જુવારનું ધાન્ય પચવામાં હલકું તેમજ ગરમીના દિવસોમાં પણ તે ઠંડક આપનારું હોય છે. તેમાં વેજીટેબલ્સ ઉમેરીને પૌષ્ટિક વેજ જુવાર પરોઠા બની શકે છે.
સામગ્રીઃ
- જુવારનો લોટ 1½ કપ
- સફેદ તલ 1 ટે.સ્પૂન
- સમારેલી કોથમીર 1 કપ
- ગાજર 1
- સિમલા મરચું 1
- કાંદો 1
- કોબી ઝીણી ખમણેલી 2 ટે.સ્પૂન
- મરચાં 2
- આદુનો ટુકડો 2 ઈંચ
- કળી પત્તાના પાન 6-7
- 2 ચપટી હીંગ
- લસણની કળી 2-3
- તેલ અથવા ઘી પરોઠા શેકવા માટે
રીતઃ સિમલા મરચું, કાંદો તેમજ ગાજરને ઝીણાં ચોરસ ટુકડામાં સમારી લો. ખાંડણિયામાં આદુ, મરચાં, કળીપત્તાના પાન તેમજ લસણને અધકચરા વાટી લો.
જુવારના લોટમાં ઝીણાં સમારેલાં શાક, કોથમીર તેમજ વાટેલાં આદુ-લસણ અને હીંગ મેળવીને 1 ચમચી તેલ ઉમેરીને થોડું પાણી મેળવીને લોટ બાંધો. જરૂર લાગે તો બીજું થોડું પાણી ઉમેરીને લોટ બાંધી લો. હવે તેને જરા તેલનું મોણ આપી દો અને લૂવા કરીને લોટનું અટામણ દઈને રોટલો વણી લો.
ગેસ ઉપર તવો ગરમ થાય એટલે ગેસની આંચ ધીમી કરીને આ જુવારનું પરોઠું હળવેથી તવામાં મૂકી દો. અડધી મિનિટ બાદ તેને તવેથા વડે ઉથલાવી દો અને ગેસની મધ્યમ આંચે પરોઠું બંને બાજુએથી વારાફરતી 1-1 ચમચી તેલ રેડીને શેકી લો. ઘી પણ વાપરી શકો છો.
આ પરોઠાં દહીં અથવા રાયતા સાથે સારાં લાગશે.
