નવી દિલ્હી: ભારતમાં સેટેલાઇટ ઇન્ટરનેટ સેવા શરૂ કરવાને મુદ્દે એલન મસ્કની કંપની સ્ટારલિંક અને રિલાયન્સ ઇન્ડસ્ટ્રીઝ વચ્ચે નિવેદનબાજી તેજ બની છે. સ્ટારલિંકે શુક્રવારે કહ્યું હતું કે તે ભારતમાં હાઇ-સ્પીડ ઇન્ટરનેટ સેવા શરૂ કરવા માટે તૈયાર છે. કંપનીનો દાવો છે કે આ તમામ તૈયારીઓ જરૂરી સરકારી મંજૂરીઓ સાથે કરવામાં આવી છે.
સ્ટારલિંકે સોશિયલ મિડિયા પ્લેટફોર્મ X પર પોતાનું નિવેદન જાહેર કરતી વખતે રિલાયન્સ ઇન્ડસ્ટ્રીઝના નિવેદનને પણ ટેગ કર્યું હતું. આ પહેલાં રિલાયન્સે કહ્યું હતું કે તે સેટેલાઇટ કોમ્યુનિકેશન ક્ષેત્રમાં સ્ટારલિંક સહિત અન્ય કંપનીઓના પ્રવેશને આવકારે છે. જોકે કંપનીએ સ્પષ્ટ કર્યું હતું કે ભારતમાં વ્યવસાય કરતી દરેક કંપનીએ દેશના કાયદા અને સરકારી નીતિઓનું પાલન કરવું પડશે.
ભારતમાં ઇન્ટરનેટ સેવા આપવા તૈયાર: સ્ટારલિંક
સ્ટારલિંકનું કહેવું છે કે તેણે ભારતમાં સુરક્ષિત ઇન્ટરનેટ સેવા પૂરી પાડવા માટે જરૂરી નેટવર્ક અને ટેકનિકલ સુવિધાઓ તૈયાર કરી લીધી છે. કંપનીએ જણાવ્યું હતું કે આ તમામ સુવિધાઓ દેશમાં જ ઊભી કરવામાં આવી છે, જેથી ભારતીય ગ્રાહકોના ઇન્ટરનેટ ટ્રાફિકને સુરક્ષિત રીતે સંભાળી શકાય.
સ્ટારલિંકના નિવેદન પહેલાં રિલાયન્સ ઇન્ડસ્ટ્રીઝે કહ્યું હતું કે તે બજારમાં અન્ય કંપનીઓ સાથે સ્પર્ધા કરવામાં પાછળ હટતી નથી. કંપનીનું માનવું છે કે સ્પર્ધા દ્વારા જ નક્કી થાય છે કે કઈ કંપની ગ્રાહકોને વધુ સારી સેવાઓ આપી રહી છે. રિલાયન્સે Jioની શરૂઆતનો ઉલ્લેખ કરતાં જણાવ્યું હતું કે કંપનીએ 2016માં ટેલિકોમ બજારમાં પ્રવેશ કર્યો હતો. તે સમયે Jio પાસે એક પણ ગ્રાહક નહોતો, પરંતુ લગભગ દસ વર્ષમાં તેના ગ્રાહકોની સંખ્યા 53 કરોડથી વધુ થઈ ગઈ છે. કંપનીએ કહ્યું હતું કે આ સમયગાળા દરમિયાન તેણે દેશમાં ડિજિટલ સુવિધાઓનો વિસ્તાર કર્યો અને લોકોને ઓછા ભાવે ડેટા ઉપલબ્ધ કરાવ્યો છે.
સરકારે પક્ષપાતના આરોપો ફગાવ્યા
સ્ટારલિંકને લઈને ચાલી રહેલા વિવાદ વચ્ચે કેન્દ્ર સરકારે સ્પષ્ટ કર્યું છે કે ભારતમાં સેટેલાઇટ ઇન્ટરનેટ સેવા આપતી તમામ કંપનીઓએ એકસરખી પ્રક્રિયામાંથી પસાર થવું પડશે. સરકારી સૂત્રોએ જણાવ્યું કે દેશમાં વ્યવસાય કરવા માટે ભારતીય કાયદાઓનું પાલન કરવું જરૂરી છે.
