કેનેડામાં હિંદુ મંદિર અને હિંદુ સમુદાયના લોકો પર ખાલિસ્તાનીઓએ કરેલા હુમલાની સમગ્ર વિશ્વમાં ટીકા થઈ રહી છે. હવે વિદેશ મંત્રી એસ જયશંકરે પણ આ હુમલા અંગે પોતાની પ્રતિક્રિયા આપી છે અને આ ઘટનાને ખૂબ જ ચિંતાજનક ગણાવી છે. કેનેડામાં હિન્દુ સમુદાયના લોકો પર હુમલાની આ ઘટના એવા સમયે બની છે જ્યારે ભારત અને કેનેડા વચ્ચેના સંબંધો પહેલાથી જ તંગ છે અને આ ઘટનાએ સંબંધોમાં વધુ તિરાડ પાડી છે. જોકે, આ ઘટનાને લઈને કેનેડા સરકાર દબાણમાં છે અને ખુદ પીએમ જસ્ટિન ટ્રુડોએ તેની ટીકા કરી છે.
‘કેનેડાએ પુરાવા વિના ભારત પર આરોપ મૂકવાની પેટર્ન વિકસાવી’
વિદેશ મંત્રી એસ જયશંકરે મંગળવારે કેનેડાના બ્રામ્પટનમાં હિંદુ મંદિર પર થયેલા હુમલા સામે સખત વાંધો વ્યક્ત કર્યો હતો અને કહ્યું હતું કે તે એક રીતે કેનેડામાં ઉગ્રવાદી દળોને આપવામાં આવતા ‘રાજકીય અભયારણ્ય’ તરફ ઈશારો કરે છે. કેનબેરામાં ઓસ્ટ્રેલિયાના વિદેશ મંત્રી પેની વોંગ સાથે સંયુક્ત પ્રેસ કોન્ફરન્સ દરમિયાન મીડિયાએ ભારતીય વિદેશ મંત્રી એસ જયશંકરને કેનેડામાં બનેલી ઘટના અંગે સવાલ કર્યા હતા.
આના જવાબમાં જયશંકરે કહ્યું, ‘તમે આ મામલે અમારા સત્તાવાર પ્રવક્તાનું નિવેદન અને પછી અમારા વડા પ્રધાને વ્યક્ત કરેલી ચિંતા જોઈ હશે. હું ત્રણ ટિપ્પણી કરવા માંગુ છું, એક, કેનેડાએ કોઈ ચોક્કસ માહિતી પ્રદાન કર્યા વિના આક્ષેપો કરવાની પેટર્ન વિકસાવી છે. બીજું, જ્યારે આપણે કેનેડાને જોઈએ છીએ, ત્યારે આપણા માટે એ હકીકત છે કે…અમારા રાજદ્વારીઓ પર નજર રાખવામાં આવી રહી છે જે એકદમ અસ્વીકાર્ય છે. ત્રીજું, મને લાગે છે કે આ ઘટના દર્શાવે છે કે ઉગ્રવાદી દળોને ત્યાં (કેનેડા) રાજકીય અભયારણ્ય આપવામાં આવી રહ્યું છે. વિદેશ મંત્રી 3 થી 7 નવેમ્બર દરમિયાન ઓસ્ટ્રેલિયાની સત્તાવાર મુલાકાતે છે.
વડાપ્રધાન નરેન્દ્ર મોદીએ પણ ટીકા કરી હતી
સોમવારે સોશિયલ મીડિયા પ્લેટફોર્મ X પર શેર કરેલી પોસ્ટમાં વડા પ્રધાન નરેન્દ્ર મોદીએ કેનેડાની ઘટના પર કહ્યું, ‘હું કેનેડામાં હિંદુ મંદિર પર ઇરાદાપૂર્વકના હુમલાની સખત નિંદા કરું છું. આપણા રાજદ્વારીઓને ડરાવવાના કાયર પ્રયાસો પણ એટલા જ ભયાનક છે. હિંસાના આવા કૃત્યો ભારતના સંકલ્પને ક્યારેય નબળો પાડશે નહીં. અમે અપેક્ષા રાખીએ છીએ કે કેનેડા સરકાર ન્યાય સુનિશ્ચિત કરે અને કાયદાના શાસનને જાળવી રાખે.’
