અમદાવાદઃ ભારતીય શેરબજારમાં અત્યાર સુધીનો સૌથી મોટો ઘટાડો જોવા મળ્યો છે. કોરોના વાઇરસને WHOએ વૈશ્વિક સ્તરે રોગચાળો જાહેર કર્યો હતો. વળી, કોરોના વાઇરસના કેસના કેસ કૂદકે ને ભૂસકે વધી રહ્યો છે, એ જોતાં વૈશ્વિક બજારમાં ભાગે ગભરાટ ફેલાયો હતો. ભારત સહિત અનેક દેશો સાવચેતીરૂપે તેમના દેશમાં ફોરેનર્સના આવવા પર પ્રતિબંધ મૂક્યો હતો. જેથી વૈશ્વિક અર્થતંત્રને લઈને અસમંજસતાભર્યો માહોલ છે. જેને લીધે વૈશ્વિક શેરબજારોમાં ગભરાટ વ્યાપી ગયો હતો. જેથી સેન્સેક્સ 3000 પોઇન્ટ નિફ્ટી ઇન્ડેક્સ પણ 900 પોઇન્ટ તૂટ્યા હતા.
BSE-500- એક મહિનામાં 98 શેરોએ નકારાત્મક રિટર્ન આપ્યું
શેરબજારો પર કોરોનો વાઇરસનો ઓછાયો છે, ત્યારે BSE-500 ઇન્ડેક્સ એક મહિના દરમ્યાન 3,149 પોઇન્ટ તૂટ્યો છે. આ ઇન્ડેક્સમાંના 500 શેરો પૈકી 492 શેરોએ નકારાત્મક વળતર આપ્યું છે અને આ શેરો 64 ટકા સુધી તૂટ્યા છે.
બે કલાકમાં રોકાણકારોના રૂ. 11 લાખ કરોડ સ્વાહા
મુંબઈ શેરબજારમાં સેન્સેક્સ 2800 પોઇન્ટ કરતાં વધુ તૂટ્યો છે, ત્યારે બીએસઈ પર લિસ્ટેડ કંપનીઓનું માર્કેટ કેપ રૂ. 1,26,12,428 કરોડ થઈ ગયું છે, જે ગઈ કાલે આ કંપનીઓનું માર્કેટ કેપ 1,37,13,558.72 કરોડ હતું. આમ માત્ર બે કલાકમાં જ રોકાણકારોના રૂ. 11 લાખ કરોડ સાફ થઈ ગયા હતા.
ડોલર સામે રૂપિયામાં ધોવાણ
ફોરેક્સ માર્કેટમાં ડોલરની સામે રૂપિયા બજાર ખૂલતાની સાથે જ 74.50 થયો હતો. પ્રારંભમાં ડોલર સામે રૂપિયો 82 પૈસા તૂટ્યો હતો. કોરોના વાઇરસને કારણે આર્થિક મંદીને કારણે ડોલર સામે રૂપિયામાં ભારે ધોવાણ થયું હતું. ડોલર સામે રૂપિયો 17 મહિનાની નીચી સપાટીએ હતો.
