વિશ્વના ક્યા દેશો પાસે છે સૌથી વધુ સોનું?

કોઈપણ દેશની આર્થિક સ્થિરતા અને વૈશ્વિક આર્થિક અનિશ્ચિતતાનો સામનો કરવાની ક્ષમતા માટે સોનું એક મહત્વપૂર્ણ માધ્યમ છે. સોનું માત્ર એક કિંમતી ધાતુ નથી, પરંતુ એ આંતરરાષ્ટ્રીય વેપાર અને નાણાકીય સ્થિરતાનો મુખ્ય આધારસ્તંભ પણ છે. ૧૮૦૦ અને ૧૯૦૦ના દાયકામાં સોનું વૈશ્વિક અર્થતંત્રનો એક અભિન્ન ભાગ હતું, જ્યારે ઘણા દેશોએ એમના ચલણોને સોનાના ભંડાર સાથે જોડ્યા હતા.

૧૯મી અને ૨૦મી સદીની શરૂઆતમાં, મોટાભાગના દેશોએ એમના ચલણો સોનાના મૂલ્ય પર આધારિત રાખ્યા, જેને “ગોલ્ડ સ્ટાન્ડર્ડ” તરીકે ઓળખવામાં આવે છે. એનો અર્થ એ થયો કે જારી કરાયેલા દરેક ચલણનું સોનામાં એક નિશ્ચિત મૂલ્ય હતું, અને લોકો એમના પૈસાને સોનામાં રૂપાંતરિત કરી શકતા હતા. આમ, સોનું એ દેશની આર્થિક સ્થિરતા અને એના ચલણની મજબૂતાઈનો મુખ્ય આધાર હતો.

આધુનિક સમયમાં સોનાનું મહત્વ

૧૯૭૦ના દાયકાથી વૈશ્વિક અર્થતંત્રમાં સોનાનો સીધો ઉપયોગ બંધ થઈ ગયો હોવા છતાં સોનાનું મહત્વ ઘટ્યું નથી. આજે પણ સોનું સંપત્તિના સલામત અને સ્થિર ભંડાર તરીકે જોવાય છે, ખાસ કરીને આર્થિક અનિશ્ચિતતાના સમયમાં. જ્યારે કોઈ દેશનું અર્થતંત્ર કટોકટીમાં હોય છે ત્યારે સોનાની સંપત્તિ એની વૈશ્વિક વિશ્વસનીયતાને મજબૂત બનાવે છે અને આંતરરાષ્ટ્રીય સ્તરે એના નાણાકીય વ્યવહારોને ટેકો આપે છે.

આ દેશો પાસે છે અધધધ સોનું

સોનાના સંગ્રહમાં સૌથી પહેલું નામ કોઈ હોય તો એ મહાસત્તા ધરાવતું અમેરિકા છે. અમેરિકા પાસે 8,133.46 ટન ગોલ્ડ છે. જ્યારે બીજા નંબર પર છે જર્મની, જે 3,351.53 ટન સોનું ધરાવે છે. એ જ રીતે ઇટાલી  પાસે  2,451.84, ફ્રાન્સ  2,436.97, રશિયા  2,335.85, ચીન  2,264.32 અને જાપાન પાસે 845.97 ટન સોનું છે. ભારતની વાત કરીએ તો સોના સંગ્રહમાં આપણો દેશ આઠમું સ્થાન ધરાવે છે. ભારત પાસે  840.76  ટન સોનાની સંપત્તિ છે. નવમાં નંબરે નેધરલેન્ડ છે, જેની પાસે  612.45 ટન સોનું છે. દસમા નંબરે તુર્કી આવે છે, જેની પાસે 584.93 ટન સોનું છે.

દુનિયામાં કેટલું સોનું ઉપલબ્ધ છે?

અત્યાર સુધીમાં, વિશ્વમાં આશરે 244,000 મેટ્રિક ટન સોનું મળી આવ્યું છે. જેમાંથી 187,000 મેટ્રિક ટન સોનું ઉત્પન્ન થયું છે અને 57,000 મેટ્રિક ટન સોનું હજુ પણ ભૂગર્ભમાં છે. સૌથી વધુ સોનું ચીન, ઓસ્ટ્રેલિયા અને દક્ષિણ આફ્રિકામાં મળી આવ્યું છે. 2016માં, યુનાઇટેડ સ્ટેટસ સોનાના ઉત્પાદનમાં ચોથા ક્રમે હતું.

કેમ કરવામાં આવે છે સોનાનો સંગ્રહ? 

આર્થિક સ્થિરતા: સોનું એક સ્થિર અને વિશ્વસનીય અનામત છે, જે દેશના અર્થતંત્રને નાણાકીય કટોકટીથી બચાવવામાં મદદ કરે છે.

ચલણ સપોર્ટ: ઐતિહાસિક રીતે સોનું દેશના ચલણની મજબૂતાઈ અને એની નાણાકીય સ્થિરતા જાળવવામાં મહત્વપૂર્ણ ભૂમિકા ભજવતું રહ્યું છે.

વિશ્વસનીયતા: વૈશ્વિક અનિશ્ચિતતાઓ દરમિયાન, અન્ય દેશો સાથે વેપાર અને દેવાના વ્યવહારો માટે સોનાનો ભંડાર રાખવો મહત્વપૂર્ણ છે.

આર્થિક સ્થિરતાનુ પ્રતીક છે સોનું

સોનાની સંપર્તિએ માત્ર કિંમતી ધાતુનો સંગ્રહ નથી પરંતુ એ દેશની આર્થિક સ્થિરતા અને સુરક્ષાનું પણ પ્રતીક છે. વૈશ્વિક અનિશ્ચિતતાના સમયમાં, સોનું સૌથી મહત્વપૂર્ણ અનામત સાબિત થાય છે, જે દેશોને નાણાકીય કટોકટીમાંથી બહાર નીકળવામાં મદદ કરે છે. એથી સોનાના ભંડાર હજુ પણ વિશ્વના દેશોની તિજોરીનો એક મહત્વપૂર્ણ ભાગ છે.

હેતલ રાવ