દેશને સંબોધનમાં રાષ્ટ્રપતિ પુતિને ફરીથી ભારતનો ઉલ્લેખ કર્યો

રશિયા અને યુક્રેન વચ્ચેના યુદ્ધને એક વર્ષ પૂર્ણ થવા જઈ રહ્યું છે, પરંતુ સંઘર્ષ હજુ પણ ચાલુ છે. આ દિવસોમાં રશિયાએ યુક્રેનના પૂર્વ અને દક્ષિણ ભાગો પર હુમલા તેજ કર્યા છે. રશિયાના રાષ્ટ્રપતિ વ્લાદિમીર પુતિને રાષ્ટ્રને સંબોધતા કહ્યું કે, યુક્રેનમાં રશિયાનું વિશેષ ઓપરેશન ચાલુ છે કારણ કે તે નાઝી ધમકીઓ સામે લડે છે. મોસ્કોમાં ગોસ્ટિવની ડ્વોર હોલમાં પોતાના ભાષણમાં પુતિને ભારતનો પણ ખાસ ઉલ્લેખ કર્યો અને કહ્યું કે રશિયા તેની સાથે સહયોગ અને વેપાર વધારતું રહેશે. પુતિને ભારત, ચીન અને અન્ય દેશો સાથે વેપાર વધારવા માટે નોર્થ સાઉથ કોરિડોર બનાવવાની પણ જાહેરાત કરી હતી. તેમણે કહ્યું, રશિયા વિદેશી આર્થિક સંબંધોને વિસ્તારશે અને નવા લોજિસ્ટિક કોરિડોર બનાવશે. રશિયાએ ગયા વર્ષે 24 ફેબ્રુઆરીએ યુક્રેન પર આક્રમણ કર્યું હતું.

પુતિને કહ્યું કે તેઓ ભારત, ઈરાન, ચીન, પાકિસ્તાન જેવા દેશો સાથે આર્થિક સંબંધો વધારવા માટે ઉત્તર દક્ષિણ કોરિડોરનો વિકાસ કરશે. ઈન્ડો-પેસિફિક ક્ષેત્રના મહત્વ પર ભાર મૂકતા તેમણે કહ્યું કે, અમે ભારત, ઈરાન, પાકિસ્તાન સાથે સહયોગ વધારવા માટે આતુર છીએ. અમે ભારત સાથે અમારો વેપાર વધારવા માટે ઉત્તર-દક્ષિણ કોરિડોરનું નિર્માણ કરવાનું ચાલુ રાખીશું.

રશિયન રાષ્ટ્રપતિએ વધુમાં કહ્યું કે રેલ્વેનું આધુનિકીકરણ અને ઉત્તરીય શિપિંગ રૂટમાં સુધારો પણ અમારી યોજનાનો એક ભાગ છે. અમે બ્લેક અને એઝોવ સી રૂટ્સ, નોર્થ-સાઉથ કોરિડોરના બંદરોનો વિકાસ કરીશું અને દરિયાઈ માર્ગની ક્ષમતામાં વધારો કરીશું. આનાથી ચીન, ભારત, ઈરાન અને અન્ય મિત્ર દેશો સાથે સહયોગ વિસ્તરશે અને ગાઢ બનશે.

રશિયાના રાષ્ટ્રપતિએ એવા સમયે દેશને સંબોધન કર્યું છે જ્યારે અમેરિકાના રાષ્ટ્રપતિ અચાનક યુક્રેન પહોંચી ગયા છે. આ યુદ્ધમાં અમેરિકા, બ્રિટન, જર્મની સહિત ઘણા દેશો યુક્રેનની મદદ કરી રહ્યા છે. ગયા વર્ષે સપ્ટેમ્બરમાં પુતિને ઔપચારિક રીતે યુક્રેનના ચાર વિસ્તારોને પોતાનો ભાગ જાહેર કર્યા હતા. આ પછી, ક્રેમલિનમાં એક કાર્યક્રમમાં તેણે પશ્ચિમી દેશો પર આકરા પ્રહારો કર્યા. તેમણે કડક સ્વરમાં એમ પણ કહ્યું હતું કે મંત્રણા દરમિયાન કબજા હેઠળના વિસ્તારોની ચર્ચા કરવામાં આવશે નહીં. ભારતનો ઉલ્લેખ કરતાં પુતિને એમ પણ કહ્યું કે પશ્ચિમી દેશોએ ભારતને જે રીતે લૂંટ્યું તે જ કરવા માટે તેઓ રશિયાને કોલોની બનાવવા માંગે છે.

[ અમને ફોલો કરો:    Facebook   | Twitter   | Instagram  | Telegram 

તમારા મોબાઇલમાં 9820649692 આ નંબર Chitralekha નામે સેવ કરી અમને વ્હોટસએપ પર તમારું નામ અને ઈ-મેઈલ લખીને મોકલો અને તમને મનગમતી વાંચન સામગ્રી મેળવો .]