યુરોપભરમાં બોમ્બની ધમકીઓને કારણે ગુરુવારે હાહાકાર મચી ગયો હતો. આ સુરક્ષા જોખમોના પગલે ઓછામાં ઓછી 12 પેસેન્જર ફ્લાઇટ્સના માર્ગ બદલવા પડ્યા હતા અથવા તો સાવચેતીના ભાગરૂપે કટોકટીભરી લેન્ડિંગ કરવી પડી હતી. એક જ સપ્તાહમાં આ પ્રકારની આ બીજી ઘટના છે, જેના કારણે અનેક દેશોના એરપોર્ટ પર સઘન સુરક્ષા તપાસ શરૂ કરવામાં આવી છે. ડબલિનથી રોમ જતી એર લિંગસની ફ્લાઇટ EI402 ને સુરક્ષાના કડક પગલાંરૂપે તેનો રૂટ બદલવો પડ્યો હતો અને તે ફ્રાન્સના પેરિસથી લગભગ 100 કિલોમીટર પશ્ચિમમાં આવેલા એવરેક્સ એરપોર્ટ પર હેમખેમ ઉતરી હતી. ઇટાલિયન પોલીસ દ્વારા આ વિમાનની બારીકાઈથી સુરક્ષા તપાસ કરવામાં આવી હતી, પરંતુ તપાસ દરમિયાન કોઈ વિસ્ફોટક પદાર્થ મળી આવ્યો ન હતો. આ ઉપરાંત, કોપનહેગન અને મેડ્રિડથી આવી રહેલી બે ફ્લાઇટ્સ સોફિયામાં લેન્ડ થઈ હતી, જ્યારે લંડનથી આવી રહેલું ત્રીજું એરક્રાફ્ટ પ્લોવદિવ ખાતે ઉતરાણ કર્યું હતું.
ચેક રિપબ્લિકમાં પણ સુરક્ષા તંત્ર હરકતમાં આવ્યું હતું, જ્યાં પ્રાગ જઈ રહેલા ચાર વિમાનોને તેમાં ઇમ્પ્રુવાઇઝ્ડ એક્સપ્લોસિવ ડિવાઇસ હોવાની ધમકી મળી હતી. સત્તાવાળાઓએ આ જોખમને ઓછું જોખમ ગણાવ્યું હતું, પરંતુ સ્પષ્ટ કર્યું હતું કે તમામ જરૂરી સુરક્ષા ઉપાયો સક્રિય કરી દેવામાં આવ્યા છે અને લેન્ડિંગ બાદ સઘન તપાસ હાથ ધરવામાં આવશે. આ ઉપરાંત, મિલનથી બુકારેસ્ટ જતી વિઝ એરની એક ફ્લાઇટમાં બોમ્બની ધમકી મળતા જ અંદર સવાર આશરે 200 મુસાફરોને તાત્કાલિક સુરક્ષિત બહાર કાઢવામાં આવ્યા હતા. આ એરક્રાફ્ટ હેનરી કોન્ડા ઇન્ટરનેશનલ એરપોર્ટ પર સુરક્ષિત રીતે લેન્ડ થયું હતું, જ્યાં રોમાનિયન અધિકારીઓએ તાત્કાલિક ધોરણે સુરક્ષા પ્રક્રિયા શરૂ કરીને તપાસ માટે બોમ્બ ડિસ્પોઝલ ટીમ તૈનાત કરી હતી.
આ તમામ નવી ઘટનાઓ ઓછામાં ઓછી સાત ફ્લાઇટ્સ અને એક ક્રૂઝ શિપને બોમ્બની ધમકી મળવાના માત્ર બે દિવસ પછી જ સામે આવી છે, જેના કારણે સમગ્ર યુરોપના એરપોર્ટ પર હવાઈ કામગીરી ગંભીર રીતે પ્રભાવિત થઈ છે. અગાઉ મંગળવારે પણ એલર્ટ જાહેર કરવામાં આવ્યું હતું, જેની તપાસ બાદ કોઈ વિસ્ફોટક સામગ્રી મળી ન હતી. હાલમાં આ ધમકીઓની જવાબદારી કોઈ પણ દેશે સ્વીકારી નથી, પરંતુ યુરોપિયન અધિકારીઓમાં રશિયા અને ઈરાન સાથે જોડાયેલા હાઇબ્રિડ હુમલાઓ તેમજ તોડફોડના ઓપરેશનોને લઈને ચિંતાઓ સતત વધી રહી છે.
વધુમાં, આ જ સપ્તાહમાં હૈકર્સ દ્વારા અનેક યુરોપિયન દેશોના સુપરમાર્કેટ્સ અને ફ્રેન્ચ બ્લડ બેંકોની રેફ્રિજરેશન સિસ્ટમમાં પણ અડચણ ઊભી કરવામાં આવી હતી, જેના કારણે ફ્રિજ અને ફ્રીઝરનું તાપમાન વધી ગયું હતું. વિશેષજ્ઞોનું માનવું છે કે આ પ્રકારની બનાવટી બોમ્બની ધમકીઓ એ ઓછા ખર્ચે ચલાવવામાં આવતા અને માંડ પકડી શકાય તેવા તોડફોડના મોટા ષડયંત્રનો જ એક હિસ્સો હોઈ શકે છે.
