પાકિસ્તાને જમ્મુ અને પઠાણકોટ પર કર્યો મિસાઈલથી હુમલો

ભારત અને પાકિસ્તાન વચ્ચે તણાવ ચરમસીમાએ પહોંચી ગયો છે. ગુરુવારે રાત્રે પાકિસ્તાને જમ્મુ અને પઠાણકોટ સહિત અનેક શહેરો પર મિસાઇલોથી હુમલો કર્યો. જોકે, ભારતની વાયુ સંરક્ષણ પ્રણાલી S-400 એ મિસાઇલોને હવામાં જ તોડી પાડી. પાકિસ્તાને જમ્મુ, પઠાણકોટ, શાહપુર, માધોપુર, ફિરોઝપુર, જેસલમેરમાં મિસાઈલ અને ડ્રોન છોડ્યા છે. હુમલો થતાં જ જમ્મુ સહિત તમામ વિસ્તારોમાં સાયરન વાગવા લાગ્યા, જેના કારણે લોકો ગભરાઈ ગયા. સમગ્ર વિસ્તાર તાત્કાલિક અંધારપટમાં ડૂબી ગયો.

હુમલા બાદ, ભારતીય લડાકુ વિમાનોએ જમ્મુ એરપોર્ટ પરથી ઉડાન ભરી છે. જમ્મુ યુનિવર્સિટી નજીક બે ડ્રોન તોડી પાડવામાં આવ્યા છે. ડ્રોન વિરોધી પ્રણાલીઓએ આરએસ પુરા, અર્નિયા, સાંબામાં પાકિસ્તાની મિસાઇલોને પણ તોડી પાડી છે. આ ઉપરાંત ભારતે પઠાણકોટ એરબેઝ પર ડ્રોન હુમલાને પણ નિષ્ફળ બનાવ્યો છે. અહીં પણ બ્લેકઆઉટ થયું છે.

વિસ્ફોટનો અવાજ સાંભળતાની સાથે જ દુકાનદારો અને લોકો પોતાના ઘરો તરફ દોડતા જોવા મળ્યા. રોઇટર્સના અહેવાલ મુજબ, વિસ્ફોટ પહેલા કેટલાક લોકોએ આકાશમાં લાલ લાઇટ અને અસ્ત્રો પણ જોયા હતા. એક X યુઝરે જમ્મુમાં વીજળી ગુલ થવાના ફોટા અને વીડિયો શેર કર્યા અને લખ્યું, “જમ્મુમાં અમારા ઘરો ઉપર મિસાઇલો ઉડી રહી છે. આ કોઈ અફવા નથી, હું તેને જાતે જોઈ રહ્યો છું અને રેકોર્ડ કરી રહ્યો છું.”

અગાઉ, ભારતે ઉત્તર અને પશ્ચિમ પ્રદેશોમાં 15 સ્થળોએ ડ્રોન અને મિસાઇલોથી લશ્કરી સ્થળો પર હુમલો કરવાના પાકિસ્તાનના પ્રયાસોને નિષ્ફળ બનાવ્યા હતા અને લાહોરમાં પાકિસ્તાની હવાઈ સંરક્ષણ પ્રણાલીનો નાશ કર્યો હતો. બુધવારે ભારતીય સશસ્ત્ર દળોએ ‘ઓપરેશન સિંદૂર’ હેઠળ પાકિસ્તાન અધિકૃત કાશ્મીર (PoK) અને પાકિસ્તાનમાં નવ આતંકવાદી ઠેકાણાઓ પર ચોકસાઇ મિસાઇલ હુમલા કર્યા બાદ પાકિસ્તાન દ્વારા આ પ્રયાસો કરવામાં આવ્યા છે. સંરક્ષણ મંત્રાલયે પુનરોચ્ચાર કર્યો કે ભારતમાં લશ્કરી સ્થળો પરના કોઈપણ હુમલાનો “યોગ્ય જવાબ” મળશે. વિદેશ સચિવ વિક્રમ મિશ્રીએ જણાવ્યું હતું કે તણાવ ઓછો કરવાનો વિકલ્પ પાકિસ્તાન પાસે છે કારણ કે તેણે પહેલગામ આતંકવાદી હુમલાથી પરિસ્થિતિ વધુ ખરાબ કરી હતી અને ભારતે તેનો જવાબ ફક્ત ‘ઓપરેશન સિંદૂર’ દ્વારા આપ્યો હતો.

RELATED ARTICLESMORE FROM AUTHOR