મુંબઈઃ ટોચના ઉદ્યોગપતિ મુકેશ અંબાણી અને એમના પત્ની નીતા અંબાણીના મોટા પુત્ર આકાશ અને એમના પત્ની શ્લોકાનાં દ્વિતીય સંતાન સ્વરૂપ પુત્રીનું નિવાસસ્થાને આગમન થઈ ચૂક્યું છે. અંબાણી પરિવારજનોએ નવી સભ્ય – પુત્રીનું સ્વાગત કર્યું છે. આકાશ અને શ્લોકાને એક પુત્ર પણ છે પૃથ્વી, જે બે વર્ષનો થયો છે. મુકેશ અને નીતા અંબાણીની આ બીજી પૌત્રી છે અને ચોથું પૌત્ર-બાળક છે.
આકાશ, શ્લોકા એમનાં પરિવારની નવી સભ્ય – નવજાત પુત્રી તેમજ નીતા અને મુકેશ અંબાણી હોસ્પિટલમાંથી એમની કારમાં બેસીને દક્ષિણ મુંબઈસ્થિત અંબાણી નિવાસસ્થાન ‘એન્ટિલિયા’ ખાતે પહોંચ્યાં હતાં. નીતાએ પૌત્રીને એમનાં હાથમાં તેડી હતી. કારમાં બેઠેલાં પરિવારનાં સભ્યોની તસવીરો અને વિડિયો સોશિયલ મિડિયા પર જોવા મળી રહ્યા છે. આકાશના નાના ભાઈ અનંત અંબાણી અને એમના ફિયાન્સી રાધિકા મરચંટ પણ અંબાણી પરિવારમાં સામેલ થયેલી નવી સભ્યને જોવા હોસ્પિટલ ખાતે ગયાં હતાં. આકાશ અને શ્લોકાએ એમની દીકરીનું નામ હજી પાડ્યું નથી.
