ગ્વાટેમાલા- મધ્ય અમેરિકામાં સૌથી સક્રિય જ્વાળામુખીમાં જેની ગણના થાય છે તે ‘વોલ્કન ડે ફુગો’માં થયેલા વિસ્ફોટમાં ઓછામાં ઓછા 25 લોકોના મોત થયાના સમાચાર છે. જ્યારે 20 જેટલા લોકો ઈજાગ્રસ્ત થયા છે. આ સક્રિય જ્વાળામુખીમાં એક વર્ષમાં આ બીજો વિસ્ફોટ થયો છે. વિસ્ફોટ બાદ લગભગ 2 હજાર લોકોને સુરક્ષિત સ્થાન પર ખસેડવામાં આવ્યા છે.
જ્વાળામુખીમાંથી બહાર આવતી રાખ અને ધુમાડો આસપાસના ગામો ઉપર ફેલાઈ ગયા હતા. નેશનલ ડિઝાસ્ટર મેનેજમેન્ટ સર્ગિયો કેબાસે જણાવ્યું કે, ગ્વાટેમાલા સિટીથી લગભગ 44 કિલોમીટર દૂર જ્વાળામુખી ફાટવાની ઘટના બાદ અનેક લોકો લાપતા થયા છે.
જ્વાળામુખીમાં વિસ્ફોટ થયા બાદ આશરે 12 હજાર 346 ફુટની ઊંંચાઇ સુધી રાખ ફેલાઈ ગઈ હતી. એર ટ્રાફિક અધિકારીઓએ રાખને કારણે વિમાનને થનારા સંભવિત નુકસાનને ધ્યાનમાં રાખીને રાજધાનીનું ઈન્ટરનેશનલ એરપોર્ટ પણ બંધ કરી દીધું છે.
