સુરેન્દ્રનગર: ગુજરાતમાં સરકારી જમીન પર ગેરકાયદે બાંધકામ કરીને દબાણ કરનારા સામે તંત્ર એક્શમાં મોડમાં આવ્યું છે. પાછલા એક સપ્તાહમાં દેવભૂમિ દ્વારકા અને જામનગર જિલ્લા સહિત આસપાસના ટાપુ પર દૂર કરવાની કામગીરી કરવામાં આવી હતી. ત્યારે હવે દાદાનું બુલડોઝર સુરેન્દ્રનગર જિલ્લામાં ફરી વળ્યું છે. યાત્રાધામ ચોટીલામાં વહીવટીતંત્ર દ્વારા ચામુંડા માતાજીના ડુંગરની તળેટીમાં ગેરકાયદે દબાણ દૂર કરવા માટે વહીવટીતંત્રે બુલડોઝર ફેરવ્યું હતું.
સૂત્રો પાસેથી મળતી માહિતી અનુસાર ચોટીલા વહીવટી તંત્ર સહિતની ટીમ દ્વારા ચોટીલા ડુંગર તળેટી વિસ્તારમાં ગેરકાયદે અને નડતરરૂપ દબાણો હટાવવાની કામગીરી હાથધરવામાં આવી હતી. જેમાં બુલડોઝરની મદદથી તળેટી વિસ્તારમાં આવેલ અલગ-અલગ અંદાજે 200થી વધુ દુકાનોના છાપરાઓને જેસીબીની મદદથી હટાવવામાં આવ્યા હતા. ડેપ્યુટી કલેક્ટરના નેતૃત્વમાં થયેલી આ કાર્યવાહી પહેલા વહીવટીતંત્રે તમામ અતિક્રમણકારોને નોટિસ આપી હતી અને સ્વેચ્છાએ અતિક્રમણ દૂર કરવા જણાવ્યું હતું. જોકે, સૂચના છતાં અતિક્રમણ દૂર કરવામાં આવ્યા ન હતા. તેથી વહીવટીતંત્રને કડક કાર્યવાહી કરવાની ફરજ પડી હતી. ચોટીલા ડેપ્યુટી કલેકટરની ટીમે ચુસ્ત પોલીસ બંદોબસ્ત સાથે ડુંગરની તળેટીથી રસ્તા સુધી અતિક્રમણ કરાયેલી દુકાનો પર બુલડોઝર ફેરવવામાં આવ્યા હતા. દબાણો હટાવ્યા હતા. ઉલ્લેખનીય છે કે, આ કાર્યવાહી બાદ સમગ્ર વિસ્તારમાં અરાજકતાનું વાતાવરણ સર્જાયું હતું અને અતિક્રમણકારોમાં ખળભળાટ મચી ગયો હતો. વહીવટીતંત્ર દ્વારા કરવામાં આવેલી આ કડક કાર્યવાહીથી અન્ય વિસ્તારોમાં પણ અતિક્રમણકારોમાં ચિંતાનું મોજું ફરી વળ્યું છે.
