ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ (GSEB) દ્વારા 5 મે, 2025ના રોજ ધોરણ 12 સામાન્ય પ્રવાહ, વિજ્ઞાન પ્રવાહ અને ગુજકેટના પરિણામો જાહેર કરવામાં આવ્યા. આ પરિણામોમાં કલોલના રહેવાસી અમિતભાઈ શાહની દીકરી પ્રાચી શાહે ધોરણ 12 સામાન્ય પ્રવાહમાં 99.99 પર્સન્ટાઈલ અને 97% મેળવીને પરિવાર અને શહેરનું નામ રોશન કર્યું છે. આ સિદ્ધિથી પરિવારમાં ઉત્સવનો માહોલ છે, અને કલોલમાં પ્રાચીની આ ઉપલબ્ધિની ચર્ચા ચારેકોર થઈ રહી છે.
ધોરણ 10માં પણ ઝળકેલી પ્રાચી
પ્રાચી શાહ શૈક્ષણિક કાર્કિદીમાં પહેલાથી જ શ્રેષ્ઠતા દર્શાવી હતી. ધોરણ 10માં પણ તેમણે પોતાના માતા પિતાનું નામ રોશન કર્યું હતું. તેમણે ધોરણ 10માં 99.99 પર્સન્ટાઈલ મેળવ્યા હતા. પોતાનું સપનું ચાર્ટર્ડ એકાઉન્ટન્ટ (CA) બનવાનું હોવાથી, તેણે વિજ્ઞાન પ્રવાહને બદલે કોમર્સ પસંદ કર્યું. પરિવારે તેના આ નિર્ણયને સંપૂર્ણ સમર્થન આપ્યું હતું. પ્રાચીએ પરિવારના વિશ્વાસ પર ખરું ઉતરીને ધોરણ 12માં આ અસાધારણ પરિણામ હાંસલ કર્યું છે.
સફળતાનું રહસ્ય: મહેનત અને શિસ્ત
આ અસાધારણ સફળતાનું રહસ્ય જણાવતા પ્રાચી શાહે ચિત્રલેખા.કોમને જણાવ્યું કે “તે સ્કૂલ અને ટ્યૂશન ઉપરાંત રોજ 6 કલાક અભ્યાસ કરતી હતી. તેણે મોબાઈલ ફોનનો ઉપયોગ લગભગ બંધ કરી દીધો હતો અને એકપણ ટીવી સિરિયલ જોવાનું ટાળ્યું હતું. પ્રાચીએ ખાસ કરીને તેના માતા-પિતા અને પરિવારના સહકારને તેની સફળતાનું મુખ્ય કારણ ગણાવ્યું. તેની આ શિસ્ત અને સમર્પણ અન્ય વિદ્યાર્થીઓ માટે પ્રેરણારૂપ છે.”પ્રાચી શાહની આ સિદ્ધિ માત્ર તેના પરિવાર માટે જ નહીં, પરંતુ સમગ્ર કલોલ અને ગુજરાત માટે ગર્વની વાત છે. તેનું CA બનવાનું સપનું અને તેને પૂર્ણ કરવા માટેની મહેનત અન્ય વિદ્યાર્થીઓને પણ પોતાના લક્ષ્યો પ્રત્યે સમર્પિત રહેવાની પ્રેરણા આપે છે. પ્રાચીની આ સફળતા દર્શાવે છે કે શિસ્ત, પરિશ્રમ અને પરિવારના સમર્થનથી કોઈપણ લક્ષ્ય હાંસલ કરી શકાય છે.
ગુજરાત બોર્ડનું એકંદર પરિણામ
ગુજરાત બોર્ડના આ વર્ષના પરિણામમાં ધોરણ 12 સામાન્ય પ્રવાહનું 93.07% અને વિજ્ઞાન પ્રવાહનું 83.51% પરિણામ જાહેર થયું છે. ગુજકેટનું પરિણામ 94.04% રહ્યું છે. આ પરિણામો ઓનલાઈન gseb.org પર ઉપલબ્ધ છે, જ્યાં વિદ્યાર્થીઓ પોતાના સીટ નંબરનો ઉપયોગ કરીને પરિણામ ચકાસી શકે છે.
