કચરાને પણ જંતુમુક્ત કરવાની પડકારરૂપ કામગીરી

અમદાવાદ: કોરોનાવાઈરસને નાથવા સમગ્ર વિશ્વ એક થઈને લડી રહ્યું છે અને ગુજરાત રાજ્ય પ્રશાસન પણ પડકારરૂપ કામગીરી કરી રહ્યું છે. આ રોગને અટકાવવા જેટલી જરૂરિયાત સોશિયલ ડિસ્ટન્સિંગ, સેનિટેશન-સ્વચ્છતાની છે એટલી જ જરૂરિયાત હોસ્પિટલમાંથી નીકળતા વેસ્ટ (કચરા)ને જંતુરહિત કરવાની પણ છે.

એશિયાની સૌથી મોટી ગણાતી અમદાવાદ સિવિલ હોસ્પિટલમાં રાજ્ય સરકારે 1200 બેડની હોસ્પિટલને ‘ડેઝિગ્નેટેડ કોવિડ હોસ્પિટલ’ જાહેર કરી છે ત્યારે આ હોસ્પિટલમાંથી નીકળતા વેસ્ટને જંતુરહિત બનાવવાની કામગીરી પણ એક પડકારરૂપ છે. અહીંથી રોજ ૮૦૦ કિલો ઘન કચરાને જંતુરહિત કરી તેનો નિકાલ કરવામાં આવે છે.

અમદાવાદ સિવિલ હોસ્પિટલમાં કોરોનાગ્રસ્ત દર્દીઓ દ્વારા વપરાયેલી વસ્તુઓથી સંક્રમણ ફેલાય નહીં તે માટે તેને સોડીયમ હાઇપોક્લોરાઇડ દ્રાવણથી જંતુમુક્ત કરી નિકાલ કરવામાં આવે છે. કોરોના વોર્ડમાં દર્દીઓના સંપર્કમાં આવતી મોટાભાગની વસ્તુઓનો નિકાલ કરવામાં આવતો હોવાથી દરરોજ અંદાજે ૮૦૦ કિલો ઘન કચરાનો નિકાલ થઈ રહ્યો છે.

સિવિલ હોસ્પિટલમાં વપરાશમાં લેવાતી રોજની ૨૫૦૦ પી.પી.ઈ. કીટ અને ૧૫૦૦ N99 માસ્કનો નિકાલ થાય છે. દર્દીઓને ભોજન અને નાસ્તા સમયે આપવામાં આવતી ડિસ્પોઝેબલ ડિશ, પાણીના ગ્લાસ ઉપરાંત ઇંજેક્શન નિડલ, કોટન અને માનવમળ જેવા બાયોમેડીકલ વેસ્ટનો પણ સમાવેશ થાય છે.

સિવિલમાં આ કામગીરી માટે એક વિશિષ્ટ ટુકડી રચવામાં આવી છે. ૩ શિફ્ટમાં તબીબી અધિકારી, પેરામેડીક્સ, સફાઇકર્તા એમ બધા મળી કુલ ૨૨૫ લોકો અહીં સેવારત છે. કોરોના વોર્ડમાં ૮ કલાકની એક શિફ્ટમાં સરેરાશ ૨૫૦ કિલો કચરો એકઠો થાય છે. અહીં ૧૨ ક્રિટિકલ વોર્ડ અને ૧૮ સ્ટેબલ પેશન્ટ વોર્ડ કાર્યરત છે.

સિવિલના તબીબી અધિકારી સંજય કાપડિયાના જણાવ્યા મુજબ કોરોનાગ્રસ્ત દર્દીઓ દ્વારા ઉત્પન્ન થયેલા ઘન અને જૈવિક કચરા થકી પણ વાયરસ ફેલાવાની શક્યતા રહેલી છે. આથી આ કચરાના યોગ્ય નિકાલ માટે સિવિલ હોસ્પિટલ દ્વારા નક્કર આયોજન કરવામાં આવ્યું છે.

સોડિયમ હાઇપોક્લોરાઇડ દ્રાવણથી ભરેલા પ્લાસ્ટિક થેલામાં કચરો ઠાલવવામાં આવે છે. આ દ્રાવણ અડધા કલાકમાં ઘન કચરાને જંતુમુક્ત બનાવે છે. કચરાના નિકાલ માટે કાર્યરત કામદારોને પણ પૂરતા રક્ષણાત્મક સાધનો પૂરા પાડવામાં આવ્યા છે.

[ અમને ફોલો કરો:    Facebook   | Twitter   | Instagram  | Telegram 

તમારા મોબાઇલમાં 9820649692 આ નંબર Chitralekha નામે સેવ કરી અમને વ્હોટસએપ પર તમારું નામ અને ઈ-મેઈલ લખીને મોકલો અને તમને મનગમતી વાંચન સામગ્રી મેળવો .]