નવી દિલ્હીઃ અર્થશાસ્ત્રીઓને આશા છે કે રિઝર્વ બેંક (RBI) વર્તમાન નાણાકીય સખતાઈના તબક્કામાં રેપો રેટમાં વધુ 50થી 75 બેસિસ પોઇન્ટનો વધારો કરી શકે છે. આ વધારા સાથે રેપો રેટ 6થી 6.25 ટકા સુધી પહોંચી શકે છે. ઓક્ટોબરમાં છૂટક ફુગાવો બે વર્ષમાં પ્રથમ વખત કેન્દ્રીય બેંકની છ ટકાની ઉપલી મર્યાદાને પાર કરી ગયો છે. RBIની છ સભ્યોની નાણાકીય નીતિ સમિતિની બેઠક 2થી 4 ડિસેમ્બર દરમિયાન યોજાવાની છે.
ગ્રાહક ભાવ સૂચકાંક (CPI) આધારિત છૂટક ફુગાવો સપ્ટેમ્બરના 5.54 ટકાથી વધીને ઓક્ટોબરમાં 6.09 ટકા થયો હતો. તેનું મુખ્ય કારણ ખાદ્ય ચીજવસ્તુઓના ભાવમાં થયેલો તીવ્ર વધારો છે. આ જ સમયગાળા દરમિયાન ખાદ્ય ફુગાવો પણ 7.74 ટકાથી વધીને 8.94 ટકા થયો હતો. ઓક્ટોબરનો આ આંકડો 2024ને આધાર વર્ષ માનીને શરૂ કરવામાં આવેલી નવી ગ્રાહક ભાવ સૂચકાંક આધારિત ફુગાવાની શ્રેણીમાં અત્યાર સુધીનો સૌથી ઊંચો સ્તર પણ છે. અર્થશાસ્ત્રીઓનું માનવું છે કે મોંઘવારીનો દર મોટા ભાગે તેની ટોચ પર પહોંચી ગયો છે અને આગામી મહિનાઓમાં તેમાં નરમાઈ આવી શકે છે. જોકે તેમને મતે ભાવનું દબાણ ઊંચું રહેવાની શક્યતા છે, જેને કારણે નાણાકીય નીતિ વધુ કડક કરવાની જરૂર પડી શકે છે. ખાદ્ય અને ઊર્જાના ઊંચા ભાવ, પ્રતિકૂળ આધાર અસર તેમ જ કૃષિ ઉત્પાદન અને અલ નિનોની આશંકાને કારણે મોંઘવારીનું ચિત્ર અનિશ્ચિત બન્યું છે. ડિસેમ્બરમાં મોર્ગન સ્ટેનલીને રેપો રેટમાં 25 બેસિસ પોઇન્ટના વધારાની અપેક્ષા છે.
ફેબ્રુઆરી અને એપ્રિલ, 2027માં પણ રેપો રેટમાં વધારો થઈ શકે છે, જેને કારણે તે વધીને 6.25 ટકા સુધી પહોંચી શકે છે. મોર્ગન સ્ટેનલીના અર્થશાસ્ત્રીઓએ એક અહેવાલમાં જણાવ્યું છે કે, ‘નાણાકીય નીતિના મોરચે વ્યાજદરમાં વધુ ત્રણ વખત 25-25 બેસિસ પોઇન્ટનો વધારો થવાની અપેક્ષા છે. આ સાથે અંતિમ રેપો રેટ 6.25 ટકા થઈ શકે છે.’ આ દરમિયાન, બાર્કલેઝનો અંદાજ છે કે અંતિમ રેપો રેટ છ ટકા પર સ્થિર થઈ શકે છે. બાર્કલેઝને ડિસેમ્બરમાં 25 બેસિસ પોઇન્ટ અને ત્યાર બાદ ફેબ્રુઆરી, 2027માં વધુ 25 બેસિસ પોઇન્ટના વધારાની અપેક્ષા છે.






