રશિયા અને યુક્રેન વચ્ચે યુદ્ધ ચાલુ છે. તાજેતરના દિવસોમાં યુક્રેન તરફથી રશિયા પર ફરી ઘાતક હુમલાઓ કરવામાં આવ્યાં અને રશિયાએ જવાબી કાર્યવાહી કરી છે. સોમવારે રશિયાએ વહેલી સવારે ડ્રોન અને મિસાઈલ વડે મોટા પાયે યુક્રેન પર હુમલો કર્યો.
રશિયાના આ હુમલામાં યુક્રેનના ઘણા વિસ્તારોને નિશાન બનાવવામાં આવ્યા છે. આ જાણકારી યુક્રેનિયન એરફોર્સ દ્વારા આપવામાં આવી છે. રશિયન બાજુથી હુમલો મધ્યરાત્રિની આસપાસ શરૂ થયો હતો અને હજુ પણ ચાલુ છે.
છેલ્લા કેટલાક સપ્તાહમાં રશિયા તરફથી આ સૌથી મોટો હુમલો માનવામાં આવે છે. રશિયા દ્વારા કરવામાં આવેલા હુમલાનો હેતુ યુક્રેનમાં એનર્જી ઈન્ફ્રાસ્ટ્રક્ચરને નિશાન બનાવવાનો હતો. યુક્રેનિયન એરફોર્સના જણાવ્યા અનુસાર, રશિયન ડ્રોનના ઘણા જૂથો દેશના પૂર્વ, ઉત્તર, દક્ષિણ અને મધ્ય વિસ્તારો તરફ આગળ વધી રહ્યા હતા, ત્યારબાદ ઘણી ક્રૂઝ અને બેલિસ્ટિક મિસાઇલો પણ છોડવામાં આવી હતી. અધિકારીઓના જણાવ્યા અનુસાર રાજધાની કિવમાં વિસ્ફોટના અવાજ સંભળાયા હતા અને શહેરના કેટલાક વિસ્તારોમાં વીજ પુરવઠો ખોરવાઈ ગયો હતો.
ઉલ્લેખનીય છે કે યુક્રેને રશિયાના સારાટોવમાં 38 માળની ઈમારત પર ડ્રોન વડે હુમલો કર્યો છે. જે ઈમારત પર હુમલો થયો તે શહેરની સૌથી ઊંચી ઈમારત છે. યુક્રેનના આ હુમલા બાદ હંગામો મચી ગયો હતો. રશિયાના સંરક્ષણ મંત્રાલયે કહ્યું કે તેની હવાઈ સંરક્ષણ પ્રણાલીએ સારાટોવ ક્ષેત્રમાં નવ ડ્રોનનો નાશ કર્યો છે. યુક્રેનમાં ડ્રોન હુમલા વચ્ચે સારાટોવ એરપોર્ટ પર ફ્લાઈટ્સ પર પ્રતિબંધ લગાવી દેવામાં આવ્યો છે.
