મુંબઈ: સૈફ અલી ખાન પર થયેલા જીવલેણ હુમલાના કેસમાં એક નવો ખુલાસો સામે આવ્યો છે. ફેશિયલ રિકોગ્નિનશનમાં આરોપીનો ચહેરો સીસીટીવીમાં કેદ થયેલા ચહેરા સાથે મેળ ખાય છે. શુક્રવારે મુંબઈ પોલીસે આ વાતની પુષ્ટિ કરી. સોશિયલ મીડિયાના નેટીઝન્સ દ્વારા આરોપીના ચહેરા અને સીસીટીવીમાં કેદ થયેલા ચહેરા અંગે શંકા વ્યક્ત કરવામાં આવી હતી.
મોહમ્મદ શરીફુલ ઇસ્લામ શહજાદ આરોપી છે
મુંબઈ પોલીસે જણાવ્યું હતું કે, “ધરપકડ કરાયેલા આરોપી મોહમ્મદ શરીફુલ ઇસ્લામ શહજાદનો ચહેરો ફેશિયલ રિકોગ્નિનશનમાં મેચ કરવામાં આવ્યો છે. પરીક્ષણ મુજબ, સીસીટીવી ફૂટેજમાં દેખાતો વ્યક્તિ અને મોહમ્મદ શરીફુલ ઇસ્લામ શહજાદ એક જ વ્યક્તિ છે.”
સોશિયલ મીડિયા પર નેટીઝન્સે શંકા વ્યક્ત કરી
સોશિયલ મીડિયા પર યુઝર્સ અભિનેતા પર થયેલા ખૂની હુમલાના આરોપી અને સીસીટીવીમાં કેદ થયેલા આરોપીના ચહેરા અંગે શંકા વ્યક્ત કરી રહ્યા હતા. અનેક અહેવાલોમાં એવો પણ દાવો કરવામાં આવ્યો છે કે આરોપીના ફિંગરપ્રિન્ટ્સ ગુનાના સ્થળે મળેલા ફિંગરપ્રિન્ટ્સ સાથે મેળ ખાતા નથી, જેના કારણે તેની ઓળખ અંગે વધુ શંકા ઉભી થાય છે.
તપાસ દરમિયાન પોલીસે ઘણા ગુનેગારોની અટકાયત પણ કરી હતી. જેના કારણે સાચા આરોપીની ધરપકડ પછી પણ શંકા રહી. હાલમાં, આરોપીને 14 દિવસની ન્યાયિક કસ્ટડીમાં મોકલવામાં આવ્યો છે. 16 જાન્યુઆરીના રોજ મુંબઈના બાંદ્રા સ્થિત સૈફ અલી ખાનના ઘરે ચોરીના પ્રયાસ દરમિયાન એક વ્યક્તિએ તેના પર છરી વડે અનેક વાર હુમલો કર્યો હતો. ત્યારબાદ અભિનેતાને લીલાવતી હોસ્પિટલમાં લઈ જવામાં આવ્યા, જ્યાં તેમની ઘણી સર્જરી કરવામાં આવી અને પાંચ દિવસ પછી તેમને રજા આપવામાં આવી.
