અમેરિકાના રાષ્ટ્રપતિ ડોનાલ્ડ ટ્રમ્પ અને ટેસ્લા કંપનીના માલિક એલોન મસ્ક વચ્ચેની મિત્રતામાં હવે તિરાડ પડી ગઈ છે. બંને વચ્ચેનો રોષ હવે જાહેર થઈ ગયો છે. હવે એલોન મસ્કને એક નવો પેંતરો સુજ્યો છે અને એક નવો રાજકીય પક્ષ શરૂ કરવાનો નિર્ણય લીધો છે.તેમણે આ વાત ત્યારે કહી છે જ્યારે અમેરિકાના રાષ્ટ્રપતિ ડોનાલ્ડ ટ્રમ્પ સાથેનો તેમનો સર્વાંગી સંઘર્ષ સામે આવ્યો છે. મસ્કની નવી પાર્ટીની ચર્ચાએ અમેરિકાના રાજકીય વર્તુળોમાં પણ હલચલ મચાવી દીધી છે. મસ્કે તેમની નવી પાર્ટીનું નામ ‘ધ અમેરિકા પાર્ટી’ રાખવાનો સંકેત આપ્યો છે, જે તેમના મતે 80 ટકા લોકોનું પ્રતિનિધિત્વ કરશે.
મસ્કે ટ્વિટ કર્યું
એલોન મસ્કે તેમના X હેન્ડલ (અગાઉના ટ્વિટર) પર એક મતદાન કર્યું હતું જેમાં તેમણે પૂછ્યું હતું કે શું અમેરિકાને એક નવા રાજકીય પક્ષની જરૂર છે. તેમના મતદાનમાં 56 લાખથી વધુ લોકોએ ભાગ લીધો હતો અને 80.4 ટકા લોકોએ કહ્યું હતું કે હા, એક નવી પાર્ટીની જરૂર છે. હવે મસ્કે મતદાનનું પરિણામ શેર કર્યું અને લખ્યું,”લોકોએ પોતાનો અભિપ્રાય આપ્યો છે. અમેરિકાને એક નવી પાર્ટીની જરૂર છે જે 80 ટકા લોકોનો અવાજ બને.” એલોન મસ્કે લોકોના મતદાનનો જવાબ ‘ધ અમેરિકા પાર્ટી’ લખીને આપ્યો.
મસ્કે ટ્રમ્પ સરકારના બિલની ટીકા કરી હતી
એલોન મસ્કે ટ્રમ્પ સરકારના ‘વન બિગ બ્યુટીફુલ બિલ’ની આકરી ટીકા કરી હતી અને તેને ‘ઘૃણાસ્પદ’ બિલ ગણાવ્યું હતું. તમને જણાવી દઈએ કે આ બિલમાં ટ્રમ્પ સરકારની ખર્ચ યોજનાનો સમાવેશ થાય છે, જેમાં $2.4 ટ્રિલિયનની ખાધ સામે આવી છે. મસ્કે તેની આકરી ટીકા કરી હતી અને પછી 30 મેના રોજ, તેમણે ટ્રમ્પ સરકારમાં પોતાના પદ પરથી, એટલે કે ડિપાર્ટમેન્ટ ઓફ ગવર્નમેન્ટ એફિશિયન્સી (DOGE) ના ચીફ પદ પરથી રાજીનામું આપ્યું હતું.
ટ્રમ્પ અને મસ્ક વચ્ચેના સંબંધોમાં કેવી રીતે તિરાડ પડી?
એલોન મસ્ક અને ડોનાલ્ડ ટ્રમ્પ વચ્ચે અજોડ મિત્રતા હતી. 2024ની ચૂંટણી દરમિયાન મસ્કે ટ્રમ્પને ટેકો આપ્યો હતો અને ટ્રમ્પના સમર્થનમાં $220 મિલિયનથી વધુની મદદ પણ કરી હતી. પરંતુ હવે પરિસ્થિતિ બદલાઈ ગઈ છે અને બંને વચ્ચેના સંબંધોમાં મોટો તિરાડ પડી ગઈ છે. ટ્રમ્પે કહ્યું છે કે તેઓ મસ્કના શબ્દોથી ‘આશ્ચર્ય’ અને ‘નિરાશ’ છે. તેણે કહ્યું,”એલન અને મારા ખૂબ સારા સંબંધો હતા. મને ખબર નથી કે અમારા સારા સંબંધો ચાલુ રહેશે કે નહીં. તેણે મારા વિશે ઘણી સારી વાતો કહી, પણ હું તેના પર ખૂબ ગુસ્સે છું. મેં તેને ખૂબ મદદ કરી.”
