‘તાન્હાજીઃ ધ અનસંગ વોરિયર’: ગુમનામ મરાઠા યોદ્ધાની શૌર્યગાથા

January 10, 2020

ફિલ્મઃ તાન્હાજીઃ ધ અનસંગ વોરિયર

કલાકારોઃ અજય દેવગન, સૈફ અલી ખાન, કાજોલ, શરદ કેળકર

ડાયરેક્ટરઃ ઓમ રાઉત

અવધિઃ 134 મિનિટ

★ વાહિયાત
★★ ઠીક ઠીક
★★★ ટાઈમપાસ
★★★★ મસ્ત
★★★★★ અદ્દભુત

ફિલ્મોમીટર રેટિંગઃ
★★★★

ઐતિહાસિક કે અમુક ચોક્કસ સમયકાળ પર કે મહાયુદ્ધ (પિરિયડ ડ્રામા) પર ફિલ્મ બનાવવી એ જોખમી કામ છે. એક તો એ ઊંડું સંશોધન માગી લે છે. બીજી બાજુ, ઈતિહાસ-સચ્ચાઈને વળગી રહીને ફિલ્મ બનાવવામાં એ ડૉક્યૂમેન્ટરી બની જવાનો ભય રહે. બીજું, એની માવજતમાં ચીવટાઈ રાખવી પડે. ત્રીજું, યુદ્ધકથાને અનુરૂપ પાત્રો-અભિનય સશક્ત હોવાં જોઈએ. લોકમાન્ય ટિળકના જીવનકાર્ય પર મરાઠી ફિલ્મ બનાવનાર ઓમ રાઉત આમાંની મોટા ભાગની લડાઈ જીતી શક્યા છે ને એમાં એમને સાથ મળ્યો છે પટકથાકાર-સંવાદલેખક પ્રકાશ કાપડિયાનો. જો કે પ્રેક્ષકોનો રસ જાળવી રાખવા લેખક-દિગ્દર્શકે ઈતિહાસમાં છૂટછાટ લીધી છે, કેટલાક કાલ્પનિક પ્રસંગ ઉમેર્યા છે.

તાન્હાજીની કથા છે 17મી સદીમાં લડવામાં આવેલી એક જીવસટોસટની લડાઈની, લડાઈ માટે ઘડવામાં આવેલી વ્યૂહનીતિની. 4 ફેબ્રુઆરી, 1670ના રોજ શિવાજી મહારાજના જમણા હાથ સમા તાન્હાજી માલુસરે અને ઔરંગઝેબના વિશ્વાસુ સરદાર ઉદયભાણ રાઠોડ (સૈફ અલી ખાન) વચ્ચે લડાયેલી આ લડાઈ ઔરંગઝેબના કબ્જામાં એવો કોંઢાણાગડ પાછો મેળવવા, એની પર ભગવો લહેરાવવા, સ્વરાજ પરત મેળવવા તથા પશ્ચિમ ભારત પર મુઘલ સામ્રાજ્ય સ્થાપવાના મનસૂબો નેસ્તનાબૂદ કરવા લડવામાં આવેલી.

થ્રી-ડી ફૉરમેટમાં ચિત્રિત થયેલી આ ફિલ્મની ખાસિયત છે સ્પેશિયલ ઈફેક્ટ્સ, વીએફએક્સ… ફિલ્મનાં દિલધડક દ્રશ્ય, પહાડ પર આવેલા ગઢ, એની રાંગ, પર્વતારોહણ, પરદા પરથી તમારી દિશામાં આવતાં અણિયાળાં બાણ, ભાલા, વગેરેની થ્રિલ આંખો પર કાળાં થ્રી-ડી ગોગલ્સ લગાવીને જ જોવા-માણવાની મજા છે.

ફિલ્મમાં ઉદયભાણ શા માટે અથવા કેવી રીતે ઔરંગઝેબ સાથે ભળ્યો એની એક કથા છે. કોઈ એક સમયે ઉદયભાણને કમલ (નેહા શર્મા) નામની કન્યા સાથે પ્રેમ હોય છે, પણ વર્ગભેદને કારણે એનાં લગ્ન કમલ સાથે થતાં નથી. ગુસ્સે ભરાયેલો ઉદયભાણ મુઘલ સાથે (ઔરંગઝેબ)નો બૉડીગાર્ડ અને પછી સરદાર બની જાય છે. શરદ કેળકર બન્યો છે પ્રભાવી શિવાજી રાજે. અજય-સૈફ ઉપરાંત ફિલ્મમાં શિવાજીની માતા રાજમાતા જિજાબાઈ (પદ્માવતી રાવ) અને તાન્હાજીની પત્ની સાવિત્રી (કાજોલ)ના ભાગે લગભગ કંઈ જ કરવાનું આવ્યું નથી. ડિટ્ટો કમલ (નેહા શર્મા). આમ છતાં આ ફિલ્મ ઈતિહાસની ગર્તામાં ખોવાઈ ગયેલા એક મહાયોદ્ધાની શૌર્યકથા માટે તથા બહેતરીન વિઝ્યુઅલ્સ માટે જોઈ શકાય.

(જુઓ ‘તાન્હાજી’નું ટ્રેલર)

સ્પિનના જાદુગર વોર્નની ટોપીએ પણ તોડ્યો રેકોર્ડ

January 10, 2020

સિડની: વિશ્વના મહાન લેગ સ્પિનર અને પૂર્વ ઓસ્ટ્રેલિયન શેન વોર્ને તેના ટેસ્ટ કરિયર દરમ્યાન પહેરેલી કેપ ‘બેગી ગ્રીન’ ની હરાજી 1 મિલિયન ઓસ્ટ્રેલિયન ડોલર એટલે કે 4.92 કરોડ રૂપિયામાં થઈ છે. આ સાથે જ ‘બેગી ગ્રીન કેપ’એ એક વિશેષ સ્થાન પ્રાપ્ત કર્યું છે, હવે તે ક્રિકેટ ઇતિહાસમાં વેચાયેલી સૌથી મોંઘી અને યાદગાર વસ્તુ બની ગઈ છે. ઓસ્ટ્રેલિયાના જંગલોમાં લાગેલી આગથી અસરગ્રસ્તોને મદદ કરવા વોર્નને તેની ટેસ્ટ ડેબ્યૂ મેચ ગ્રીન કેપની હરાજી કરવાનો નિર્ણય લીધો હતો.

50 વર્ષીય શેન વોર્ને ટ્વીટ કરીને જે લોકોએ હરાજીમાં બોલી લગાવી હતી તેમનો આભાર માન્યો છે. શેનની આ કેપ માટેની હરાજીની પ્રક્રિયા 6 જાન્યુઆરીથી શરુ થઇ હતી જે 10 જાન્યુઆરીએ સવાર સુધી ચાલી. ગણતરીના કલાકોમાં જ કેપની કિંમત 1.5 કરોડને પાર પહોંચી ગઈ હતી. આ કેપની રકમ સીધી રેડ ક્રોસ બુશફાયર અપીલને જતી રહેશે.

હરાજીની વેબસાઇટ પરથી મળતી માહિતી મુજબ શેન વોર્ને ટેસ્ટ કારકિર્દીમાં રમનારી તમામ 145 મેચ દરમ્યાન આ કેપ પહેરી હતી. જેમાં તેણે ઓસ્ટ્રેલિયા તરફથી 708 વિકેટ ઝડપી હતી. આ કેપ વોર્ન દ્વારા ઓટોગ્રાફ કરેલા પ્રમાણપત્ર સાથે આવશે.

હરાજીમાં વેચાયેલી અત્યાર સુધીની સૌથી મોંઘી ક્રિકેટ એસેસરીઝ:

ડોન બ્રેડમેને પોતાની અંતિમ ટેસ્ટમાં પહેરેલી કેપ 2003માં 1,70,000 પાઉન્ડમાં વેચાઈ હતી.
એમએસ ધોનીએ 2011ના વર્લ્ડ કપ ફાઇનલમાં વાપરેલું બેટ 2011માં 1,00,000 પાઉન્ડમાં વેચાયું હતું.
જોન વિઝ્ડન ક્રિકેટર્સ અલમાનકનું આખું સેટ 2008માં 84,00 પાઉન્ડમાં વેચાયું હતું.
ગેરી સોબર્સે જે બેટથી 6 બોલમાં 6 સિક્સ મારી હતી તે 2000માં 54,257 પાઉન્ડમાં વેચાયું હતું.
સોબર્સે જે બેટથી પાકિસ્તાન સામે 365* રન કર્યા હતા તે 2000માં 47,475 પાઉન્ડમાં વેચાયું હતું.

ઉલ્લેખનીય છે કે, એક અનુમાન મુજબ 50 કરોડથી વધુ વન્ય જીવ જંતુઓ ઓસ્ટ્રેલિયાના જંગલોમાં લાગેલી આગમાં બળીને ખાખ થઈ ગયા છે. આ ઉપરાંત આગમાં કેટલાક લોકોના પણ મોત થવાની સાથે અનેક ઘરો પણ સળગીને રાખ થઈ ગયા છે.

46 વર્ષનો થયો હ્રતિક રોશન, જાણો તેના જીવન સાથે જોડાયેલી રોચક વાતો

January 10, 2020

નવી દિલ્હીઃ બોલીવુડનો મોસ્ટ હેન્ડસમ હ્રતિક રોશન આજે 46 વર્ષનો થયો છે. હ્રતિક રોશને 6 વર્ષની ઉંમરથી જ પોતાના એક્ટિંગ કરિયરની શરુઆત કરી હતી. તેણે શ્રીદેવી અને સુપરસ્ટાર રજનીકાંતના દિકરાનું પાત્ર ભજવ્યું હતું. આજે હ્રતિક રોશને પોતાની એક્ટિંગ-ડાંસિગના દમ પર બોલીવુડમાં પોતાની એક અલગ જગ્યા બનાવી છે.

હ્રતિક રોશનનો જન્મ 10 જાન્યુઆરી 1774ના રોજ થયો હતો અને ખૂબ ઓછા લોકો જાણે છે કે હ્રતિક રોશનનું સાચું નામ હ્રતિક રાકેશ નાગરથ છે. રાકેશ તેના પપ્પા અને નાગરથ તેના દાદાનું નામ છે. હ્રતિક રોશનનો સંબંધ સંગીત પરિવાર સાથે છે અને તેને સંગીતનું જ્ઞાન જન્મથી જ છે. એટલા માટે ‘જિંદગી ના મિલેગી દુબારા’ અને ‘ગુજારિશ’ જેવી ફિલ્મોમાં તેણે ગીત ગાયું હતું.

હ્રતિક રોશને પોતાની પહેલી ફિલ્મ ‘કહો ના પ્યાર હૈ’ બાદ પોતાના ફર્સ્ટ લવ સુજેન સાથે વર્ષ 2000માં લગ્ન કર્યા હતા, પરંતુ કેટલાક મતભેદો બાદ બંન્નેનું 14 વર્ષનું લગ્નજીવન પૂર્ણ થઈ ગયું અને વર્ષ 2014 માં બંન્નેના છુટ્ટાછેડા થઈ ગયા. આ બંન્નેના બે દિકરા છે. મોટા દિકરાનું નામ રેહાન છે, જેની ઉંમર 13 વર્ષ અને નાના દિકરાનું નામ રિદાન છે, જેની ઉંમર આશરે 11 વર્ષ છે. આ બંન્નેએ ભલે પોતાના સંબંધોને 2014માં પૂરા કરી દીધા હોય. પરંતુ બંન્ને પોતાના બાળકો માટે હંમેશા સમય કાઢે છે અને સાથે સમય વિતાવતા પણ જોવા મળે છે. તાજેતરમાં જ તે પોતાના પરિવાર અને એક્સ વાઈફ સુજૈન સાથે રજાઓ મનાવવા ગયો હતો અને તેના ફોટોઝ પણ સોશિયલ મીડિયા પર શેર કર્યા હતા.

પ્રાપ્ત વિગતો અનુસાર, હ્રતિક રોશને એકવાર જણાવ્યું હતું કે તેની પહેલી ફિલ્મ રિલીઝ થયા બાદ, તેને લગ્ન માટે ઘણાં પ્રપોઝલ આવ્યા હતાં. પરંતુ હ્રતિક રોશને સુજેન સાથે લગ્ન કરી લીધા હતા.

હ્રતિક રોશનની લીડ એક્ટર તરીકેની પ્રથમ ફિલ્મ ‘કહો ના પ્યાર’ હતી. આ ફિલ્મ દર્શકોને ખૂબ પસંદ આવી હતી. ત્યારબાદ તેણે પોતાના એક્ટિંગ કરિયરમાં ઘણી હિટ ફિલ્મો આપી હતી. ગત વર્ષ હ્રતિક રોશન માટે ખૂબ શાનદાર રહ્યું. તેને એશિયાના ‘મોસ્ટ હેન્ડસમ મેન’નો એવોર્ડ મળ્યો હતો અને તેની બે ફિલ્મો ‘વૉર’ અને ‘સુપર 30’ ખૂબ હિટ રહી.

એક સમયે હ્રતિક રોશન ચેઈન સ્મોકર હતો. પરંતુ તેણે એક પુસ્તક વાંચ્યું જેનું નામ હતું ‘ઈઝી વે ટૂ સ્ટોપ સ્મોકિંગ’. આ પુસ્તકને વાંચ્યા બાદ હ્રતિક રોશને પોતાની સિગરેટની લતને છોડી દીધી હતી.

અમેરિકા-ઈરાન: ડોનાલ્ડ ટ્રમ્પ ઈચ્છશે તો પણ ઈરાન પર હુમલો નહીં કરી શકે

January 10, 2020

વોશિગ્ટન: કુદ્સ ફોર્સના પ્રમુખ મેજર જનરલ કાસિમ સુલેમાનીના મોત પછી ઈરાન અને અમેરિકા વચ્ચે યુદ્ધ જેવી સ્થિતિ બની ગઈ છે. અમેરિકન કોંગ્રેસ આ યુદ્ધને રોકવા માટે યુએસ સેનેટના નીચલી સદન (હાઉસ ઓફ રિપ્રેઝેન્ટેટીવ)માં આ પ્રસ્તાવ પાસ કરી દીધો છે. મહત્વનું છે કે, અમેરિકન રાષ્ટ્રપતિ ડોનાલ્ડ ટ્રમ્પના અધિકાર સમિતિ કરવા માટે વોર પાવર્સ પ્રસ્તાવ પારિત કરવામાં આવ્યો છે. યુએસના હાઉસ ઓફ રિપ્રેઝેન્ટેટીવમાં વોટિંગ દરમ્યાન પ્રસ્તાવના પક્ષમાં 194 મત પડ્યા હવે આ પ્રસ્તાવને સેનેટના ઉપલા સદનમાં રજૂ કરવામાં આવશે.

મહત્વનું છે કે, જો અમેરિકન કોંગ્રેસના ઉપલા સદનમાં પણ આ પ્રસ્તાવ પાસ થઈ જશે તો આ પ્રસ્તાવને લાગુ કરવામાં અમેરિકન રાષ્ટ્રપતિ ડોનાલ્ડ ટ્રમ્પના હસ્તાક્ષરની જરૂર નહીં પડે. જોકે, રિપબ્લિકન સાંસદોની બહુમતિ વાળા સેનેટમાં આ પ્રસ્તાવનું પાસ થવું ઘણું મુશ્કેલ લાગી રહ્યું છે.

હાઉસ ઓફ રિપ્રેઝેન્ટેટીવના સ્પીકર અને ડેમોક્રેટ સાંસદ નેન્સી પેલોસીની અધ્યક્ષતામાં અમેરિકન કોંગ્રેસના નિચલા સદનમાં વોર પાવર્સ પ્રસ્તાવ માટે વોટિંગ કરવામાં આવ્યું હતું. આ વોટિંગમાં 224 સાંસદએ ભાગ લીધો હતો.

ઈરાન સાથે શાંતિની અપીલ કરી ચૂક્યા છે ટ્રમ્પ

ઈરાન સાથે તણાવની વચ્ચે અમેરિકન રાષ્ટ્રપતિ ડોનાલ્ડ ટ્રમ્પે બુધવારે રાષ્ટ્રને સંબોધિત કરતા કહ્યું હતું કે, અમે ઈરાનને હુમલાની બદલે જવાબ આપવાને બદલે કોઈ અન્ય વિકલ્પ અંગે વિચારી રહ્યા છીએ. ઈરાનને આર્થિક પ્રતિબંધ લગાવીને દંડિત કરશું.

ટ્રમ્પના આ નિવેદનથી અટકળો લાગી રહી છે કે, ત્રીજા વિશ્વયુદ્ધની શક્યતાઓ હાલ શાંત પડી ગઈ છે. ટ્રમ્પના આ નિવેદનને પશ્ચિમ એશિયામાં તણાવ ઓછો કરવા માટે ખૂબ જ મહત્નું માનવામાં આવી રહ્યું છે.

મમતા બેનર્જી અને ઓવૈસીનું સીએએના વિરોધમાં પ્રદર્શન

January 10, 2020

નવી દિલ્હીઃ નાગરિકતા સંશોધન બિલના વિરોધમાં દેશભરમાં વિરોધ પ્રદર્શનો ચાલી રહ્યા છે. પશ્ચિમ બંગાળના મુખ્યમંત્રી મમતા બેનર્જી સીએએના વિરોધમાં ધરણા કરશે, તો હૈદરાબાદમાં અસદુદ્દીન ઓવૈસી તરફથી તિરંગા યાત્રા કાઢવામાં આવશે. આ તમામ વચ્ચે મુસ્લિમ સંગઠનોએ આજે સીએએના વિરોધમાં રોજા રાખવાની જાહેરાત કરી છે. મુસ્લિમ સંગઠનો દ્વારા જાહેરાત કરવામાં આવી છે કે અમે લોકો સીએએના વિરોધમાં એક દિવસના રોજા રાખીશું. પ્રાપ્ત વિગતો અનુસાર સીએએના વિરોધમાં આજે પણ મુસ્લિમ સંગઠનો જૂની દિલ્હીમાં આવેલી જામા મસ્જિદ વિસ્તારમાં એકવાર ફરીથી પોતાનો અવાજ ઉઠાવશે. સાંજે સંવિધાનની પ્રસ્તાવના વાંચ્યા બાદ જ રોજા તોડવામાં આવશે.

દેશની ઘણી હાઈકોર્ટમાં સીએએ વિરુદ્ધ દાખલ કરવામાં આવેલી અરજીઓને સુપ્રીમ કોર્ટમાં ટ્રાન્સફર કરવામાં આવી. આને લઈને કેન્દ્ર સરકારને સુપ્રીમ કોર્ટે નોટિસ આપી છે. આવતી સુનાવણી હવે 22 જાન્યુઆરીના રોજ થશે.

વડોદરાથી પકડાયેલા આતંકીની પૂછપરછમાં થયા અનેક મોટા ખુલાસાઓ

January 10, 2020

વડોદરા: ગુજરાત ATSએ વડોદરાના ગોરવા વિસ્તાર પાસેથી આતંકવાદી ઝફર અલી ઉર્ફે ઉમર નામના આતંકવાદીને ઝડપી લીધો છે. તમિલનાડુનો રહેવાસી આ આતંકી ગુજરાતમાં રહી ISIS માટે કામ કરતો હોવાની પ્રાથમિક પૂછપરછમાં ખુલાસો થયો છે. આ આતંકી ભરૂચ અને વડોદરા શહેરની આસપાસના વિસ્તારોમાં રહીને નેટવર્ક ઉભુ કરવાની ફિરાકમાં હતો. ઝફર ગોરવામાં એક કાચા મકાનમાં છેલ્લા થોડાક દિવસથી રહેતો હતો. આતંકવાદીની વધારે પૂછપરછ માટે અમદાવાદમાં ગુજરાત એટીએસ ખાતે લાવવામાં આવ્યો છે.

આ આતંકી 26 ડિસેમ્બરથી ઝફર વડોદરામાં રહી રહ્યો હતો. આ આતંકીનો ઈરાદો વડોદરામાં સિમિના નવા અવતાર PFI નું માળખું તૈયાર કરવાનો હતો. આતંકી ઝફર પાસેથી એ.ટી.એસએ ઓટોમેટિક પિસ્તલ કબજે કરી છે. આ આતંકી ગોરવામાં અબ્દુલ રહીમના નામથી રહેતો હતો. આતંકીને જંબુસરથી વડોદરા આવવા લોજિસ્ટિક સપોર્ટ મળ્યો. લોજિસ્ટિક સપોર્ટ માટે મદદ કરનારની પણ પોલીસે અટકાયત કરી છે:

સૂત્રોના મતે તમિલનાડુના તમિલનાડુનું ફંડામેન્ટલિસ્ટ ગ્રૂપના 6 આતંકીઓએ દેશના અલગ અલગ ભાગમાં હિજરત કરી હતી. જેમાંથી ઝફર ઉર્ફે ઉમર વડોદરાના ગોરવા પાસેથી ઝડપાયો છે. જ્યારે ત્રણ આતંકવાદી દિલ્હીથી ઝડપાયા છે.

એમેઝોનના સ્થાપક જેફ બેઝોસ આવતા અઠવાડિયે ભારત આવશે

January 10, 2020

નવી દિલ્હી – અમેરિકાની કંપની એમેઝોનના સ્થાપક જેફ બેઝોસ આવતા અઠવાડિયે ભારતની મુલાકાતે આવવાના છે અને નવી દિલ્હીમાં એ વડા પ્રધાન નરેન્દ્ર મોદી તથા અન્ય ટોચના અધિકારીઓ તથા ભારતના ઉદ્યોગક્ષેત્રના આગેવાનોને પણ મળે એવી ધારણા છે.

બેઝોસ 15-16 જાન્યુઆરીએ નવી દિલ્હીમાં નિર્ધારિત એક કાર્યક્રમ ‘SMBhav’માં હાજરી આપવા ભારત આવી રહ્યા છે. એ કાર્યક્રમ ભારતમાં નાના તથા મધ્યમ સ્તરના ઉદ્યોગો પર ધ્યાન કેન્દ્રિત કરવાને લગતો છે.

ભારતના પ્રવાસ અને વડા પ્રધાન મોદી સાથે મુલાકાત અંગે બેઝોસે પોતે હજી સત્તાવાર રીતે કંઈ કહ્યું નથી.

એમેઝોન કંપની ભારતમાં તેના વ્યાપારમાં નોંધપાત્ર વૃદ્ધિ કરવા ધારે છે. જોકે એમેઝોન અને વોલ્માર્ટની માલિકીની ફ્લિપકાર્ટ સહિત ઈ-કોમર્સ કંપનીઓ સામે ભારતમાં નાના અને મધ્યમ સ્તરના વેપારીઓમાં રોષ પ્રગટે છે, એનાથી પણ એમેઝોન વાકેફ છે. આવી ઈ-કોમર્સ કંપનીઓ ગ્રાહકોને વધારે પડતા ઊંચા ડિસ્કાઉન્ટ ઓફર કરીને અયોગ્ય ધંધાકીય પ્રથા ચલાવે છે એવો ભારતના વેપારીઓનો આરોપ છે.