અમદાવાદ: બદલાતા શિક્ષણના પ્રવાહોને ધ્યાનમાં રાખીને આર્મી પબ્લિક સ્કૂલ (APS) ખાતે ‘કમ્પ્યુટેશનલ થિંકિંગ એન્ડ આર્ટિફિશિયલ ઇન્ટેલિજન્સ’ વિષય પર સીબીએસઈ (CBSE) રીજનલ કોન્ફરન્સનું આયોજન કરવામાં આવ્યું હતું. આ પરિષદમાં પ્રિન્સિપાલ અને શિક્ષકો સહિત અંદાજે ૩૦૦ જેટલા કેળવણીકારોએ ભાગ લઈ પોતાના વિચારોનું આદાન-પ્રદાન કર્યું હતું.
આ કાર્યક્રમમાં મુખ્ય અતિથિ અને પેટ્રન મેજર જનરલ એ. કે. મોહલા (GOC, 11 RAPID H), બ્રિગેડિયર મોહિત સક્સેના (ચેરમેન, APS અમદાવાદ), અનિલ કુમાર ઠાકુર (રીજનલ ઓફિસર, CBSE અમદાવાદ), વિનોદ દિયાલાની (જોઇન્ટ સેક્રેટરી – IT, CBSE), ડૉ. મૃદુલા સિંહ (હેડ, સેન્ટર ઓફ એક્સેલન્સ, CBSE અમદાવાદ) અને આઈઆઈટી ગાંધીનગરના પ્રોફેસર મનીષ જૈન ઉપસ્થિત રહ્યા હતા. શાળાના આચાર્યા સંગીતા પટેલે શ્રીમદ્ ભગવદ્ ગીતાનો સંદર્ભ આપીને જણાવ્યું હતું કે ટેકનોલોજીના ઉપયોગમાં વિવેકબુદ્ધિ અને નૈતિકતા હોવી ખૂબ જરૂરી છે.
-
મેજર જનરલ એ. કે. મોહલા: તેમણે માનવીય મૂલ્યો, કલ્પનાશક્તિ અને ચારિત્ર્ય નિર્માણ પર ભાર મૂકતા જણાવ્યું કે ટેકનોલોજીકલ પ્રગતિ વિદ્યાર્થીઓના સર્વાંગી વિકાસ માટે હોવી જોઈએ.
-
અનિલ કુમાર ઠાકુર અને વિનોદ દિયાલાની: માહિતીને જ્ઞાનમાં બદલવામાં શિક્ષકોની ભૂમિકા અને શિક્ષણમાં AI ના નૈતિક તેમજ બુદ્ધિપૂર્વકના ઉપયોગ પર ભાર મૂક્યો હતો.
-
પ્રો. મનીષ જૈન (IIT ગાંધીનગર): તેમણે પ્રેક્ટિકલ STEM શિક્ષણ અને પ્રયોગાત્મક ભણતર દ્વારા વિદ્યાર્થીઓમાં વૈજ્ઞાનિક અભિગમ અને સમસ્યા ઉકેલવાની ક્ષમતા કેળવવા વિશે માર્ગદર્શન આપ્યું હતું.
આ પરિષદમાં ગતિ શક્તિ વિશ્વવિદ્યાલયના ડૉ. અંશિકા શ્રીવાસ્તવ, ગૌરવ ખન્ના અને મુકેશ શેલત જેવા શિક્ષણશાસ્ત્રીઓએ વર્ગખંડમાં AI અને કમ્પ્યુટેશનલ થિંકિંગને સરળતાથી કેવી રીતે સાંકળવું તે અંગે પોતાના અનુભવો શેર કર્યા હતા. અમદાવાદ અને ગાંધીનગરના જિલ્લા તાલીમ સંયોજકોની ઉપસ્થિતિમાં યોજાયેલી પેનલ ચર્ચામાં શિક્ષકોને ભવિષ્યના શિક્ષણ માટે વ્યવહારુ વ્યૂહરચનાઓ મળી હતી.
