એશિયન ગેમ્સ 2026 માટે ભારતીય પુરૂષ ક્રિકેટ ટીમમાં પસંદગીકારોએ મોટો ફેરબદલ કર્યો છે. જાહેર કરવામાં આવેલી 15 સભ્યોની ટીમની કમાન શ્રેયસ અય્યરને સોંપવામાં આવી છે, જ્યારે તિલક વર્મા ઉપકેપ્ટન રહેશે. સૌથી ચોંકાવનારો નિર્ણય ઓલરાઉન્ડર હાર્દિક પંડ્યાને લઈને લેવાયો છે, જેને ટીમમાં સ્થાન મળ્યું નથી. બીજી તરફ, યુવા બેટિંગ સેન્સેશન વૈભવ સૂર્યવંશીને ભારતીય જર્સીમાં પોતાનું કૌશલ્ય બતાવવાની વધુ એક શ્રેષ્ઠ તક સાંપડી છે.
હર્ષિત રાણા ઈજાના કારણે બહાર, યશ ઠાકુરની લોટરી લાગી
બીસીસીઆઈ (BCCI) સેક્રેટરી દેવજીત સૈકિયા દ્વારા જાહેર કરાયેલા સત્તાવાર સ્ટેટમેન્ટ મુજબ, ઝડપી બોલર હર્ષિત રાણા પ્રેક્ટિસ સેશન દરમિયાન રિક્ટસ ફેમોરિસ સ્ટ્રેન (જાંગની સ્નાયુની ઈજા)નો ભોગ બન્યો છે. આ ઈજાના કારણે હર્ષિત અફઘાનિસ્તાન સામેની ટી20 શ્રેણી અને એશિયન ગેમ્સ બંનેમાંથી બહાર થઈ ગયો છે. તેના સ્થાને વિદર્ભના 27 વર્ષીય ઝડપી બોલર યશ ઠાકુરની પસંદગી કરવામાં આવી છે. યશ ઠાકુરે 76 ટી20 મેચોમાં 114 વિકેટો ઝડપી છે અને હાલમાં જ ઝિમ્બાબ્વે સામે આંતરરાષ્ટ્રીય ડેબ્યૂ પણ કર્યું હતું.
ઓલરાઉન્ડર્સ અને સ્પિન ડિપાર્ટમેન્ટમાં મજબૂત મિશ્રણ
હાર્દિક પંડ્યાની ગેરહાજરીમાં ઓલરાઉન્ડર તરીકે શિવમ દુબે, નીતિશ કુમાર રેડ્ડી, અક્ષર પટેલ અને વોશિંગ્ટન સુંદરને સ્થાન આપવામાં આવ્યું છે. વિકેટકીપિંગની જવાબદારી સંજુ સેમસન અને ઈશાન કિશન સંભાળશે. ઝડપી બોલિંગ આક્રમણની આગેવાની જસપ્રીત બુમરાહ અને અર્શદીપ સિંહ સાથે યશ ઠાકુર કરશે, જ્યારે સ્પિન વિભાગ વરુણ ચક્રવર્તી અને રવિ બિશ્નોઈના હાથમાં રહેશે.
મહત્વપૂર્ણ ટૂર્નામેન્ટ શેડ્યૂલ
અફઘાનિસ્તાન સામેની 3 મેચોની ટી20 શ્રેણી 13 સપ્ટેમ્બરથી દિલ્હીના અરુણ જેટલી સ્ટેડિયમ ખાતે શરૂ થઈ રહી છે (બાકીની મેચો 15 અને 17 સપ્ટેમ્બરે રમાશે). ત્યારબાદ એશિયન ગેમ્સ 19 સપ્ટેમ્બરથી 4 ઓક્ટોબર દરમિયાન યોજાશે, જેમાં ભારતીય ટીમ સીધી 28 સપ્ટેમ્બરે ક્વાર્ટર ફાઈનલથી પોતાના અભિયાનની શરૂઆત કરશે.
એશિયન ગેમ્સ અને અફઘાનિસ્તાન ટી20 શ્રેણી માટે ભારતની 15 સભ્યોની અપડેટેડ ટીમ:
શ્રેયસ અય્યર (કેપ્ટન), અભિષેક શર્મા, વૈભવ સૂર્યવંશી, સંજુ સેમસન (વિકેટકીપર), ઈશાન કિશન (વિકેટકીપર), તિલક વર્મા (ઉપકેપ્ટન), શિવમ દુબે, નીતિશ કુમાર રેડ્ડી, અક્ષર પટેલ, વોશિંગ્ટન સુંદર, વરુણ ચક્રવર્તી, રવિ બિશ્નોઈ, જસપ્રીત બુમરાહ, અર્શદીપ સિંહ, યશ ઠાકુર.
