ગુજરાતમાં કડક દારૂબંધીના દાવાઓ વચ્ચે ભાવનગર જિલ્લામાં ડુપ્લિકેટ અને અતિશય ઝેરી દારૂના સેવનથી ૬ લોકોના કરુણ મોત થયા હોવાના મામલે ભારે ખળભળાટ મચી ગયો છે. બનાવટી બ્રાન્ડેડ દારૂ પીધા બાદ 18 થી વધુ લોકોની તબિયત લથડતાં તેમને તાત્કાલિક અસરથી ભાવનગરની સિવિલ તેમજ વિવિધ ખાનગી હોસ્પિટલોમાં સારવાર અર્થે દાખલ કરવામાં આવ્યા છે. આ ગંભીર ઘટનાની તપાસનો વ્યાપ વધારીને પોલીસે મુખ્ય સૂત્રધાર અને બુટલેગર ગૌતમ સોલંકી સહિત કુલ ૨૧ ઇસમો સામે ગુનો દાખલ કર્યો છે, જ્યારે ફરજમાં ગંભીર આળસ અને બેદરકારી દાખવવા બદલ જિલ્લા પોલીસ વડા (SP) એ ૫ પોલીસકર્મીઓને તાત્કાલિક અસરથી સસ્પેન્ડ કરી દીધા છે.
21 સામે BNS અને પ્રોહિબિશન હેઠળ ભયાનક કલમો
ઘટનાની ગંભીરતાને ધ્યાનમાં રાખીને ભાવનગર પોલીસે તપાસનો ધમધમાટ શરૂ કર્યો છે. મુખ્ય બુટલેગર ગૌતમ સોલંકી અને તેના સાગરીતો સહિત ૨૧ લોકો સામે નવરચિત ભારતીય ન્યાય સંહિતા (BNS) અને ગુજરાત પ્રોહિબિશન કાયદાની આકરી કલમો હેઠળ ગુનો નોંધવામાં આવ્યો છે. પોલીસ આ મોટો બનાવટી દારૂ ક્યાં તૈયાર થતો હતો, તેમાં ભેળવવામાં આવેલું ઝેરી કેમિકલ ક્યાંથી લાવવામાં આવ્યું હતું અને કયા-કયા વિસ્તારોમાં તેનું નેટવર્ક ફેલાયેલું હતું તેની ઊંડાણપૂર્વક તપાસ કરી રહી છે.
નીલમબાગના 1 અને વરતેજના 4 પોલીસ કર્મચારીઓ સસ્પેન્ડ
આટલી મોટી માત્રામાં ગેરકાયદેસર દારૂનું વેચાણ ચાલતું હોવા છતાં સ્થાનિક પોલીસ અજાણ કેમ રહી તે અંગે લોકમુખે અનેક સવાલો ઉઠ્યા છે. પરિણામે જિલ્લા SPએ કડક કાર્યવાહી કરતાં નીલમબાગ પોલીસ સ્ટેશનના 1 અને વરતેજ પોલીસ સ્ટેશનના 4 કર્મચારીઓ મળીને એકસાથે 5 પોલીસકર્મીઓને લાઈનએટેચ/સસ્પેન્ડ કરી દીધા છે. દારૂના આ કાળા કારોબારમાં સ્થાનિક પોલીસની કોઈ છૂપી સંડોવણી કે હપ્તાખોરી હતી કે કેમ તેની પણ આંતરિક તપાસ શરૂ કરાઈ છે.
કલેક્ટરનો સત્તાવાર ખુલાસો: 4ના મોત, 2 દર્દી વેન્ટિલેટર પર
ભાવનગર જિલ્લા કલેક્ટરે સમગ્ર મામલે સ્થિતિ સ્પષ્ટ કરતાં જણાવ્યું હતું કે ડુપ્લિકેટ ‘રોયલ સ્ટેગ’ બ્રાન્ડનો દારૂ પીવાના કારણે ચાર વ્યક્તિઓના મોત નીપજ્યા છે. મૃતકોમાં કાર્તિક મકવાણા, ઉપેન્દ્રસિંહ ગોહીલ, ઘનશ્યામસિંહ અને નરેન્દ્ર યાદવનો સમાવેશ થાય છે. જોકે, નરેન્દ્ર યાદવનું મોત આ જ ઝેરી દારૂથી થયું છે કે અન્ય કોઈ કારણસર, તે અંગે પોસ્ટમોર્ટમ રિપોર્ટ બાદ આખરી સ્પષ્ટતા થશે.
હાલમાં ૧૮ દર્દીઓ હોસ્પિટલમાં સારવાર હેઠળ છે. તેમાંથી ૨ દર્દીઓની હાલત અત્યંત નાજુક છે, ૪ લોકોને આઈસીયુ (ICU) માં રાખવામાં આવ્યા છે, ૨ દર્દીઓને વેન્ટિલેટર પર રખાયા છે, જ્યારે બાકીના ૧૦ દર્દીઓની હાલત સ્થિર હોવાનું જાણવા મળ્યું છે.
ગાંધીનગર સ્ટેટ કંટ્રોલ રૂમ હરકતમાં: SP પાસે માગ્યો લેખિત જવાબ
આટલી મોટી હોનારત સર્જાઈ હોવા છતાં ભાવનગર પોલીસ દ્વારા ગાંધીનગર સ્થિત સ્ટેટ કંટ્રોલ રૂમ અને ભાવનગર રેન્જ IG ને સમયસર ટેલિફોનિક કે લેખિત માહિતી કેમ ન અપાઈ તે મુદ્દે ગાંધીનગરથી સ્પષ્ટતા માંગવામાં આવી છે. પોલીસની આંતરિક માહિતી આદાન-પ્રદાન કરવાની પ્રક્રિયામાં થયેલી વિલંબ અને ગોલમાલની પણ ઉચ્ચ સ્તરેથી તપાસ થવાની પૂરી શક્યતા છે.
16 ઓગસ્ટે ખરકડી ગામે યોજાઈ હતી દારૂ પાર્ટી
પ્રાથમિક પોલીસ તપાસમાં ખુલાસો થયો છે કે 16 ઓગસ્ટની રાત્રે ભાવનગરના ઘોઘા તાલુકાના ખરકડી ગામે સાત મિત્રોએ ભેગા મળીને દારૂની પાર્ટી કરી હતી. આ પાર્ટીમાં પીવાયેલો ‘રોયલ સ્ટેગ’ દારૂ નકલી અને કેમિકલયુક્ત હતો. દારૂ પીધાના થોડા જ કલાકોમાં યુવકોને ઉલટી-ઉબકા અને વિઝન ઝાંખું થવાની તકલીફો શરૂ થઈ હતી. મૃતકોના પરિવારજનોએ પણ દારૂમાં મિથેનોલ કે અન્ય ઝેરી કેમિકલ ભેળવાયું હોવાનો સંગીન આરોપ લગાવ્યો છે.
કલેક્ટરની નાગરિકોને કટોકટી અપીલ અને બુટલેગરોની ધરપકડ
પોલીસે આ કેસમાં ઝડપી કાર્યવાહી કરીને ડુપ્લિકેટ દારૂના સપ્લાય ચેન સાથે સંકળાયેલા 4 મુખ્ય બુટલેગરોને ડિટેઇન (અટકાયત) કરી લીધા છે. બીજી તરફ જિલ્લા કલેક્ટરે લોકોને આહ્વાન કર્યું છે કે રવિવાર કે સોમવારે જો કોઈ વ્યક્તિએ શંકાસ્પદ કે ડુપ્લિકેટ દારૂનું સેવન કર્યું હોય તો લક્ષણો દેખાવાની રાહ જોયા વગર તાત્કાલિક નજીકની હોસ્પિટલે પહોંચીને તબીબી તપાસ કરાવે. મિથેનોલ કે ઝેરી રસાયણોની અસર ધીમે ધીમે શરીરના અંગોને નુકસાન પહોંચાડતી હોવાથી સમયસરની સારવાર જ જીવ બચાવી શકે છે.
ગુજરાતમાં દારૂબંધીના કડક અમલ વચ્ચે ભાવનગરમાં સર્જાયેલી આ હોનારતે તંત્રની પોલ ખોલી નાખી છે. હાલ તંત્રની પ્રાથમિકતા દર્દીઓનો જીવ બચાવવાની અને બજારમાં રખડતા ઝેરી દારૂના જથ્થાને કબ્જે કરવાની છે.