ઇસ્લામાબાદમાં અમેરિકા અને ઈરાન વચ્ચે ચાલી રહેલી શાંતિ મંત્રણા દરમિયાન પાકિસ્તાન આર્મી ચીફ આસિમ મુનીરના પહેરવેશની વ્યાપક ચર્ચા થઈ રહી છે. મુનીરે ઈરાની પ્રતિનિધિમંડળનું સ્વાગત પૂરા લશ્કરી સાજો-સામન અને કોમ્બેટ યુનિફોર્મમાં કર્યું હતું, જે સરહદી સુરક્ષા અને સૈન્ય તાકાતનો સંકેત માનવામાં આવે છે. જોકે, થોડા જ કલાકોમાં જ્યારે અમેરિકી ઉપરાષ્ટ્રપતિ જેડી વેન્સ પાકિસ્તાન પહોંચ્યા ત્યારે મુનીર લશ્કરી વર્દી ત્યાગીને અત્યંત આધુનિક બ્લેક સૂટમાં સજ્જ જોવા મળ્યા હતા. આ ફેરફાર પાછળ પાકિસ્તાનની સત્તાનું પ્રદર્શન અને અમેરિકા પ્રત્યેનો કૂટનીતિક અભિગમ હોવાનું મનાય છે.
Field Marshal Gen Asim Munir showing J.D Vance Nur Khan Base which Modiots had destroyed last year in their dreams!! 🇵🇰🇵🇰🇵🇰#IslamabadTalks #IslamabadAccords #IranUSTalks pic.twitter.com/mVATKymz3a
— Usman Satti (@usmansatti476) April 11, 2026
ઇસ્લામાબાદના એરબેઝ પર જ્યારે ઈરાનનું 70 સભ્યોનું વિશાળ પ્રતિનિધિમંડળ ઉતર્યું, ત્યારે જનરલ આસિમ મુનીર તેમને મળવા માટે પોતાની જંગી વર્દી (કોમ્બેટ ગિયર) માં પહોંચ્યા હતા. સંરક્ષણ નિષ્ણાતોના મતે, ઈરાન સાથે પાકિસ્તાનના સંબંધોમાં છેલ્લા કેટલાક સમયથી ઉતાર-ચઢાવ જોવા મળ્યા છે, ખાસ કરીને ૨૦૨૪ની શરૂઆતમાં બંને દેશોએ એકબીજા પર કરેલા મિસાઈલ હુમલા બાદ તણાવ વધ્યો હતો. ઈરાની નેતાઓ સામે સૈન્ય યુનિફોર્મમાં હાજર રહીને મુનીરે એવો સંદેશ આપ્યો છે કે તેઓ એક સૈનિક છે અને પોતાની સીમાઓની રક્ષા માટે હંમેશા સજ્જ છે. આ એક પ્રકારનું ‘પાવર પ્રોજેક્શન’ હતું જે ઈરાનને પાકિસ્તાની સેનાની સતર્કતાનો અહેસાસ કરાવવા માટે હતું.
બીજી તરફ, અમેરિકી ઉપરાષ્ટ્રપતિ જેડી વેન્સ અને તેમની ટીમ સામે આસિમ મુનીરનો લુક સંપૂર્ણપણે બદલાઈ ગયો હતો. ત્યાં તેઓ કોઈ ફૌજી જનરલ નહીં પરંતુ એક ગંભીર રાજનેતા કે ઉચ્ચ અધિકારી તરીકે દેખાઈ રહ્યા હતા. કાળા રંગના સૂટમાં સજ્જ મુનીરે જેડી વેન્સ સાથે રેડ કાર્પેટ પર ચાલતી વખતે જે આત્મવિશ્વાસ બતાવ્યો, તે સાબિત કરે છે કે તેઓ અમેરિકા સાથે એક કૂટનીતિક અને વ્યૂહાત્મક સંબંધ બનાવવા માંગે છે. અગાઉ ડોનાલ્ડ ટ્રમ્પ સાથેની મુલાકાતમાં પણ તેઓ સૂટમાં જોવા મળ્યા હતા, જે દર્શાવે છે કે પશ્ચિમી દેશો સાથેના વ્યવહારમાં તેઓ પોતાને એક વૈશ્વિક લીડર તરીકે સ્થાપિત કરવા માંગે છે.
આ સમગ્ર ઘટનાક્રમ પાછળ પાકિસ્તાનની આંતરિક રાજનીતિનો પણ મોટો હાથ છે. પાકિસ્તાનમાં ભલે લોકશાહી સરકાર હોય, પરંતુ મોટા નિર્ણયોમાં સેનાનો દબદબો હંમેશા રહ્યો છે. આસિમ મુનીરે આ વૈશ્વિક મંચનો ઉપયોગ એ બતાવવા માટે કર્યો કે પાકિસ્તાનમાં અસલી પાવર સેન્ટર વડાપ્રધાનના નિવાસસ્થાને નહીં પણ સેનાના મુખ્યાલય (GHQ) માં છે. જેડી વેન્સ સાથેની તેમની મુલાકાત અને ફોટોગ્રાફ્સ સોશિયલ મીડિયા પર વાયરલ થયા છે, જેમાં તેઓ પાકિસ્તાનના રક્ષક અને નિર્ણાયક બંને તરીકે ઉભરી આવ્યા છે. જોકે, અમેરિકાએ પણ આ સ્થિતિને સમજીને સંતુલન જાળવવાનો પ્રયાસ કર્યો છે.
