ગુજરાતમાં ચોમાસાનો નવો રાઉન્ડ પૂર્ણ ક્ષમતા સાથે શરૂ થઈ ગયો છે. રાજ્યના સ્ટેટ ઈમરજન્સી ઓપરેશન સેન્ટર (SEOC) દ્વારા જાહેર કરવામાં આવેલા તાજા આંકડા મુજબ, સોમવાર, 14 સપ્ટેમ્બરના રોજ સવારે 6 વાગ્યાથી સાંજે 6 વાગ્યા સુધીના માત્ર 12 કલાકમાં જ રાજ્યના તમામ 250 તાલુકાઓમાં સાર્વત્રિક વરસાદ નોંધાયો છે. મધ્ય ગુજરાત, સૌરાષ્ટ્ર અને અમદાવાદ જિલ્લામાં મેઘરાજાએ ધમાકેદાર બેટિંગ કરીને જળબંબાકારની સ્થિતિ સર્જી છે.
વલ્લભીપુર અને બોરસદમાં આભ ફાટ્યું
12 કલાકના સમયગાળા દરમિયાન સૌથી વધુ વરસાદ ભાવનગરના વલ્લભીપુરમાં 5.91 ઈંચ (લગભગ 6 ઈંચ) નોંધાયો હતો. આ સિવાય આણંદના બોરસદમાં 5.51 ઈંચ વરસાદ ખાબકતાં માર્ગો અને નીચાણવાળા વિસ્તારો પાણીમાં ગરકાવ થઈ ગયા હતા.
વરસાદના મુખ્ય આંકડાઓ પર નજર કરીએ તો:
વલ્લભીપુર: 5.91 ઈંચ
બોરસદ: 5.51 ઈંચ
કરજણ અને કડી: 4.17 ઈંચ
ધોળકા: 4.13 ઈંચ
ભરૂચ: 3.82 ઈંચ
નડિયાદ: 3.78 ઈંચ
કોટડા સાંગાણી: 3.74 ઈંચ
જામકંડોરણા: 3.54 ઈંચ
અમદાવાદ જિલ્લામાં મેઘતાંડવ: 48 તાલુકામાં 2 ઈંચથી વધુ વરસાદ
રાજ્યના 21 તાલુકાઓમાં 3 ઈંચથી વધુ જ્યારે અમદાવાદ શહેર સહિત કુલ 48 તાલુકાઓમાં 2 ઈંચથી વધુ વરસાદ વરસ્યો છે. અમદાવાદ શહેરમાં 3.39 ઈંચ અનરાધાર વરસાદ પડ્યો હતો, જેના કારણે શહેરના અનેક અંડરપાસ અને રોડ-રસ્તાઓ પર પાણી ભરાઈ ગયા હતા. જિલ્લાના દસક્રોઈમાં 3.50 ઈંચ, સાણંદમાં 2.95 ઈંચ અને બાવળામાં 2.28 ઈંચ વરસાદ નોંધાયો છે.
તંત્ર એલર્ટ મોડ પર
સૌરાષ્ટ્રના રાજકોટ અને ભાવનગર, મધ્ય ગુજરાતના આણંદ, ખેડા અને વડોદરામાં વ્યાપક વરસાદને કારણે નદી-નાળાઓમાં નવા પાણીની ભારે આવક થઈ છે. રાજ્યભરમાં વરસાદી માહોલ હજુ પણ જામયેલો હોવાથી જળાશયોની સપાટી પર સતત નજર રાખવામાં આવી રહી છે અને સ્થાનિક વહીવટી તંત્રને સાવચેત રહેવાના આદેશ આપવામાં આવ્યા છે.
