પંજાબના ફગવાડા સ્થિત લવલી પ્રોફેસનલ યુનિવર્સિટી (LPU) માં શનિવારે મોડી રાત્રે ભારે વિરોધ પ્રદર્શન અને હોબાળો જોવા મળ્યો હતો. સોશિયલ મીડિયા પર એક વિદ્યાર્થિની સાથે દુષ્કર્મ અને આત્મહત્યાની અફવા ફેલાતા જ સેંકડો વિદ્યાર્થીઓ કેમ્પસમાં એકઠા થઈ ગયા હતા અને વહીવટીતંત્ર સામે સૂત્રોચ્ચાર શરૂ કર્યા હતા. આ ઘટનાએ જોતજોતામાં હિંસક રૂપ ધારણ કરી લીધું હતું, જેમાં કેમ્પસની મિલકતોને નુકસાન પહોંચાડવામાં આવ્યું હતું અને નેશનલ હાઇવે પર ચક્કાજામ કરવામાં આવ્યો હતો.
અફવા કેવી રીતે ફેલાઈ?
શનિવારે મોડી રાત્રે ગર્લ્સ હોસ્ટેલના વિદ્યાર્થીઓના સોશિયલ મીડિયા ગ્રુપ્સમાં કેટલાક મેસેજ વાયરલ થયા હતા. આ મેસેજીસમાં દાવો કરવામાં આવ્યો હતો કે કોઈ બહારના વ્યક્તિએ હોસ્ટેલમાં ઘૂસીને એક વિદ્યાર્થિની સાથે દુષ્કર્મ આચર્યું છે અને કેટલાક મેસેજમાં વિદ્યાર્થિનીએ આત્મહત્યા કરી લીધી હોવાની વાત પણ વહેતી થઈ હતી. આ દાવાઓની સત્તાવાર પુષ્ટિ થયા વિના જ વિદ્યાર્થીઓમાં અસંતોષ અને રોષ વ્યાપી ગયો હતો, જેના પરિણામે મોટી સંખ્યામાં વિદ્યાર્થીઓ હોસ્ટેલ બહાર જમા થઈ ગયા હતા અને સુરક્ષા વ્યવસ્થા સામે સવાલો ઉઠાવ્યા હતા.
તોડફોડ અને નેશનલ હાઇવે જામ
વિરોધ પ્રદર્શને જોતજોતામાં ઉગ્ર સ્વરૂપ ધારણ કરી લીધું હતું. પ્રદર્શનકારીઓએ કેમ્પસના એક ભાગમાં તોડફોડ કરી આગચંપી કરવાનો પ્રયાસ કર્યો હતો. આ પછી વિદ્યાર્થીઓ મુખ્ય ગેટ તરફ આગળ વધ્યા હતા અને ચંદીગઢ-અમૃતસર નેશનલ હાઇવે પર ધરણાં પર બેસી ગયા હતા. હાઇવે બંધ થવાને કારણે બંને તરફ વાહનોની લાંબી કતારો લાગી ગઈ હતી અને વાહનવ્યવહાર ખોરવાયો હતો.
પોલિસ અને વિદ્યાર્થીઓનો પક્ષ
ઘટનાની જાણ થતાં જ પોલિસ કાફલો સ્થળ પર પહોંચી ગયો હતો. SSP ગૌરવ તૂરાએ જણાવ્યું હતું કે, પોલિસે પરિસ્થિતિ પર કાબૂ મેળવ્યો છે અને વિદ્યાર્થીઓ સાથે ચર્ચા કરી છે. તેમણે સ્પષ્ટ કર્યું કે અત્યાર સુધી દુષ્કર્મની કોઈ ઘટના સામે આવી નથી અને સોશિયલ મીડિયા પર વહેતા થયેલા મેસેજના સ્ત્રોતની તપાસ કરવામાં આવી રહી છે. બીજી તરફ, વિરોધ કરી રહેલા વિદ્યાર્થીઓનો આરોપ છે કે યુનિવર્સિટી વહીવટીતંત્ર તેમને ઘટનાસ્થળના CCTV ફૂટેજ બતાવી રહ્યું નથી અને જે વોર્ડન ડ્યુટી પર હતા તેમનું નામ પણ જાહેર કરવામાં આવી રહ્યું નથી.
યુનિવર્સિટી તંત્રનો દાવો: આરોપો પાયાવિહોણા
LPU ના રજિસ્ટ્રાર ડૉ. મોનિકા ગુલાટીએ સોશિયલ મીડિયા પર ચાલી રહેલી ખબરોને તદ્દન ખોટી અને ભ્રામક ગણાવી છે. તેમણે જણાવ્યું કે કેટલાક અસામાજિક તત્વો શૈક્ષણિક માહોલ બગાડવા માટે પાયાવિહોણી અને મનઘડંત અફવાઓ ફેલાવી રહ્યા છે. યુનિવર્સિટીએ વાલીઓ, વિદ્યાર્થીઓ અને સામાન્ય જનતાને અપીલ કરી છે કે તેઓ આવી અફવાઓ પર ધ્યાન ન આપે અને માત્ર યુનિવર્સિટીના સત્તાવાર માધ્યમો દ્વારા આપવામાં આવતી માહિતી પર જ વિશ્વાસ કરે.