રાષ્ટ્રપતિ દ્રૌપદી મુર્મુએ વકફ (સુધારા) બિલને મંજૂરી આપી દીધી છે, આ સાથે વકફ સુધારા બિલ હવે કાયદો બની ગયો છે. અગાઉ, વકફ (સુધારા) બિલને લોકસભા અને રાજ્યસભાએ ભારે ચર્ચા બાદ પસાર કર્યું હતું. જ્યારે કોંગ્રેસ, AIMIM અને આમ આદમી પાર્ટી (AAP) દ્વારા અલગ-અલગ અરજીઓ સાથે નવા કાયદાને સુપ્રીમ કોર્ટમાં પડકારવામાં આવ્યો છે.
હવે નવો વકફ કાયદો આખા દેશમાં લાગુ થશે
નવા કાયદાનો ઉદ્દેશ્ય ભેદભાવ, વકફ મિલકતોનો દુરુપયોગ અને વકફ મિલકતો પર અતિક્રમણ અટકાવવાનો છે. શાસક રાષ્ટ્રીય લોકશાહી જોડાણ (NDA) સરકારે કહ્યું છે કે આ કાયદો મુસ્લિમ વિરોધી નથી. રાષ્ટ્રપતિ મુર્મુના હસ્તાક્ષર પછી વકફ (સુધારા) બિલ કાયદો બની ગયો છે. હવે નવો વકફ કાયદો સમગ્ર દેશમાં લાગુ કરવામાં આવશે.
સંયુક્ત સમિતિના અહેવાલ બાદ, વકફ (સુધારા) બિલ- 2025 લોકસભા અને રાજ્યસભામાં પસાર કરવામાં આવ્યું. આ બિલનો ઉદ્દેશ્ય વકફ મિલકતોના સંચાલનમાં સુધારો કરવાનો, વકફ મિલકતોના સંચાલન સાથે સંબંધિત હિસ્સેદારોના સશક્તિકરણ અને સર્વેક્ષણ, નોંધણી અને કેસોના નિકાલની પ્રક્રિયામાં સુધારો કરવાનો છે. આ ઉપરાંત, મુસ્લિમ વકફ એક્ટ-૧૯૨૩ પણ રદ કરવામાં આવ્યો છે.
