ભારત-ઓસ્ટ્રેલિયા વચ્ચે રમાયેલી બોર્ડર-ગાવસ્કર ટ્રોફી દરમિયાન આર. અશ્વિને અધવચ્ચે જ અચાનક આંતરરાષ્ટ્રીય ક્રિકેટમાંથી નિવૃત્તિ જાહેર કરતાં સૌ કોઈ ચોંકી ગયા હતાં. આ નિર્ણય પર અનેક અટકળો વહેતી થઈ હતી, જેના પર પૂર્ણવિરામ મૂકતાં આર. અશ્વિને અંતે પોતાનું મૌન તોડ્યું છે અને જણાવ્યું છે કે, ‘આ નિર્ણય મારો પોતાનો હતો, કોઈના દબાણમાં કે, અયોગ્ય વ્યવહારના કારણે ક્રિકેટમાંથી સંન્યાસ લીધો નથી.’
આ નિવૃતેને લઈ અશ્વિનના પિતાએ કહ્યું હતું કે, ‘મારા પુત્રનું અપમાન થયુ હોવાથી તેણે અચાનક ક્રિકેટમાંથી સંન્યાસ લઈ લીધો છે.’ જો કે, અશ્વિને પિતાના આ નિવેદનને ખોટું ઠેરવ્યું હતું અને માફી પણ માગી હતી. પરંતુ બીજી બાજુ અશ્વિને પોતાની યૂટ્યૂબ ચેનલ પર કહ્યું છે કે, ‘હું હજુ ઘણું ક્રિકેટ રમી શક્યો હોત પરંતુ મને લાગ્યું કે મારી ક્રિએટીવિટી પૂર્ણ થઈ ચૂકી છે. મેં અનુભવ્યું કે, મારૂ કામ અહીં પૂર્ણ થયું. આથી મેં સંન્યાસ લેવાનો નિર્ણય લીધો. હું વિચારી રહ્યો છું કે, જીવનમાં આગળ શું કરવું. તમારે બધાએ પણ સમજવુ પડશે કે, આ બધું આપમેળે થઈ જાય છે. મારી નિવૃત્તિ મારો પોતાનો નિર્ણય છે.’ વધુમાં તેણે ઉમેર્યું હતું કે, ‘મારા રિટાયરમેન્ટ પર ઘણા લોકોએ વિવિધ અટકળો લગાવી અને ઘણુ બધુ કહ્યું. પરંતુ તમામ નિર્ણય મારા પોતાના હતા. હું પ્રથમ ટેસ્ટ મેચ રમ્યો, બીજી ના રમ્યો, ત્રીજી ટેસ્ટમાં ફરી પાછો આવ્યો. પરંતુ સારૂ પર્ફોર્મન્સ આપી શક્યો નહીં. જેથી ચોથી ટેસ્ટ મેચ ન રમવાનો નિર્ણય લીધો. આ મારી ફેરવેલ ટેસ્ટ સીરિઝ હોવાથી મારૂ ખરાબ પર્ફોર્મન્સ હોવા છતાં મને ટીમમાં સામેલ કરવામાં આવતો. પરંતુ હું માનુ છું કે, ફક્ત રમવા ખાતર રમવું એના કરતાં ન રમવું વધુ સારૂ છે. હું રમત પ્રત્યે ઈમાનદાર રહેવા માગુ છું. જો હું ટીમમાં રમવા માટે લાયક થી, તો હું પોતે જ નહીં ઈચ્છું કે, મને તમે ટીમમાં સામેલ કરો. ‘ અશ્વિને રિટાયરમેન્ટ બાદ આ વીડિયો મારફત તમામ અટકળો પર પૂર્ણવિરામ મૂક્યો છે.
