ભારતમાં ડિજિટલ પેમેન્ટની ક્રાંતિ અટકવાનું નામ નથી લઈ રહી. માર્ચ 2026ના મહિનામાં યુનિફાઇડ પેમેન્ટ્સ ઇન્ટરફેસ (UPI) એ 22.64 અબજ ટ્રાન્ઝેક્શનનો નવો રેકોર્ડ સ્થાપ્યો છે. ડિપાર્ટમેન્ટ ઓફ ફાઇનાન્શિયલ સર્વિસિસના જણાવ્યા અનુસાર, ડિજિટલ પેમેન્ટના ક્ષેત્રમાં આ અત્યાર સુધીનું સર્વોચ્ચ સ્તર છે, જે દર્શાવે છે કે સામાન્ય માણસ હવે રોકડ વ્યવહારને બદલે UPI ને વધુ પ્રાધાન્ય આપી રહ્યો છે.
જો આંકડાકીય સરખામણી કરીએ તો, માર્ચ 2025 માં 18.3 અબજ ટ્રાન્ઝેક્શન થયા હતા, જેની સરખામણીએ આ વર્ષે 24% નો વધારો જોવા મળ્યો છે. ફેબ્રુઆરી 2026 માં આ આંકડો 20.39 અબજ હતો. UPI ની આ સફળતા પાછળ તેની સુરક્ષા અને સરળતા મુખ્ય કારણ છે. RBI ના ટુ-લેયર સિક્યોરિટી ફીચરના કારણે લોકોનો તેના પર વિશ્વાસ વધ્યો છે.
આજે દેશમાં થતા કુલ ડિજિટલ વ્યવહારોમાં UPI નો હિસ્સો 85% સુધી પહોંચી ગયો છે. માત્ર ભારત જ નહીં, પરંતુ વૈશ્વિક સ્તરે પણ UPI ડંકો વગાડી રહ્યું છે. સિંગાપોર, UAE, ફ્રાન્સ અને મોરેશિયસ જેવા દેશોમાં પણ હવે ભારતીયો UPI દ્વારા પેમેન્ટ કરી શકે છે. નેશનલ પેમેન્ટ્સ કોર્પોરેશન ઓફ ઇન્ડિયા (NPCI) દ્વારા સંચાલિત આ સિસ્ટમ હવે વૈશ્વિક પેમેન્ટ મોડલ બની રહી છે.
