મિક્સ લોટના વેજ ગોટા થોડાં ટ્વિસ્ટ સાથે, અલગ સ્વાદ સાથે ગરમાગરમ બધાંને ભાવશે!
સામગ્રીઃ
- આખા ધાણા 1 ટે.સ્પૂન
- વરિયાળી 1 ટે.સ્પૂન
- આદુ 2 ઈંચ
- લસણની કળી 10-15
- કાંદા 2
- કાચી કેરી 1 નંગ
- લીલી મેથીના પાન 1 કપ
- કોથમીર ધોઈને સમારેલી 1 કપ
- મકાઈનો લોટ 1 કપ
- ચણાનો લોટ ½ કપ
- રવો ½ કપ
- દહીં 2 ટે.સ્પૂન
- તલ 1 ટે.સ્પૂન
- લીલા મરચાં 7-8
- લાલ મરચાં પાઉડર 1 ટી.સ્પૂન
- કાળાં મરી પાઉડર 1 ટી.સ્પૂન
- મીઠું સ્વાદ પ્રમાણે,
- હીંગ ¼ ટી.સ્પૂન
- તેલ તળવા માટે
- ભાવનગરી મરચાં 8-10 (અથવા મોળા મરચાં)
રીતઃ કેરી છોલીને ધોઈને ખમણી લેવી. આખા ધાણા તેમજ વરિયાળી અધકચરા વાટી લેવા. આદુ-લસણને વાટી લો. કાચી કેરી અડધી છીણી લો.
એક બાઉલમાં મકાઈનો લોટ, ચણાનો લોટ અને રવો મેળવી લો. તેમાં અધકચરા વાટેલાં ધાણા અને વરિયાળી, વાટેલા આદુ-લસણ તેમજ તલ મેળવો. કાંદાને ઝીણાં ચોરસ સમારેલા અને લીલા મરચાં ગોળ સમારેલા સાથે સમારેલી કોથમીર મેળવો. લીલી મેથીના પાન 3-4 પાણીએથી ધોઈને સમારીને મેળવો. હીંગ, દહીં, કાળા મરી પાઉડર અને સ્વાદ મુજબ મીઠું ઉમેરી દો. આ બધી સામગ્રીમાં થોડું પાણી ઉમેરીને ગોટાનો લોટ તૈયાર કરી લો.
ગોટા ઉતારવા માટે એક કઢાઈમાં તેલ ગરમ કરી લો. તેલ ગરમ થાય એટલે તેમાંથી 1 ચમચી ગરમ તેલ ગોટાના મિશ્રણમાં રેડીને ચમચી વડે હલાવી લો. હવે ગરમ તેલમાં ગોટા તળી લો.
મરચાંને મોટા ટુકડામાં કટ કરીને અથવા દરેક મરચાંમાં કાપો પાડીને તેલમાં તળી લો. તળેલા મરચા એક પ્લેટમાં કાઢી લઈ ઉપર મીઠું ભભરાવીને ગોટા સાથે પિરસો.
આ ગોટા લીલી ચટણી અને દહીંના રાયતા તેમજ તળેલા મરચાં સાથે અથવા સાંજે નાસ્તામાં ચા સાથે પણ સારાં લાગશે.
