નિર્દેશક કુણાલ કોહલીએ ‘હમતુમ’ (૨૦૦૪) નું આયોજન કર્યું ત્યારે એમાં સૈફઅલી ખાન ન હતો. ત્રણ જાણીતા હીરોએ 
ના પાડ્યા પછી સૈફ ફિલ્મમાં આવ્યો હતો. કુણાલે હોલિવૂડની ફિલ્મ ‘વ્હેન હેરી મેટ સેલી’ ની રિમેક તરીકે ‘હમતુમ’ ની સ્ક્રિપ્ટ તૈયાર કરી હતી. સ્ક્રિપ્ટ મોકલીને જ્યારે એ ફિલ્મના નિર્માતા પાસેથી સત્તાવાર રીતે અધિકાર માંગવામાં આવ્યા ત્યારે એમણે એમ કહીને ના પાડી હતી કે વાર્તા ૭૦ ટકા સુધી એમની ફિલ્મ પર આધારિત હોવી જોઈએ. કુણાલ એ વાર્તા પર સંપૂર્ણ ફિલ્મ બનાવવા માગતા ન હતા. તેથી ‘હમતુમ’ ને અલગ ફિલ્મ તરીકે બનાવવામાં આવી હતી.
શરૂઆતમાં યશ ચોપડા એની અલગ વાર્તા પર વિશ્વાસ ધરાવતા ન હતા અને આદિત્યને કહ્યું હતું કે આ જોખમી પગલું છે. પરંતુ ફિલ્મ જોયા પછી યશજીએ કુણાલની પ્રશંસા કરી હતી. યશરાજ ફિલ્મ્સની ‘હમતુમ’ માટે સૌથી પહેલાં રિતિક રોશનનો સંપર્ક કરવામાં આવ્યો હતો. કેમકે એ એમની જ ‘મુઝસે દોસ્તી કરોગે’ (૨૦૦૨) કરી ચૂક્યો હતો. રિતિકને સ્ક્રિપ્ટ ગમી હતી પણ એને કોમેડી શૈલીમાં સફળતા માટે આત્મવિશ્વાસ ન હતો. તેની ઘણી બધી ફિલ્મો ફ્લોપ થઈ ચૂકી હતી. ત્યારે તે ‘કોઈ મિલ ગયા’ કરી રહ્યો હતો અને એમ માનતો હતો કે એક હિટ આપ્યા પછી આ ફિલ્મ કરી શકે છે.
કુણાલ બે વર્ષ સુધી રાહ જોઈ શકે એમ ન હતો એટલે ‘હમતુમ’ માટે આમિર ખાનનો સંપર્ક કર્યો હતો. ત્યારે આમિરના પત્ની રીના દત્તા સાથેના છૂટાછેડાની વાત ચાલી રહી હતી. આમિરે કહ્યું હતું કે તે અત્યારે સ્ક્રિપ્ટ સાંભળવાની સ્થિતિમાં પણ નથી. એ પછી વિવેક ઓબેરોયને સ્ક્રિપ્ટ સંભળાવી. એણે ફિલ્મ કરવા માટે હા પાડીને તારીખો ફાળવી દીધી હતી. પછી એ તારીખો રદ કરીને એમાં કેટલાક ફેરફાર સૂચવ્યા હતા. જે કુણાલ કરી શકે એમ ન હતો એટલે વિવેકને પડતો મૂક્યો. ત્રણ હીરોએ ના પાડ્યા પછી કુણાલ અલગ પાકિસ્તાનના મુદ્દાવાળી વાર્તા પર ફિલ્મ બનાવવાનું વિચારવા લાગ્યો હતો ત્યારે આદિત્ય ચોપડાએ સૈફના નામનું સૂચન કર્યું હતું.
કુણાલે એ પાત્રમાં સૈફની કલ્પના કરી અને થયું કે એ યોગ્ય રહે એમ છે. એણે ત્યાં સુધીમાં સોલો હીરો તરીકે એકપણ હિટ ફિલ્મ આપી ન હતી. તેનો આત્મવિશ્વાસ જોઈને કુણાલે સૈફને સાઇન કરી લીધો હતો. નિર્દેશક કુણાલ કોહલીએ એક મુલાકાતમાં જૂની યાદો સાંભરી કહ્યું છે કે પ્રિમિયરમાં રિતિક આવ્યો હતો અને એણે કહ્યું હતું કે સૈફ મારાથી વધુ શ્રેષ્ઠ પસંદગી છે. હું એના જેવું કામ કરી શક્યો ના હોત. યશરાજ બેનરની આ સૌથી ઓછા બજેટની ફિલ્મ હતી. એ સમય પર રૂ.૧૦ કરોડથી વધુના બજેટમાં એમની ફિલ્મો બનતી હતી ત્યારે ‘હમતુમ’ નું બજેટ રૂ.૭.૫ કરોડનું જ હતું. કેટલાક દ્રશ્યોનું ફિલ્માંકન બદલવામાં આવ્યું હતું. સૈફ અને રાની મુખર્જીના બાથરૂમના ઝઘડાનું દ્રશ્ય પહેલાં ગેટવે ઓફ ઈન્ડિયા પર ફિલ્માવવામાં આવનાર હતું. રાની ગુસ્સે થઈને ગેટ વે ઓફ ઈન્ડિયાને બદલે બાથરૂમમાં જાય એ વાસ્તવિક લાગે એવું હતું. તેથી બાથરૂમમાં ફિલ્માવવામાં આવ્યું હતું.
