હિમાલયી ક્ષેત્રમાં આવેલા ઉત્તરાખંડના ઉત્તરકાશી જિલ્લામાં શનિવારે રાત્રે ભૂકંપના તીવ્ર આંચકા અનુભવાયા હતા. નેશનલ સેન્ટર ફોર સીસ્મોલોજીના જણાવ્યા અનુસાર, રિક્ટર સ્કેલ પર આ ભૂકંપની તીવ્રતા 4.2 માપવામાં આવી હતી. રાત્રે 8 વાગીને 7 મિનિટ અને 30 સેકન્ડે આવેલા આ આંચકાથી સમગ્ર વિસ્તારની ધરા ધ્રૂજી ઊઠી હતી, જેના પગલે ભયભીત થયેલા લોકો પોતાના ઘરોમાંથી બહાર નીકળીને ખુલ્લા સ્થાન અને રસ્તાઓ પર દોડી આવ્યા હતા. ભૂકંપશાસ્ત્રના ડેટા અનુસાર, આ ભૂકંપનું કેન્દ્રબિંદુ 30.744 ડિગ્રી ઉત્તર અક્ષાંશ અને 78.414 ડિગ્રી પૂર્વ રેખાંશ પર જમીનથી આશરે 11 કિલોમીટરની ઊંડાઈએ નોંધાયું હતું.
કોઈ નુકસાન નહીં, પણ ભયનો માહોલ
ઉત્તરકાશી અને આસપાસનો પહાડી વિસ્તાર ભૂકંપની દ્રષ્ટિએ અત્યંત સંવેદનશીલ ઝોનમાં આવે છે. રાહતની વાત એ છે કે આ ભૂકંપના કારણે હજુ સુધી કોઈ પણ પ્રકારની જાનહાનિ કે મોટી મિલકતને નુકસાન થયાના સમાચાર નથી. જોકે, આંચકો આવતા જ લોકોએ એકબીજાનો સંપર્ક કરીને ખબરઅંતર પૂછવાનું શરૂ કરી દીધું હતું અને મોડી રાત સુધી લોકોમાં ફાળ પડેલી જોવા મળી હતી.
4 દિવસમાં બીજી વાર ધ્રૂજી ધરા
ઉત્તરાખંડમાં ભૂકંપની આ ઘટના છેલ્લા 4 દિવસમાં બીજી વખત બની છે. આ અગાઉ મંગળવારે રાત્રે 10:23 વાગ્યે રાજ્યના ચમોલી જિલ્લામાં 4.9 ની તીવ્રતાનો શક્તિશાળી ભૂકંપ આવ્યો હતો, જેનું કેન્દ્ર જમીનથી 13 કિલોમીટર ઊંડે હતું. આ ભૂકંપના આંચકા દિલ્હી અને સમગ્ર નેશનલ કેપિટલ રીજન (NCR) સુધી અનુભવાયા હતા.
નિષ્ણાતોની સલાહ: ભૂકંપ સમયે શું કરવું?
ભૂકંપની વારંવાર બનતી ઘટનાઓને ધ્યાનમાં રાખીને ભૂસ્તરશાસ્ત્રીઓ અને આપત્તિ વ્યવસ્થાપન નિષ્ણાતોએ નાગરિકોને ગભરાવાને બદલે સાવચેતી રાખવા અપીલ કરી છે:
ઈન્ડોર સેફ્ટી: આંચકા અનુભવાય ત્યારે ઘરની બહાર ભાગવાને બદલે મજબૂત ટેબલ કે પલંગ નીચે શરણ લેવી અને માથું તથા ગરદન ઢાંકી રાખવાં.
જોખમી વસ્તુઓથી દૂર રહો: કાચ, બારીઓ અને ભારે કબાટ કે સામાનથી અંતર જાળવવું.
લિફ્ટનો ઉપયોગ ન કરવો: આંચકા રોકાયા બાદ જ સીડીઓનો ઉપયોગ કરીને શાંતિપૂર્વક ખુલ્લા મેદાનમાં જવું. ભૂકંપ દરમિયાન કે તરત પછી લિફ્ટનો ઉપયોગ બિલકુલ ન કરવો.