પૂર્વ કોંગ્રેસ અધ્યક્ષ અને વરિષ્ઠ નેતા સોનિયા ગાંધીને દિલ્હીની સર ગંગારામ હોસ્પિટલમાં દાખલ કરવામાં આવ્યા છે. હોસ્પિટલના સૂત્રોના જણાવ્યા અનુસાર, પેટ સંબંધિત સમસ્યાઓના કારણે રવિવારે રાત્રે 9:00 વાગ્યાની આસપાસ તેમને ગેસ્ટ્રો વિભાગમાં દાખલ કરવામાં આવ્યા છે. તેમની તબિયત હાલમાં સ્થિર છે અને તેઓ નિરીક્ષણ હેઠળ છે. સૂત્રોના જણાવ્યા અનુસાર, ડોકટરોની એક ટીમ તેમની તબિયત પર નજીકથી નજર રાખી રહી છે. જોકે, હોસ્પિટલ દ્વારા હજુ સુધી કોઈ સત્તાવાર મેડિકલ બુલેટિન જારી કરવામાં આવ્યું નથી.
અગાઉ 7 જૂનના રોજ, તેમને નિયમિત તબીબી તપાસ માટે શિમલાની ઇન્દિરા ગાંધી મેડિકલ કોલેજ અને હોસ્પિટલમાં દાખલ કરવામાં આવ્યા હતા. વરિષ્ઠ કોંગ્રેસ નેતાને બાદમાં તેમની તબીબી તપાસ બાદ રજા આપવામાં આવી હતી. પાર્ટીના એક નેતાએ કહ્યું હતું કે તેમને મોડી બપોરે શિમલાના છારાબ્રા સ્થિત તેમના ખાનગી નિવાસસ્થાનેથી હોસ્પિટલમાં લઈ જવામાં આવ્યા હતા. IGMCના એક ડૉક્ટરે કહ્યું હતું કે તેમનું બ્લડ પ્રેશર સામાન્ય કરતાં થોડું વધારે હતું પરંતુ તેમણે પુષ્ટિ આપી હતી કે તેઓ સામાન્ય અને સ્થિર હતા. તાજેતરમાં, તેમણે શિમલાની એક હોસ્પિટલમાં નિયમિત તપાસ કરાવી હતી.
