અને મિલકતોનું યોગ્ય સંચાલન સુનિશ્ચિત કરવા માટે ચેરિટી કમિશનરની નિમણૂક કરવાનો પ્રસ્તાવ છે.
વિધવાઓ, છૂટાછેડા લીધેલી મહિલાઓ અને અનાથોના અધિકારોનું રક્ષણ: કોઈપણ વ્યક્તિ પોતાની મિલકતને વકફ તરીકે જાહેર કરી શકે છે પરંતુ વિધવાઓ, છૂટાછેડા લીધેલી મહિલાઓ અને અનાથોની માલિકીની મિલકતોને વકફ તરીકે જાહેર કરી શકાતી નથી.
વિવાદ નિરાકરણ માટે ટ્રિબ્યુનલ: દેશભરમાં વકફ સંબંધિત 31,000 થી વધુ કેસ પેન્ડિંગ હોવાથી, વકફ ટ્રિબ્યુનલને મજબૂત બનાવવામાં આવ્યા છે. અસંતુષ્ટ પક્ષ સિવિલ કોર્ટમાં જઈ શકે તે માટે અપીલની જોગવાઈ પણ ઉમેરવામાં આવી છે.
રાષ્ટ્રીય સંપત્તિ અને સ્મારકોનું રક્ષણ: ભારતીય પુરાતત્વ સર્વેક્ષણ હેઠળની મિલકતોને વકફ તરીકે જાહેર કરી શકાતી નથી.
