ઓડિશામાં ભારે વરસાદ અને પૂરના કારણે સ્થિતિ બેહદ ગંભીર રૂપ ધારણ કરી ચૂકી છે. ભારતીય હવામાન વિભાગ (IMD) એ રાજ્યના અનેક જિલ્લાઓમાં ભારેથી અતિ ભારે વરસાદને લઈને ‘રેડ એલર્ટ’ જારી કર્યું છે. આ પરિસ્થિતિને ધ્યાનમાં રાખીને રાજ્ય સરકારે હાઇ એલર્ટ જાહેર કર્યું છે અને અત્યાર સુધીમાં 2.37 lakh થી વધુ લોકોને પૂરગ્રસ્ત વિસ્તારોમાંથી સુરક્ષિત સ્થાનો પર ખસેડવામાં આવ્યા છે. રાજ્યના મુખ્ય સચિવ અનુ ગર્ગે પરિસ્થિતિની સમીક્ષા કર્યા બાદ જણાવ્યું હતું કે 16 થી 18 August સુધીના ત્રણ દિવસ દરમિયાન અતિ ભારે વરસાદની આગાહી કરવામાં આવી છે. સતત થઈ રહેલા વરસાદના કારણે ઉત્તરીય જિલ્લાઓમાં પૂરનું સંકટ વધુ ઘેરું બન્યું છે.
5.15 Lakh થી વધુ લોકો પ્રભાવિત
હાલમાં 49 બ્લોકની 331 ગ્રામ પંચાયતો અને 5 શહેરી વિસ્તારોના 947 ગામોમાં 5.15 lakh થી વધુ લોકો પૂરથી પ્રભાવિત થયા છે. પૂરપીડિતોને આશ્રય અને સહાય પૂરી પાડવા માટે 293 રિલીફ કેમ્પ (રાહત શિબિરો) ઊભા કરવામાં આવ્યા છે.
સરકારી કર્મચારીઓની રજાઓ રદ
સ્થિતિની ગંભીરતાને જોતાં રાજ્ય સરકારે તમામ સરકારી કર્મચારીઓની રજાઓ રદ કરી દીધી છે અને તેમને તાત્કાલિક ડ્યુટી પર હાજર થવાના નિર્દેશ આપ્યા છે. બાલાસોર, ભદ્રક અને જાજપુર જેવા સૌથી વધુ અસરગ્રસ્ત જિલ્લાઓમાં રાહત કામગીરીનું નિરીક્ષણ કરવા માટે ત્રણ સીનિયર IAS અધિકારીઓની તૈનાતી કરવામાં આવી છે. આ ઉપરાંત, નદીઓના કિનારા અને બંધોની સુરક્ષા માટે જળ સંસાધન વિભાગના વધારાના એન્જિનિયરો મોકલવામાં આવ્યા છે.
રેસ્ક્યૂ માટે 90 ટીમો તૈનાત
જોખમી વિસ્તારોમાં બચાવ કામગીરી માટે ODRAF ની 36, NDRF ની 7 અને ફાયર સર્વિસની 47 ટીમો સહિત કુલ 90 રેસ્ક્યૂ ટીમોને તૈનાત કરવામાં આવી છે. હવામાન વિભાગના જણાવ્યા અનુસાર, ઉત્તર-પશ્ચિમ બંગાળની ખાડી પર સર્જાયેલું લો પ્રેશર વધુ મજબૂત બન્યું છે અને આગામી 24 કલાકમાં તે ડિપ્રેશનમાં ફેરવાય તેવી શક્યતા છે.
માછીમારોને દરિયો ન ખેડવા સલાહ
હવામાન વિભાગે 16 થી 18 August સુધી પશ્ચિમ બંગાળ, ઓડિશા અને ઉત્તરી આંધ્રપ્રદેશના દરિયાકિનારે માછીમારોને દરિયામાં ન જવાની સખત સલાહ આપી છે. બાલાસોર, ભદ્રક, જાજપુર, મયૂરભંજ અને ક્યોંઝર જિલ્લાઓમાં વૈતરણી, બ્રાહ્મણી, સાલંદી, જલકા અને બૂઢાબલંગ નદીઓ ઉફાન પર હોવાથી પૂરની સ્થિતિ વધુ વણસી રહી છે.
