જાણે મહારાષ્ટ્રની સરકારી હોસ્પિટલો પર આફત આવી પડી હોય. એક પછી એક સમાચાર સામે આવી રહ્યા છે કે હોસ્પિટલમાં કેટલાય દર્દીઓએ જીવ ગુમાવ્યો છે. પહેલા નાંદેડમાં, પછી છત્રપતિ સંભાજીનગરમાં અને હવે નાગપુરની બે સરકારી હોસ્પિટલમાં 24 કલાકમાં મોટી સંખ્યામાં દર્દીઓએ જીવ ગુમાવ્યા છે. અધિકારીઓના જણાવ્યા અનુસાર, મરાઠવાડાના નાંદેડમાં ડૉ. શંકરરાવ ચવ્હાણ સરકારી મેડિકલ કૉલેજ અને હોસ્પિટલમાં 30 સપ્ટેમ્બરથી 1 ઑક્ટોબર વચ્ચેના 24 કલાકમાં 24 લોકોના મોત થયા છે, જ્યારે 1 થી 2 ઑક્ટોબરની વચ્ચે વધુ સાત લોકોએ જીવ ગુમાવ્યા છે. આ સાથે કુલ મૃત્યુઆંક 31 પર પહોંચી ગયો છે. તે જ સમયે, મંગળવારે સવારે 8 વાગ્યા સુધીના 24 કલાકમાં છત્રપતિ સંભાજીનગરની સરકારી મેડિકલ કોલેજ અને હોસ્પિટલમાં (GMCH) ઓછામાં ઓછા 18 લોકોના મોત થયા હતા.
નાગપુરના જીએમસીએચમાં 14 મૃત્યુ પામ્યા
હોસ્પિટલના અધિકારીઓએ જણાવ્યું કે નાગપુરની સરકારી મેડિકલ કોલેજ અને હોસ્પિટલમાં બુધવારે સવારે 8 વાગ્યા સુધીના 24 કલાકમાં લગભગ 14 લોકોના મોત થયા છે. જીએમસીએચ ડીન ડૉ. રાજ ગજભીયે જણાવ્યું હતું કે હોસ્પિટલમાં 1,900 બેડ છે. અહીં દરરોજ સરેરાશ 10 થી 12 દર્દીઓના મોત થાય છે. તેમણે કહ્યું કે જે દર્દીઓ છેલ્લી ક્ષણે રેફર થયા પછી અહીં આવે છે અને જેમની સ્થિતિ ખૂબ જ ગંભીર છે, તેઓ અહીં વધુ મૃત્યુ પામે છે. તેમણે કહ્યું કે દેશભરમાંથી લોકો અહીં સારવાર માટે આવે છે.
ઈન્દિરા ગાંધી સરકારી મેડિકલ કોલેજ અને હોસ્પિટલમાં પણ મૃત્યુ
તે જ સમયે, એક અધિકારીએ જણાવ્યું હતું કે શહેરની ઇન્દિરા ગાંધી સરકારી મેડિકલ કોલેજ અને હોસ્પિટલમાં 24 કલાકમાં નવ મૃત્યુ નોંધાયા છે. અહીં પણ મૃત્યુ પામેલા મોટાભાગના દર્દીઓ એવા હતા જેમને ગંભીર હાલતમાં લાવવામાં આવ્યા હતા. આમાં એવા દર્દીઓ પણ સામેલ હતા જેમને વેન્ટિલેટરની જરૂર હતી. અધિકારીએ કહ્યું કે આ હોસ્પિટલમાં 800 બેડની ક્ષમતા છે અને અહીં દરરોજ છ દર્દીઓ મૃત્યુ પામે છે. હોસ્પિટલમાં દવાઓ અને અન્ય સુવિધાઓનો પૂરતો સ્ટોક છે.
