થાણેઃ મુંબઈની પડોશના થાણે શહેરની પોલીસે ગઈ કાલે નવા વર્ષની ઉજવણી દરમિયાન દારૂનો નશો કરીને કાર-ટ્રક સહિત ચાર-પૈડાંવાળા વાહનો હંકારતા 416 ગુનેગારો સામે ફરિયાદ નોંધી જરૂરી કાર્યવાહી કરી હતી. ટ્રાફિક પોલીસે આ ઉપરાંત ડ્રાઈવરોને દારૂનો નશો કરીને વાહન હંકારવાની છૂટ આપવા બદલ એમની સાથે પ્રવાસ કરી રહેલા બીજા 200 જણ સામે પણ કાર્યવાહી કરી છે.
થાણે પોલીસે આ તમામ લોકો સામે ભારતીય ફોજદારી કાયદા (આઈપીસી) અને મોટર વેહિકલ્સ એક્ટની વિવિધ કલમો હેઠળ ફરિયાદ નોંધી છે. પોલીસે આ ઉપરાંત દારૂનો નશો કરીને સ્કૂટર-મોટરબાઈક ચલાવનાર 400થી વધારે લોકો સામે પણ દંડાત્મક પગલાં લીધા છે.
