મુંબઈ: આજે એટલે કે 20મી જુલાઈને વિશ્વભરમાં આંતરરાષ્ટ્રીય ચંદ્ર દિવસ (International Moon Day)તરીકે ઉજવવામાં આવે છે. વાસ્તવમાં, આ દિવસ ચંદ્ર પર માનવજાતના પ્રથમ પગલાંની યાદમાં ઉજવવામાં આવે છે. અમેરિકન અવકાશયાત્રીઓ નીલ આર્મસ્ટ્રોંગ અને બઝ એલ્ડ્રિને પ્રથમ વખત 20 જુલાઈ, 1969ના રોજ ચંદ્ર પર પગ મૂક્યો હતો. આ લોકોને યુએસ સ્પેસ એજન્સી એપોલો 11 ચંદ્ર મિશન હેઠળ ત્યાં મોકલવામાં આવ્યા હતા.
આ દિવસની ઉજવણીની જાહેરાત 9 ડિસેમ્બર 2021ના રોજ યોજાયેલી સંયુક્ત રાષ્ટ્ર મહાસભાની બેઠકમાં કરવામાં આવી હતી. આ દિવસ દર વર્ષે 20 જુલાઈના રોજ ઉજવવામાં આવે છે.
ઈતિહાસ શું છે?
1961માં રાષ્ટ્રપતિ જ્હોન એફ.કેનેડીએ દાયકાના અંત પહેલા ચંદ્ર પર માણસને ઉતારવાનું સાહસિક લક્ષ્ય નક્કી કર્યું. નાસાના એપોલો પ્રોગ્રામનો જન્મ થયો હતો, અને વર્ષોના સઘન સંશોધન, વિકાસ અને પરીક્ષણ પછી એપોલો 11 મિશન 16 જુલાઈ, 1969ના રોજ લોન્ચ કરવામાં આવ્યું હતું.
ચાર દિવસ પછી આર્મસ્ટ્રોંગ અને બઝ એલ્ડ્રિન ચંદ્રની સપાટી પર પગ મૂકનારા પ્રથમ માનવ બન્યા. આ દરમિયાન તેમણે કરેલી જાહેરાત ખૂબ જ પ્રખ્યાત છે. તેમણે કહ્યું કે તે માણસ માટે એક નાનું પગલું છે, માનવજાત માટે એક વિશાળ છલાંગ છે.
એપોલો 11 મિશનએ અવકાશ સંશોધનના ભાવિ માટે માર્ગ મોકળો કર્યો, નવી પેઢીઓને STEM ક્ષેત્રોમાં કારકિર્દી બનાવવા અને ટેકનોલોજી, દવા અને પર્યાવરણીય વિજ્ઞાનમાં પ્રગતિ કરવા પ્રેરણા આપી. અંતમાં એમ કહી શકાય કે આંતરરાષ્ટ્રીય ચંદ્ર દિવસ એ માનવ સિદ્ધિઓ અને વૈજ્ઞાનિક પ્રગતિની ઉજવણી છે.
