સાણંદઃ ટાટા ગ્રુપની ગ્લોબલ બેટરી બિઝનેસ કંપની અગ્રતાસ ગુજરાતના સાણંદમાં તેની સુવિધા પર ઝડપી ગતિએ પ્રગતિ કરી રહી છે. મુખ્ય સ્ટીલ ફ્રેમનું કામ હવે પૂર્ણ થયું છે, જે ઓપરેશનલ તૈયારી તરફનું એક મહત્વપૂર્ણ પગલું છે. અહીં ઉત્પાદન 2027માં શરૂ થવાની અપેક્ષા છે. 
આ પ્રોજેક્ટનું અમલીકરણ ટાટા પ્રોજેક્ટ્સ લિમિટેડ દ્વારા ટાટા કન્સલ્ટિંગ એન્જિનિયર્સ (TCE) અને વિવિધ સ્ટીલ કોન્ટ્રેક્ટર્સ સાથે ભાગીદારીમાં કરવામાં આવી રહ્યું છે. પ્રોજેક્ટમાં ઉપયોગમાં લેવાયેલું તમામ સ્ટીલ અને મોટા ભાગની અન્ય સામગ્રી ભારતમાંથી જ મેળવવામાં આવી છે, જે દેશની સપ્લાય ચેઇન અને ઔદ્યોગિક ક્ષમતાને મજબૂત બનાવે છે અને આયાત પરની નિર્ભરતા ઘટાડે છે.
કંપનીના વાઇસ પ્રેસિડન્ટ સુધીર ઘાલસાસીએ જણાવ્યું હતું કે આ માઈલસ્ટોન સાણંદમાંના પ્રોજેક્ટના વ્યાપ, જટિલતા અને ગતિને દર્શાવે છે. સતત બદલાતી પરિસ્થિતિમાં, વિગતવાર ડિઝાઇનને વાસ્તવિક સ્વરૂપ આપવું અનેક પડકારો સાથે આવે છે. એક વિઝન તરીકે શરૂ થયેલો આ પ્રોજેક્ટ હવે મજબૂત સહયોગ, શિસ્તબદ્ધ અમલીકરણ અને ટીમોના સંયુક્ત પ્રતિબદ્ધતાથી આકાર લઈ રહ્યો છે. અમારા ભાગીદારો સાથે મળીને, અમે યોજનાઓને વાસ્તવિક પ્રગતિમાં પરિવર્તિત કરી છે અને ભવિષ્ય માટે તૈયાર એવી સુવિધા ઊભી કરી રહ્યા છીએ.
ભારતનું ક્લીન એનર્જી વિઝન અને નેટ ઝીરો 2070
ભારતે 2070 સુધી નેટ ઝીરો ઉત્સર્જન હાંસલ કરવાનો સંકલ્પ લીધો છે અને 2030 સુધી 500 GW નોન-ફોસિલ ફ્યુઅલ એનર્જી ક્ષમતા હાંસલ કરવાનું મહત્ત્વાકાંક્ષી લક્ષ્ય નક્કી કર્યું છે. આ લક્ષ્યો હાંસલ કરવા માટે ઇલેક્ટ્રિક મોબિલિટી અને ગ્રિડ-સ્કેલ એનર્જી સ્ટોરેજમાં ઝડપી વૃદ્ધિ જરૂરી છે, જેને અદ્યતન બેટરી સેલ્સની મજબૂત સ્થાનિક સપ્લાય સપોર્ટ કરશે.
પ્રથમ તબક્કામાં દર વર્ષે 20 GWh ક્ષમતાવાળી અગ્રતાસની સાણંદ સુવિધા આ માગને પૂરી કરવામાં કેન્દ્રસ્થાને રહેશે. આ સુવિધા કાર્યરત થયા બાદ અહીં ઇલેક્ટ્રિક વાહનો અને એનર્જી સ્ટોરેજ એપ્લિકેશન્સ માટે અદ્યતન બેટરી સેલ્સનું ઉત્પાદન થશે, જે ફોસિલ ફ્યુઅલ પરની નિર્ભરતા ઘટાડવામાં મદદરૂપ થશે અને ભારતને વૈશ્વિક બેટરી વેલ્યુ ચેઇનમાં મહત્વપૂર્ણ સ્થાન આપશે. આ પ્રોજેક્ટ દ્વારા પ્રદેશમાં મોટા પાયે રોજગાર સર્જાશે.
કંપનીના વાઇસ પ્રેસિડેન્ટ (મેન્યુફેકચરિંગ ઓપરેશન્સ) દીપક ખરેએ જણાવ્યું હતું કે સાણંદમાં સ્ટીલ ફ્રેમનું પૂર્ણ થવું ઓપરેશનલ તૈયારી તરફનું એક મહત્વપૂર્ણ પગલું છે. આગળ વધતા, હવે અમારું ધ્યાન સિસ્ટમ્સ, પ્રક્રિયાઓ અને ક્ષમતાઓના વિકાસ પર છે — જેથી ભારતમાંથી વિશ્વ માટે વિશ્વ સ્તરીય અને વિશ્વસનીય બેટરીઓનું ઉત્પાદન કરી શકાય. એસાથે જ સુરક્ષિત અને ગુણવત્તાયુક્ત મેન્યુફેકચરિંગ માટે કુશળ વર્કફોર્સનું નિર્માણ પણ અમારી પ્રાથમિકતા છે.
