કેન્દ્રીય મંત્રીમંડળમાં મોટા ફેરબદલની ચર્ચા તેજ: PM નરેન્દ્ર મોદી સોમવારે યોજશે મંત્રીઓની હાઈ-લેવલ રિવ્યુ મીટિંગ
કેન્દ્ર સરકારમાં મંત્રીઓના કામકાજ અને વિવિધ મંત્રાલયોની કામગીરીની સમીક્ષા કરવા માટે સોમવારે સાંજે વડાપ્રધાન નરેન્દ્ર મોદીની અધ્યક્ષતામાં એક ઉચ્ચ સ્તરીય બેઠક યોજાવા જઈ રહી છે. આ બેઠકમાં મંત્રીઓના પર્ફોર્મન્સ અને સરકારી યોજનાઓના અમલીકરણ અંગે વિગતવાર ચર્ચા કરવામાં આવશે. દિલ્હીના રાજકીય વર્તુળોમાં આ બેઠકને આગામી દિવસોમાં થનારા સંભવિત કેબિનેટ વિસ્તરણ અને ફેરબદલ સાથે જોડીને જોવામાં આવી રહી છે.
જનકલ્યાણ અને સામાજિક ન્યાય મંત્રાલયો પર વિશેષ ફોકસ
મળતી માહિતી મુજબ, સોમવારે યોજનારી આ બેઠકમાં ખાસ કરીને શિક્ષણ મંત્રાલય, કૃષિ મંત્રાલય તેમજ સામાજિક ન્યાય અને આધિકારિતા મંત્રાલયની કામગીરીનો હિસાબ લેવામાં આવશે. આ માટે સામાજિક કલ્યાણ અને જનકલ્યાણ સાથે સંકળાયેલા મંત્રાલયોના રાજ્યમંત્રીઓ અને સ્વતંત્ર પ્રભારી રાજ્યમંત્રીઓને વિશેષ રૂપે અમંત્રિત કરવામાં આવ્યા છે. બેઠકમાં એ ચકાસવામાં આવશે કે સરકારી યોજનાઓ ધરાતળ પર કેટલી ઝડપથી પહોંચી છે અને મંત્રીઓએ પોતાની જવાબદારીઓ કેટલી સક્ષમતાથી નિભાવી છે.
તબક્કાવાર યોજાશે સમીક્ષા બેઠકો
સૂત્રોના જણાવ્યા અનુસાર, સરકાર આવનારા દિવસોમાં અન્ય મંત્રાલયોના મંત્રીઓ અને રાજ્યમંત્રીઓના જૂથો સાથે પણ આવી જ સિલસિલાબદ્ધ બેઠકો યોજશે. આ તબક્કાવાર સમીક્ષાનો મુખ્ય ઉદ્દેશ્ય દરેક મંત્રાલયની કાર્યશૈલી, પડકારો અને સિદ્ધિઓને તટસ્થ રીતે સમજવાનો છે. મંત્રીઓની જવાબદારી નક્કી કરવાના હેતુથી યોજાઈ રહેલી આ બેઠકો આગામી વહીવટી અને રાજકીય નિર્ણયો માટે અત્યંત નિર્ણાયક સાબિત થઈ શકે છે.
કેબિનેટ ફેરબદલની શક્યતાઓ તેજ
સરકાર દ્વારા મંત્રીઓના પરફોર્મન્સનું આ રીતે આંકલન કરવામાં આવી રહ્યું હોવાથી રાજકીય ગરમાવો વધી ગયો છે. જોકે, કેબિનેટમાં ફેરબદલ અંગે હજુ સુધી કોઈ સત્તાવાર જાહેરાત કરવામાં આવી નથી, પરંતુ આ સમીક્ષા બેઠકોના આધારે આગામી દિવસોમાં મંત્રીમંડળમાં ફેરફારનું ચિત્ર સ્પષ્ટ થવાની પૂરી શક્યતા છે.
