તામિલનાડુમાં હવે વાવાઝોડું ‘અર્ણબ’ ફૂંકાવાની સંભાવના

ચેન્નાઈઃ તામિલનાડુનાં લોકોએ છેલ્લા બે અઠવાડિયામાં બે ચક્રવાતી વાવાઝોડા – ‘નિવાર’ અને ‘બુરેવી’નો સામનો કર્યો છે. એમની તકલીફનો હજી અંત આવવાનો નથી. હવે એક ત્રીજું વાવાઝોડું ફૂંકાવાની તૈયારીમાં છે, જેનું નામ અપાયું છે ‘અર્ણબ’.

તામિલનાડુ રાજ્યમાં છેલ્લા કેટલાક વખતમાં એક ડઝન કરતાંય વધારે વાવાઝોડા ફૂંકાઈ ચૂક્યા છે. નવું વાવાઝોડું હિંદ મહાસાગરમાં આકાર લઈ રહ્યું છે. વાવાઝોડાને ‘અર્ણબ’ નામ વાંચીને ઘણાયને આશ્ચર્ય થશે, પણ આ નામને મોટી બૂમો પાડીને રિપબ્લિક ટીવી ચેનલ ગજાવતા પત્રકાર અર્ણબ ગોસ્વામી સાથે કશી લેવાદેવા નથી. વાસ્તવમાં, ભારતીય ઉપખંડ અને દક્ષિણ-પૂર્વ એશિયા વિસ્તારમાં જેમના આકાશ પર ચક્રવાતી વાવાઝોડા આકાર લઈ રહ્યા છે તેવા 13 દેશોએ આ વર્ષે ફૂંકાવાની સંભાવનાવાળા 169 વાવાઝોડાઓને ચોક્કસ નામ આપ્યા છે. ‘અર્ણબ’ નામ પણ એમાંનું એક છે.

બંગાળના અખાત અને અરબી સમુદ્ર પરના આકાશમાં આકાર લેતા વાવાઝોડાઓના નામોની યાદી આ 13 દેશોએ તૈયાર કરી છેઃ ભારત, બાંગ્લાદેશ, માલદીવ, મ્યાનમાર, ઓમાન, પાકિસ્તાન, શ્રીલંકા, થાઈલેન્ડ, ઈરાન, કતર, સાઉદી અરેબિયા, યૂએઈ અને યમન. દરેક દેશે આઠ-આઠ નામ આપ્યા હતા.

[ અમને ફોલો કરો:    Facebook   | Twitter   | Instagram  | Telegram 

તમારા મોબાઇલમાં 9820649692 આ નંબર Chitralekha નામે સેવ કરી અમને વ્હોટસએપ પર તમારું નામ અને ઈ-મેઈલ લખીને મોકલો અને તમને મનગમતી વાંચન સામગ્રી મેળવો .]