આજે 23 April ના રોજ પશ્ચિમ બંગાળ અને તમિલનાડુમાં વિધાનસભા ચૂંટણી માટે મતદાન થઈ રહ્યું છે. પશ્ચિમ બંગાળમાં 152 બેઠકો માટે CAPF ની 2407 કંપનીઓ તૈનાત કરવામાં આવી છે, જેમાં અંદાજે 2.5 લાખ જવાનો સુરક્ષા આપશે. બીજી તરફ તમિલનાડુની તમામ 234 બેઠકો પર પણ 1.47 લાખ સુરક્ષાકર્મીઓ તૈનાત છે. બંગાળમાં નંદીગ્રામ અને ભવાનીપુર જેવી બેઠકો પર હાઈ-પ્રોફાઈલ જંગ જામ્યો છે. ચૂંટણી પંચે સુરક્ષા માટે બખ્તરબંધ ગાડીઓ ઉતારી છે, જેનો ટીએમસી વિરોધ કરી રહી છે જ્યારે ભાજપ તેને જરૂરી ગણાવી રહ્યું છે.
પશ્ચિમ બંગાળમાં આજે પ્રથમ તબક્કાનું મતદાન થઈ રહ્યું છે, જે ચૂંટણીના પરિણામો માટે અત્યંત નિર્ણાયક માનવામાં આવે છે. આ તબક્કામાં દાર્જિલિંગ, કલિમપોંગ, મુર્શિદાબાદ અને માલદા જેવી મહત્વની બેઠકો પર મતદાન થઈ રહ્યું છે. ખાસ કરીને નંદીગ્રામ અને ભવાનીપુર બેઠકો પર સૌની નજર છે, જ્યાં મુખ્યમંત્રી મમતા બેનર્જી અને ભાજપના શુભેન્દુ અધિકારી વચ્ચે કાંટાની ટક્કર છે. અગાઉના વર્ષોમાં થયેલી હિંસાને જોતા ચૂંટણી પંચે આ વખતે કોઈ જોખમ લેવાનું ટાળ્યું છે. બંગાળમાં અંદાજે 3.4 કરોડ મતદારોના ભાવિનો ફેંસલો કરવા માટે 2.5 લાખ જેટલા અર્ધસૈનિક દળોના જવાનો ખડેપગે છે. એટલે કે, દર 100 થી 130 મતદારો પર એક જવાન સુરક્ષા માટે તૈનાત કરવામાં આવ્યો છે.
સુરક્ષા વ્યવસ્થાની વાત કરીએ તો, કેન્દ્રીય ગૃહ મંત્રાલય હેઠળના CRPF, BSF, CISF અને ITBP જેવા દળોની 2407 કંપનીઓ બંગાળમાં ઉતારવામાં આવી છે. રસ્તાઓ પર ફરતી CRPF ની બખ્તરબંધ ગાડીઓના વીડિયો સોશિયલ મીડિયા પર વાયરલ થઈ રહ્યા છે. આ ગાડીઓ પથ્થરમારો કે પેટ્રોલ બોમ્બ ફેંકવાની સ્થિતિમાં જવાનો માટે રક્ષણાત્મક કવચનું કામ કરે છે. ટીએમસીએ આટલી મોટી સંખ્યામાં દળોની તૈનાતી સામે સવાલ ઉઠાવ્યા છે અને તેને મતદારોને ડરાવવાનો પ્રયાસ ગણાવ્યો છે, જ્યારે ભાજપનું કહેવું છે કે ટીએમસીના ગુંડાઓથી મુક્ત અને નિષ્પક્ષ મતદાન કરાવવા માટે આ વ્યવસ્થા અનિવાર્ય છે.
તમિલનાડુમાં પણ આજે લોકશાહીનો ઉત્સવ ઉજવાઈ રહ્યો છે, જ્યાં 5.73 કરોડ મતદારો 4,618 ઉમેદવારોનું નસીબ ઈવીએમમાં કેદ કરશે. રાજ્યમાં 75,032 મતદાન મથકો બનાવવામાં આવ્યા છે, જેમાંથી 5,938 મથકોને ‘સંવેદનશીલ’ જાહેર કરવામાં આવ્યા છે. અહીં અંદાજે 1.47 લાખ સુરક્ષાકર્મીઓ ફરજ પર છે, જેમાં પોલીસ, હોમગાર્ડ અને નિવૃત્ત સૈનિકોનો પણ સમાવેશ થાય છે. તમિલનાડુમાં મુખ્ય સ્પર્ધા DMK અને AIADMK વચ્ચે છે, જેમાં એમ.કે. સ્ટાલિન જેવી મોટી હસ્તીઓની પ્રતિષ્ઠા દાવ પર છે. 514 વાહનોમાં વિશેષ દળો સતત ગશ્ત કરી રહ્યા છે જેથી કોઈ પણ અનિચ્છનીય બનાવ બને તો તુરંત કાર્યવાહી કરી શકાય.
બંગાળમાં ચૂંટણી હિંસાનો ઈતિહાસ અત્યંત ડરામણો રહ્યો છે. 2021 ની ચૂંટણી દરમિયાન અને પરિણામો બાદ થયેલી હિંસામાં અનેક લોકોએ જીવ ગુમાવ્યા હતા. આ જ કારણ છે કે આ વખતે ચૂંટણી પંચે મતદાન પૂર્ણ થયા બાદ પણ સુરક્ષા દળોની 500 કંપનીઓને આગામી 6 મહિના સુધી બંગાળમાં તૈનાત રાખવાનો નિર્ણય કર્યો છે. કોલકાતા, હાવડા અને બેરકપુર જેવા વિસ્તારોમાં સૌથી વધુ સુરક્ષા વ્યવસ્થા ગોઠવવામાં આવી છે. વેબકાસ્ટિંગ દ્વારા દરેક મતદાન મથક પર સીધી દેખરેખ રાખવામાં આવી રહી છે, જેથી કોઈ પણ ગેરરીતિની શક્યતા ન રહે.
