મુંબઈ- નબળી ‘રિઝલ્ટ સીઝન’ અને સાનુકૂળ સમાચારોના અભાવે ભારતીય બજાર સતત દબાણમાં છે. બજેટ પછી સેન્સેક્સ-નિફ્ટીમાં મોટું કરેક્શન નોંધાયું છે. બજાજ ઓટો, ટાટા સ્ટીલ, ટાટા મોટર્સ, મારુતિ સુઝૂકી, હીરો મોટોકોર્પ, અશોક લેલેન્ડ અને EID પેરી સહિત 405 શેર્સ સોમવારે BSE પર 52 સપ્તાહના તળિયે પહોંચ્યાં છે.
ઇન્ડિયાબૂલ્સ ઇન્ટિગ્રેટેડ સર્વિસિસ, કોક્સ એન્ડ કિંગ્સ, યુનિટેક, એસ્સાર શિપિંગ, પૈસા કેપિટલ અને સોરિલ ઇન્ફ્રા રિસોર્સિસ જેવા શેર્સ સોમવારે નીચલી સર્કિટે બંધ રહ્યાં હતાં. ઉલ્લેખનીય છે કે, ભારતીય બજારમાં શુક્રવારનો સુધારો સપ્તાહની શરૂઆતમાં જ ધોવાઈ ગયો હતો.
જોકે, એશિયન પેઇન્ટ્સ, આધુનિક ઇન્ડસ્ટ્રીઝ, બનાસ ફાઇનાન્સ, પ્રોક્ટર એન્ડ ગેમ્બલ સહિતના 26 શેર્સ બાવન સપ્તાહની ટોચને સ્પર્શ્યા હતા. ઉપરાંત, જ્યુબિલન્ટ ઇન્ડસ્ટ્રીઝ, એસ્ટેક લાઇફસાયન્સિસ, મંગલમ્ ડ્રગ્સ, 63 મૂન્સ, ઇલેક્ટ્રોથર્મ (ઇન્ડિયા) સહિતના 118 શેર્સમાં અપર સર્કિટ લાગી હતી.
બજારમાં સોમવારના ઘટાડાને કારણે BSE પર લિસ્ટેડ કંપનીઓનું માર્કેટ-કેપ ઘટીને 1,42,45,433.92 કરોડ થયું છે, જે શુક્રવારે 1,43,82,243.21 કરોડ હતું. આ સાથે એક જ દિવસમાં રોકાણકારોની 1.36 લાખ કરોડની સંપત્તિનું ધોવાણ થયું છે. L&T, NTPC, વોલ્ટેમ્પ ટ્રાન્સફોર્મર્સ, NIIT ટેક્નોલોજિસ, મહિન્દ્રા લાઇફસ્પેસ, ઇન્ડિયા સિમેન્ટ્સ, બેન્ક ઓફ મહારાષ્ટ્ર, અદાણી ટ્રાન્સમિશન અને મેક્સ ફાઇનાન્શિયલ સર્વિસિસમાં સપ્તાહના પ્રારંભે નેગેટિવ બ્રેકઆઉટ નોંધાયો હતો અને આ શેર્સ 200 દિવસની મૂવિંગ એવરેજ નીચે સરક્યા હતા.
જોકે, JSW એનર્જી, ગ્રાઇન્ડવેલ નોર્ટન અને જ્યુબિલન્ટ ઇન્ડસ્ટ્રીઝ 200 દિવસની મૂવિંગ એવરેજ ઉપર ટ્રેડ થતા હતા. BSE પર 74 શેર્સમાં બુલિશ ક્રોસઓવર જોવા મળ્યું હતું. આગામી કેટલાંક સત્રમાં આ શેર્સ વધવાનો અંદાજ છે. આવા શેર્સમાં સુઝલોન એનર્જી, TCS, માઇન્ડટ્રી, GHCL, HCL ટેક, દીપક ફર્ટિલાઇઝર્સ, બિનાની ઇન્ડસ્ટ્રીઝ અને વરુણ બેવરેજિસનો સમાવેશ થાય છે. જોકે, વેદાંત, HDFC લાઇફ ઇન્શ્યોરન્સ, પાવર ગ્રિડ, અંબુજા સિમેન્ટ્સ, HUL અને PVR સહિતના 56 શેર્સમાં મંદી તરફી ક્રોસઓવર જોવા મળ્યું છે. એશિયનાં બજારોમાં નબળાઈ અને ભારતીય બજારમાં વિદેશી ફંડ્સની સતત વેચવાલીથી સેન્ટિમેન્ટ ખરડાયું હતું.
