અમદાવાદ: ગુજરાતમાં પ્રાકૃતિક ખેતીને પ્રોત્સાહન આપવા અને નાગરિકો સુધી શુદ્ધ, રસાયણમુક્ત ખોરાક પહોંચાડવાના હેતુથી મહત્વપૂર્ણ પહેલ કરવામાં આવી છે. ઊર્જા મંત્રી અને જિલ્લાના પ્રભારી મંત્રી ઋષિકેશ પટેલના હસ્તે પ્રહલાદનગર સ્થિત મ્યુનિસિપલ શાક માર્કેટ ખાતે ‘પ્રાકૃતિક કૃષિ વેચાણ કેન્દ્ર’નું ભવ્ય લોકાર્પણ કરવામાં આવ્યું હતું.
આ કાર્યક્રમનું આયોજન ગુજરાત પ્રાકૃતિક કૃષિ વિકાસ બોર્ડ તથા આત્મા (ATMA) સંસ્થાના સંયુક્ત ઉપક્રમે કરવામાં આવ્યું હતું. આ પ્રસંગે વેજલપુરના ધારાસભ્ય અમિતભાઈ ઠાકર, આત્માના ડાયરેક્ટર કે.કે. પટેલ તેમજ સ્થાનિક જનપ્રતિનિધિઓ અને અધિકારીઓ ઉપસ્થિત રહ્યા હતા.
-
એકસાથે ૭ કેન્દ્રોનો પ્રારંભ: શહેર અને જિલ્લામાં કુલ સાત સ્થળોએ પ્રાકૃતિક કૃષિ વેચાણ કેન્દ્રો ખુલ્લાં મૂકાયાં. જેમાં શહેરમાં ૨ અને તાલુકા કક્ષાએ (ધોળકા, બાવળા, માંડલ, વિરમગામ અને સાણંદ) ૧-૧ કેન્દ્રનો સમાવેશ થાય છે.
-
રાજ્યવ્યાપી ઝુંબેશ: રાજ્યભરમાં એક જ દિવસે કુલ ૩૪ અલગ-અલગ સ્થળોએ આ પ્રકારના આયોજનો કરવામાં આવ્યા છે.
-
સ્ટોલ મુલાકાત અને સંવાદ: પ્રભારી મંત્રી સહિતના મહાનુભાવોએ વિવિધ સ્ટોલની મુલાકાત લઈ ખેડૂતો સાથે સીધો સંવાદ સાધ્યો હતો અને પ્રાકૃતિક ખાદ્ય સામગ્રી અંગે જાણકારી મેળવી હતી.
આ પ્રસંગે મંત્રી ઋષિકેશ પટેલે જણાવ્યું હતું કે, “આજના સમયમાં વધતી જતી બીમારીઓ સામે આવનારી પેઢી અને પોતાના સ્વાસ્થ્યને બચાવવા માટે પ્રાકૃતિક ખેતી એ સમયની તાતી જરૂરિયાત છે.” તેમણે ઉમેર્યું કે રાજ્યપાલ આચાર્ય દેવવ્રતજીના નેતૃત્વમાં રાજ્યમાં પ્રાકૃતિક ખેતીનું ચળવળ ચાલી રહ્યું છે. રાજ્ય સરકાર પ્રાકૃતિક ખેતી કરતા ખેડૂતોને તેમના ઉત્પાદનોના યોગ્ય ભાવ અને બજાર વ્યવસ્થા પૂરી પાડવા માટે કટિબદ્ધ છે.
આ પહેલથી ખેડૂતોની પ્રાકૃતિક પેદાશો સીધી શહેરી ગ્રાહકો સુધી પહોંચશે અને સમાજમાં સ્વાસ્થ્યપ્રદ આહાર પ્રત્યે જાગૃતિ વધશે.
