બટેટા તેમજ ચોખાના લોટની પુરી થોડી ક્રિસ્પી તેમજ સ્વાદિષ્ટ બને છે. રસોઈમાં પુરીના અલગ સ્વાદ માટે આ પુરી બનાવી શકાય!
સામગ્રીઃ
- બાફેલા બટેટા 3
- ચોખાનો લોટ 1 કપ
- અજમો ½ ટી.સ્પૂન
- જીરૂ ½ ટી.સ્પૂન
- કાશ્મીરી મરચાં પાઉડર 1 ટી.સ્પૂન
- હળદર ¼ ટી.સ્પૂન
- ધોઈને સમારેલી કોથમીર 1 કપ
- કસૂરી મેથી 2 ટે.સ્પૂન
- તેલ તળવા માટે
- આદુ-મરચાંની પેસ્ટ 1 ટે.સ્પૂન
રીતઃ બાફેલા બટેટાને છોલીને ખમણી લો. ત્યારબાદ તેમાં અજમો તેમજ જીરૂને હાથેથી મસળીને તેમાં ઉમેરો. હવે તેમાં હળદર, મરચાં પાઉડર, સમારેલી કોથમીર, કસૂરી મેથી, આદુ-મરચાંની પેસ્ટ ઉમેરીને બધું મિશ્રણ મેળવીને લોટ બાંધો. જો લોટ કઠણ હોય તો એક વાટકીમાં ગરમ પાણી લો તેને થોડું થોડું ઉમેરીને બહુ ઢીલો નહીં તેમજ બહુ કઠણ નહીં એવો લોટ બાંધી લો. આ લોટને ઢાંકીને 10 મિનિટ માટે રહેવા દો.
દસ મિનિટ બાદ કઢાઈમાં તેલ ગરમ કરી લીધા બાદ ગેસની આંચ ધીમી – મધ્યમ કરી લો.
હાથને તેલવાળો કરી પુરીના લોટમાંથી લૂવા કરી લો. હવે લૂવાને ચોખાના લોટનું અટામણ આપીને હળવે હળવે વણી લો. જો આકાર ગોળ ન આવતો હોય તો પુરી વણી લીધા બાદ સ્ટીલની વાટકીથી ગોળાકાર કટ કરી લો.
પુરીને તેલમાં તળી લો. ગેસની આંચ ધીમી મધ્યમ રાખવી.
આ પુરીને ટામેટાંની ચટણી અથવા રસાવાળા ટામેટાં-બટેટાના શાક અથવા લીલી ચટણી સાથે પણ પીરસી શકાય.
