GST વિભાગને દિવાળી ફળી, રાજ્યની GST આવકમાં મોટો વધારો નોંધાયો છે. રાજ્યની GSTની આવકમાં 18 ટકાનો વધારો નોંધાયો છે. જે ગત વર્ષના ઓક્ટોબર મહિનામાં થયેલી આવક કરતાં 18 ટકા વધુ છે. ઓકટોબર 2024માં રાજ્યની જીએસટી આવક 6,146 કરોડ રૂપિયા નોંધાઈ છે. ઓકટોબર 2024માં નેશનલ કક્ષાએ આવકનો ગ્રોથ 9 ટકા રહેલો છે. રાજ્યને ઓક્ટોબર 2024માં વેટ હેઠળ 2,584 કરોડ રૂપિયા, વિદ્યુત શુલ્ક હેઠળ 986 કરોડ રૂપિયા અને વ્યવસાય વેરા હેઠળ 28 કરોડ રૂપિયાની આવક થઈ છે. રાજ્યકર વિભાગને જીએસટી, વેટ, વિદ્યુત શુલ્ક અને વ્યવસાય વેરા દ્વારા કુલ 9,744 કરોડ રૂપિયાની આવક થઈ છે. નાણાકીય વર્ષ 2024-25ના પ્રથમ 7 મહિનામાં રાજ્યકર વિભાગને GST, VAT, વિદ્યુત શુલ્ક અને વ્યવસાય વેરા દ્વારા કુલ 67,981 કરોડ રૂપિયાની આવક થઈ છે.
સૂત્રો પ્રમાણે મળતી માહિતી અનુસાર ઓકટોબર મહિનામાં નવરાત્રિથી દિવાળી સુધી દેશભરમાં તહેવારોની સિઝનને કારણે લોકોએ મન મુકીને ખરીદી કરી છે. જેનો સીધો જ લાભ સરકારને થયો છે. આ મહિને સરકારના GST કલેક્શનમાં મોટો ઉછાળો નોંધાયો છે, આ આંકડો 1.87 લાખ કરોડ રૂપિયાને પાર પહોંચી ગયો છે. ઉલ્લેખનીય છે કે લોકોએ દિવાળીના તહેવારની અને સાથે જ લગ્નને લઈને પણ ધૂમ ખરીદી કરી છે, જેના કારણે સરકારી તિજોરીને પણ ફાયદો થયો અને GST કલેક્શનમાં મોટો વધારો જોવા મળ્યો છે. આપને જણાવી દઈએ કે સરકાર દર મહિનાના પ્રથમ દિવસે અગાઉના મહિનામાં GSTમાંથી સરકારી તિજોરીને કેટલી આવક થઈ તેનો હિસાબ જાહેર કરે છે. જો કે GST કલેક્શનના અંતિમ આંકડાની ગણતરી કરવામાં આવે, ત્યારે તેમાં રિફંડની પણ ગણતરી કરી લેવામાં આવે છે. ત્યારે ઓક્ટોબર 2024માં રિફંડ બાદ સરકારનું GST કલેક્શન 1.68 લાખ કરોડ રૂપિયા છે અને આ ઓક્ટોબર 2023ના નેટ GST કલેક્શન કરતાં પણ 8% વધુ છે.
