મુંબઈઃ બિટકોઇન એપ્રિલ, 2022 બાદ પહેલી વાર 45,000 ડોલરના ભાવને વટાવી ગયા બાદ વૈશ્વિક ક્રિપ્ટોકરન્સી માર્કેટમાં મંગળવારે જોરદાર ઉછાળો આવ્યો હતો. બિટકોઇન ઈટીએફને મંજૂરી મળવાની આશા ફરી જાગી હોવાથી માર્કેટમાં માનસ સુધર્યું હતું.
ત્રણ વર્સે લોન્ચ કરેલો વિશ્વનો સર્વપ્રથમ ક્રિપ્ટો ઇન્ડેક્સ – IC15 બપોરે ચાર વાગ્યે પૂરા થયેલા ચોવીસ કલાકમાં 6.18 ટકા (3423 પોઇન્ટ) વધીને 58,776 પોઇન્ટ બંધ રહ્યો હતો. ઇન્ડેક્સ 55,353 ખૂલીને 59,091ની ઉપલી અને 55,274 પોઇન્ટની નીચલી સપાટીએ ગયો હતો. ઇન્ડેક્સના તમામ કોઇનના ભાવ વધ્યા હતા, જેમાંથી સોલાના 11.20 ટકા સાથે ટોચનો વધનાર હતો. અવાલાંશ, બિટકોઇન અને પોલકાડોટમાં 6થી 8 ટકાની રેન્જમાં વધારો થયો હતો.
નાઇજિરિયાની કેન્દ્રીય બેન્કે ક્રિપ્ટોકરન્સીના વ્યવહારો પરનો પ્રતિબંધ હટાવી લેવાને લગતી માર્ગદર્શિકા જાહેર કરી હતી. બીજી બાજુ, ભારતના ક્રિપ્ટોકરન્સી એક્સચેન્જ – કોઇનડીસીએક્સના વાર્ષિક અહેવાલમાં જણાવવામાં આવ્યું છે કે ભારતમાં ક્રિપ્ટોકરન્સીના રોકાણકારોની સરેરાશ ઉંમર 25 વર્ષથી વધીને 30 વર્ષ થઈ ગઈ છે.
