સંસદીય સમિતિઓના અધ્યક્ષોની નવી યાદી જાહેર કરવામાં આવી છે, જેમાં અનેક દિગ્ગજ નેતાઓને ફરીથી જવાબદારી સોંપવામાં આવી છે, જ્યારે કેટલીક મહત્વપૂર્ણ સમિતિઓની કમાન નવા નેતાઓના હાથમાં સોંપાઈ છે. ભાજપના રાજ્યસભા સાંસદ અને રાષ્ટ્રીય પ્રવક્તા સુધાંશુ ત્રિવેદીને વાણિજ્ય (Commerce) સંબંધી સમિતિના નવા અધ્યક્ષ બનાવવામાં આવ્યા છે, જેમણે તૃણમૂલ કોંગ્રેસ (TMC) ના ડોલા સેનનું સ્થાન લીધું છે. બીજી તરફ, વિરોધ પક્ષોના નેતાઓને પણ કેટલીક મહત્વની કમિટીઓમાં અધ્યક્ષ પદે જાળવી રાખવામાં આવ્યા છે.
કઈ સમિતિઓના અધ્યક્ષ બદલાયા?
વાણિજ્ય સમિતિ: ભાજપના સુધાંશુ ત્રિવેદીને અધ્યક્ષ બનાવાયા છે (TMC ના ડોલા સેનનું સ્થાન લીધું).
કાર્મિક, જાહેર ફરીયાદો, કાયદો અને ન્યાય સમિતિ: ભાજપના સુજીત કુમારને અધ્યક્ષ તરીકે નિયુક્ત કરવામાં આવ્યા છે.
રસાયણ અને ખાતર સમિતિ: TMC ના કાકોલી ઘોષ દસ્તીદારે કીર્તિ આઝાદની જગ્યા લીધી છે.
રેલવે સમિતિ: ભાજપના સુધીર ગુપ્તાને અધ્યક્ષ બનાવાયા છે, જેમણે સીએમ રમેશનું સ્થાન લીધું છે.
સંરક્ષણ (Defense) સમિતિ: ભાજપના વરિષ્ઠ નેતા રાધા મોહન સિંહને સંરક્ષણ સમિતિની કમાન સોંપવામાં આવી છે.
ઉદ્યોગ સમિતિ: DMK ના તિરૂચિ શિવા ઉદ્યોગ સમિતિના અધ્યક્ષ પદની જવાબદારી સંભાળશે.
નાણાકીય (Finance) સમિતિ: ભાજપના ભર્તૃહરિ મહતાબને નાણા સમિતિના અધ્યક્ષ બનાવવામાં આવ્યા છે.
કયા નેતાઓને ફરીથી અધ્યક્ષ બનાવાયા?
વિદેશ અને કૃષિ: કોંગ્રેસના વરિષ્ઠ નેતા શશી થરૂર વિદેશ બાબતોની સમિતિના અધ્યક્ષ પદે યથાવત રહેશે. આ સિવાય પંજાબના પૂર્વ મુખ્યમંત્રી ચરણજીત સિંહ ચન્ની કૃષિ સમિતિના અધ્યક્ષ તરીકે કાર્યરત રહેશે.
પરિવહન અને ઊર્જા: સંજય કુમાર ઝાને પરિવહન સમિતિના અધ્યક્ષ તરીકે પુનઃનિયુક્ત કરાયા છે, જ્યારે શિવ સેનાના શ્રીરંગ બારણે ઊર્જા સમિતિના અધ્યક્ષ પદે બહાલ રહ્યા છે.
ગૃહ અને આઈટી સમિતિ: ભાજપના રાધા મોહન દાસ અગ્રવાલ ગૃહ બાબતોની સમિતિના અધ્યક્ષ પદે રહેશે, જ્યારે નિશિકાંત દુબેને સંચાર અને માહિતી પ્રૌદ્યોગિકી (IT) સમિતિની જવાબદારી ફરી સોંપાઈ છે.
કોલસો, ખાણ અને સ્ટીલ: ભાજપના પૂર્વ કેન્દ્રીય મંત્રી અનુરાગ ઠાકુર આ સમિતિના અધ્યક્ષ પદે યથાવત રહેશે.
વિજ્ઞાન અને પર્યાવરણ: ભાજપના મેધા વિશ્રામ કુલકર્ણી વિજ્ઞાન અને પ્રૌદ્યોગિકી, પર્યાવરણ, વન અને જળવાયુ પરિવર્તન કમિટીના અધ્યક્ષ પદે જાળવી રખાયા છે.
શિક્ષણ, આરોગ્ય અને ગ્રામીણ વિકાસ સમિતિઓ
કોંગ્રેસના મુકુલ વાસનિક શિક્ષણ, મહિલા, બાળ અને યુવા બાબતોની સમિતિના અધ્યક્ષ રહેશે. સમાજવાદી પાર્ટીના રામગોપાલ યાદવ આરોગ્ય અને પરિવાર કલ્યાણ સમિતિના અધ્યક્ષ પદે રહેશે. કોંગ્રેસના સપ્તગિરી ઉલાકાને ગ્રામીણ વિકાસ અને પંચાયતી રાજ સમિતિના અધ્યક્ષ ફરી બનાવવામાં આવ્યા છે. ભાજપના રાજીવ પ્રતાપ રૂડી જળ સંસાધન સમિતિના અધ્યક્ષ તરીકે કામ કરતા રહેશે, જ્યારે DMK ના કનિમોઝીને ઉપભોક્તા બાબતો, ખાદ્ય અને સાર્વજનિક વિતરણ સમિતિના અધ્યક્ષ પદે ફરીથી નિયુક્ત કરાયા છે.
