પોર્ટ ઓફ સ્પેનઃ અહીં રમાતી બીજી અને શ્રેણીની આખરી ટેસ્ટ મેચનો આજે પાંચમો અને આખરી દિવસ છે. યજમાન વેસ્ટ ઈન્ડિઝને આ મેચ જીતીને શ્રેણી 1-1થી કરવા માટે 365 રનનો ટાર્ગેટ આપવામાં આવ્યો છે. ગઈ કાલે ચોથા દિવસની રમતને અંતે ગૃહ ટીમે તેના બીજા દાવમાં બે વિકેટે 76 રન કર્યા હતા. કેપ્ટન અને ઓપનર ક્રેગ બેથવેટ 28 રન કરીને અને કર્ક મેકેન્ઝી ઝીરો પર આઉટ થયો હતો. બંને વિકેટ ઓફ્ફ સ્પિનર રવિચંદ્રન અશ્વિને લીધી હતી. તેજનારાયણ ચંદ્રપોલ 24 અને જર્મેન બ્લેકવૂડ 20 રન સાથે દાવમાં હતો. મેચ જીતવા વેસ્ટ ઈન્ડિઝને હજી 289 રન કરવાની જરૂર છે.
(તસવીર સૌજન્યઃ આઈસીસી ટ્વિટર)
ભારતે પહેલા દાવમાં 438 રન કર્યા હતા. તેના જવાબમાં વેસ્ટ ઈન્ડિઝ ટીમ તેના પહેલા દાવમાં 255 રનમાં ઓલઆઉટ થઈ ગઈ હતી. ફાસ્ટ બોલર મોહમ્મદ સિરાજે 60 રનમાં પાંચ વિકેટ લઈને તરખાટ મચાવ્યો હતો. કેરેબિયન કેપ્ટન બ્રેથવેટ 75 રન કરીને ટીમનો ટોપ સ્કોરર રહ્યો હતો. ભારતે 183 રનની લીડ સાથે પોતાનો બીજો દાવ શરૂ કર્યો હતો અને 24 ઓવરમાં બે વિકેટના ભોગે 181 રન કરીને દાવ ડિકલેર કરી દીધો હતો. યશસ્વી જયસ્વાલ (38) અને કેપ્ટન રોહિત શર્મા (57)એ 98 રનની ભાગીદારી કરી હતી. શુભમન ગિલ 29 અને વિકેટકીપર ઈશાન કિશન 34 બોલમાં 52 રન કરીને નોટઆઉટ રહ્યો હતો.
